FL group auglýsir örvæntingu sína

Væntingar áttu að skila hluthöfum milljarðahagnaði með sameiningu Geysir Green Energy og Reykjavik Energy Invest. Maðurinn á bakvið atburðarásina, Hannes Smárason forstjóri FL group, býr að reynslu og auðæfum sem verða til við væntingar allt frá því er hann starfaði hjá Íslenskri erfðagreiningu. Núna þegar borgarráð Reykjavíkur hefur hafnað sameiningunni væri skynsamlegast fyrir Geysir Green, þar sem Hannes og FL group eru ráðandi, að snúa sér að næsta væntingaverkefni. Hannes er hugmyndaríkur maður og ætti ekki að verða skotaskuld úr því að búa til nýja aðlaðandi fjárfestingakosti.

En nei, það á að þvinga opinbert fyrirtæki að taka þátt í ævintýrinu með góðu eða illu, samkvæmt fréttatilkynningu stjórnar Geysigrænna. Það er stórundarlegt að Hannes lesi ekki skriftina á veggnum: REI-málið er dautt. Það hefur kostað hallarbyltingu í Ráðhúsinu, pólitísk framtíð ungra stjórnmálamanna veltur á því að sameiningin gangi ekki fram og trúverðugleiki vinstriflokkanna er í húfi.

Með því að berja hausnum við steininn er Hannes að auglýsa örvæntingu FL group. Snjall sölumaður lætur það ekki henda sig, ef allt er með felldu.

 

Athugasemdir

[goði (IP-tala skráð) 2.11.2007 kl. 01:28]

Ef Hannes sér raunverulegt verðmæti í þessu verkefni, af hverju ætti hann ekki að berjast fyrir því? Það má vel vera að þetta hljómi eins og laxeldi í eyrum sumra, en ef það tekst að bora og virkja jarðhita á þann hátt sem væntingar standa til, skrá einkaleyfi á aðferðina, þá eru þeir búnir að leysa orkuþörf heimsins þar til einhver annar kemur með betri lausn og nær einkaleyfi á undan þeim. Ætti hann bara að segja "Jæja, þetta gekk ekki, prufum eitthvað nýtt", af því að nýr meirihluti er að vernda hagsmuni Reykvíkinga.

FL Group auglýsir örvæntingu sína? Ég held ekki að þeir svelti þótt þetta fari í vaskinn, en sorglegt er það.

[Agnar Guðmundsson (IP-tala skráð) 2.11.2007 kl. 08:37]

Mér finnst aðdáunarvert að maður eins og Hannes reyni að gera verðmæti úr þekkingu. Ef ekki væru menn eins og hann hérna þá væru lífsskilyrðin ekki eins góð hér á landi eins og þau í raun eru. Mér finnst þessi pistlaskrif bera vott um öfund í garð þess sem hefur gert okkur gott. Ekki þarf allt að heppnast, en okkur vantar menn með kjark og þor til að taka áhættur, ég tek ofan fyrir mönnum eins og Hannes.

[Ásgeir Kristinn Lárusson, 2.11.2007 kl. 08:47]

Í þessum skrifuðu orðum er Hannes Smárason að tilkynna 27 milljarða tap FL group á síðasta ársfjórðungi.  Rembingur Hannesar í REI málinu er því augljóslega ekki sprottinn af manngæsku einni saman og þeirri þörf, að hlýja mannkyninu...

[Gulli (IP-tala skráð) 2.11.2007 kl. 09:37]

Datt í hvort rétt sé að lánstraust fl-group erlendis sé þrotið.  Sá að þeir voru að reyna að véla 7 milljarða frá íslenskum lífeyrissjóðum í einhverju gerviútboði sem ég sá auglýst í vikunni.  Þetta eru sömu aðilar og "eiga" Glitnir ofl. fyrirtæki og ættu að hafa gott aðgengi að "ódýru" erlendu lánsfé en ekki rándýrum íslenskum peningum.  Hvaða svikamilla er í gangi. 
Mér er sagt að í dag sé tilboð til íslenkra banka 2,25% yfir libor vanti þeim aura erlendis ef þeir þá fái þá.  Ekki ódýrt eða hvað.  Taugaveiklun er komin upp hjá Hannesi sbr. hroka hans og mikilmennsku sem sjá mátti í sjónvarpinu í gærkvöldi. 

