Brennuvargur biðst griða

Brennuvargur íslenskra fjölmiðla, Jón Ásgeir Jóhannesson í Baugi, biðst griða og lofar að haga sér eins og maður. Hann gerði það líka í Morgunblaðsgrein 7. janúar 2004 þegar hann var nýbúinn að bæta í eignasafn sitt Stöð 2 og Bylgjunni. Þá kvaðst Jón Ásgeir ætla að búa til fjölmiðlaráð sem myndi tryggja að hann misnotaði ekki fjölmiðlana sína.

Rökstuðningurinn fyrir tillögunni um fjölmiðlaráð var kauðalegur og svo virtist sem einhver væri að gera grín að Jóni Ásgeiri; látið hann fá texta sem forstjórinn skrifaði upp á en orðin bara himinblámahjal. Á eftir málsgrein um að fréttastjórar hinna þriggja fjölmiðla Baugs eigi að gæta ,,hlutleysis" og ,,réttlætis í fréttaflutningi" kom þessi fyrirvari: ,,Það ber þó að hafa það í huga að hlutverk fréttastofu er að flytja fréttir en ekki breiða út hugmyndir sínar um hlutleysi og réttlæti." Hugmyndin um ,,réttlæti í fréttaflutningi" er ný af nálinni í fjölmiðlaumræðu á Vesturlöndum og svo fullkomlega framandi höfundi textans að hann skýtur hana niður í fyrirvaranum.

Enda fór það svo að ekkert fjölmiðlaráð var skipað. Brennuvargurinn hélt áfram fyrri iðju að brenna upp fagmennsku og trúverðugleika þeirra fjölmiðla sem hann komst yfir.

Núna stendur hann yfir rústunum og biður griða.  

Tilbúinn til að fara niður fyrir 40%

Athugasemdir

[Guðrún (IP-tala skráð) 6.11.2008 kl. 21:19]

Ég hef enga trú á Jóni Ásgeiri nú frekar en áður að mínu mati er hann bara drullusokkur sem hefur fengið allt upp í hendurnar og ætti að sigla sem lengst á sinni skútu svo langt í burtu að við komum til með að gleyma að hann hafi verið til. Og forsetinn hann getur fengið far

[marco (IP-tala skráð) 6.11.2008 kl. 22:55]

Komdu með dæmi um misnotkun svokallaðra baugsmiðla.  Davíð, leiðtogi lífs þíns, sagði aðspurður um þetta:"Þetta sér hver maður, þetta sér hver maður".  Þú gætir kannski haldið áfram að endurtaka þetta fyrir hann.  Ekki verri en hver önnur mantra frá gúrúnum mikla.

[Helgi Jóhann Hauksson, 7.11.2008 kl. 01:30]

Gildir þetta um að „persónugera ekki vandann“ bara þegar bent er á ábyrgð höfuðsmiðs og arkitekt kerfisins, allt frá einkavæðingu til hruns, Davíðs Oddssonar?

[Karl (IP-tala skráð) 7.11.2008 kl. 10:03]

Misnotkun Baugsmiðla hefur verið algjörlega yfirgengileg.Þar hafa menn þjónað eigendum og látið öll viðmið í blaðamennsku lönd og leið.

Á íslandi eru engir frjálsir fjölmiðlar. Þeir eru allir í eigu auðmanna sem lagt hafa samfélagið í rúst með góðri aðstoð ákveðinna manna á borð við forseta Íslands.

Öll umræða um fjölmiðlun á íslandi snýst hins vegar um nauðsyn þess að haldið verði áfram á sömu braut! Þetta er ólýsanlega sorglegt. Nú þegar þjóðin þarf á öflugum og frjálsum fjölmiðlum að halda er sú staða komin upp að þeir hafa allir verið eyðilagðir. Hrikaleg staða á hrikalegum tímum.

[marco (IP-tala skráð) 7.11.2008 kl. 17:47]

"Misnotkun Baugsmiðla hefur verið algjörlega yfirgengileg.Þar hafa menn þjónað eigendum og látið öll viðmið í blaðamennsku lönd og leið".

Komdu með dæmi.

[marco (IP-tala skráð) 7.11.2008 kl. 22:40]

Engin dæmi?  Bara dylgjur og rógur í náhirðarstíl?

[marco (IP-tala skráð) 8.11.2008 kl. 00:33]

Koma strákar!  Kalli og Ruglupalli!  Hvar eru dæmin?

[Rýnir, 8.11.2008 kl. 13:28]

Sælt veri fólkið, 

það skyldi þó ekki vera að "marco" og "Socrates", sem koma oft á tíðum með æði "sérstakar" athugasemdir á vefnum, sé einn og sami maðurinn? Ef svo er ekki, þá virðast þeir þó a.m.k. vera með sama umbjóðanda, eins og Jón Axel Ólafsson kemst að orði í athugasemdakerfinu, á sinni vefsíðu.

“Ég fagna frjálsri umræðu um málefni dagsins og hvet þig [Socrates] til að bregðast við í hvert skipti sem þú sér greinar hér sem snerta þig og umbjóðendur þina.

Jón Axel Ólafsson, 6.11.2008 kl. 20:10”

“Socrates.  Meðan þú hefur hvorki kjark eða æru til að koma fram undir nafni, hef ég lítið við þig að ræða, en bendi á svar til þín frá HMV, sem tekið er af Eyjunni.  Það segir allt sem þarf að segja:

Eyjan.is - HMV
2. nóvember, 2008 - 20:42

Það þarf ekki að lesa skrif Sócratesar lengi til að átta sig á að þar er leigupenni Baugs/Jóns Ásgeirs á ferð. Fingraförin eru út um allt. Hann þekkir alla þætti málsins vel, er semsé betur inni í því en 99% þjóðarinnar - menn verða nú að vinna fyrir kaupinu sínu. Hann kemur með löng og vel rökstudd innlegg til varnar Jóni Ásgeir og Baugi. Hann situr á vaktinni á góðu kaupi.

ekkert mælir á móti því að menn komi til varnar Baugi í þessari umræðu. En þetta er bara svo klaufalega áberandi keyptur penni. Ættir að prófa næst að vera ekki svona vandvirkur.

Nú spái ég því að nafn Sócratesar hætti hvað úr hverju að sjást til varnar JÁJ, því leigupennum finnst örugglega slæmt að láta afhjúpa sig. En hann kemur aftur, bara með annað dulnefndi. Má ég stinga upp á nokkrum? Hvað með Neró, Brútus, Júdas eða Caligula? Nú eða bara Marta krónprinsessa?

Jón Axel Ólafsson, 7.11.2008 kl. 11:30”

 
Dæmi nú hver fyrir sig... 

Góðar kveðjur, 

[marco (IP-tala skráð) 8.11.2008 kl. 22:23]

Þekki til tveggja Sókratesa, annar var heimspekingur hinn læknir og knattspyrnumaður.  Það væri flott að fá borgað fyrir að rífast við ykkur spekingana en því miður er það ekki svo gott.  Ég hlýt þá að vera áhugabaugspenni.

En hvar eru dæmin?  Enn bara skítaslettur og tilraunir til að dæma menn úr leik með dylgjum og bulli.  Skítlegt eðli, gungu- og drusluháttur.

Enn og aftur!  Nonni náhirðarritari, Kalli og Ruglupalli!!  Hvar eru dæmin?

[Páll Vilhjálmsson, 8.11.2008 kl. 22:35]

Marco, ég hef skrifað greinar og blogg með dæmum um misnotkun Baugsmiðla. Ólafur Teitur hefur skrifað marga pistla og gefið út á bók, Andrés Magnússon hefur skrifað greinar og blogg um sama efni. Nafnleysi þitt veldur því að maður veit ekki við hvern maður er að tala. Þú getur ekki ætlast til að maður stökkvi til þegar nafnleysingi kemur með brýningu.

[marco (IP-tala skráð) 8.11.2008 kl. 22:56]

Já, já.  Gott og vel.  En gætirðu ekki komið bara með eitt konkret dæmi.

Þú verður að átta þig á því að skítaslettur af þessu tagi festast ekki við Jón Ásgeir eða Baug heldur við þá sem starfa og hafa starfað á þessum fjölmiðlum.

[Páll Vilhjálmsson, 8.11.2008 kl. 23:18]

Marco, Jón Ásgeir endurreisti Fréttablaðið úr gjaldþroti sumarið 2002. Gunnar Smári og Ragnar Tómasson voru leppar og nafn Jóns Ásgeirs/Baugs kom hvergi fram. Á þessum tíma var Baugur almenningshlutafélag og Jón Ásgeir forstjóri. Hann beindi auglýsingum frá almenningshlutafélaginu til Fréttablaðsins til að tryggja afkomu blaðsins.

Þann 1. mars 2003 birtist fyrsta fréttin í Fréttablaðinu þar sem Davíð Oddsson var sakaður um að hafa att lögreglunni á Baug. Birtir voru tölupóstar og fundargerðir Baugs sem áttu að renna stoðum undir ásaknir blaðsins. Á þessum tíma vissi enginn hver ætti Fréttablaðið, það var ekki viðurkennt opinberlega fyrr en sumarið 2003. Blaðamennskan sem var borin á borð standur ekki undir nafni: Hér var um kaldrifjaða blekkingu og lygar að ræða.

Fréttin 1. mars 2003 skilgreindi Fréttablaðið og þeir sem starfa á blaðinu og Baugsmiðlum vita að hverju þeir ganga.