[Ljónsmakkinn (IP-tala skráð) 2.11.2007 kl. 13:07]

Talandi um öfund! Ég væri alveg til í að geta fjárfest í hlutabréfum fyrir hálfan milljarð eða einn og hálfan eins og Bjarni Ármannson. Þannig að ég fengi allan gróðann en svo kemur snilldin - skattgreiðendur í Reykjavík allt tapið.

 Ef þú Agnar villt að ég sé þakklátur fyrir svona menn þá máttu kalla mig öfundsjúkan. En ég held að ég sé réttsýnn en þú og þessi átrúnaðargoð þín siðspillt!!!

[Sigurður Viktor Úlfarsson, 2.11.2007 kl. 13:45]

Þetta eru mjög eðlileg viðbrögð hjá Hannesi.  Hann sagði réttilega að hann hefði gert samning sem samþykktur hefði verið á löglegan hátt af þar til gerðum aðilum sem hafa umboð til að taka þessa afstöðu, þ.e. stjórn OR og eigendafundur OR.  Þeir hefðu getað beðið með að samþykkja samninginn eða hafnað honum en þeir samþykktu hann.  Þar með öðlast hann gildi.

Hannes sagði því að það væru þrír kostir í stöðunni:  1) Standa við samninginn.   2) Gera nýjan samning.   3) Fara í mál við OR og krefjast þess að annað hvort verði staðið við samninginn eða greiddar skaðabætur.

Þetta eru mjög eðlileg viðbrögð.  Þegar þú gerir samninga við einhverja þá verður þú að geta treyst því að þeir ætli sér að efna samningana sem þeir gera og skrifa undir.  Það er fullkomlega eðlileg krafa.

[Friðrik Þór Guðmundsson, 2.11.2007 kl. 15:15]

Menn ættu að hafa í huga að án OR var GGE eiginlega ekki neitt. Í raun bara bisnessmenn að leita að skjótfengnum gróða (og út af fyrir sig í lagi með það). Það er ekkert að því að Glitnir hafi e.k. orkudeild með fyrrum ráðherra í fararbroddi, en annað mál þegar GGE (FL-group, Glitnir) þykjast hafa óheftan aðgang að, ef ekki eignarhald á, auðlindunum sem eru í sameign okkar. OR var í útrás og þurfti per se ekkert á GGE að halda. OR gat búið til verðmæti þarna, eins og á fleiri sviðum, án "aðstoðar" frá GGE. GGE er fjárfestingafyrirtæki, ekki orkufyrirtæki með áratuga þekkingu.

[B Ewing, 2.11.2007 kl. 15:22]

goði:

skrá einkaleyfi á aðferðina,

Ert þú eitthvað ga-ga?Það er ekki hægt að skrá einkaleyfi á alþekkta aðferð við að bora eftir heitu vatni.  Þetta er álíka gáfulegt og þú færir sjálfur eftir helgi og sæktiir um einkaleyfi á hvítu hveiti.  Bara ekki hægt.

Agnar:

Ég er algerlega ósammála með það að þessi skrif séu sett fram af öfund.  Þessi skrif þykja mér jarðbundin og skynsöm.  Það að eltast við hugsanleg þekkingarverðmæti í jarðvarma þykir mér bera vott um glópagullgröft af verstu gerð.  Þekkingin er til staðar í öllum heimsálfum.  Við erum kannski pínulítið klárari en það munar ekki það miklu á okkur og öðrum þjóðum í þessu efni að það gefi tilefni til að um "gífurleg" verðmæti séu að ganga okkur úr greipum. 

Við aðra þá verð ég að taka undir. 

Þarf að sjá viðtalið við Hannes áður en ég tjái mig um það, en ég verð að segja að mér þykir ekki spennandi að sjá opinbert fyrirtæki fara af stað í nýtt Línu.net ævintýri. 

[Hrúturinn (IP-tala skráð) 2.11.2007 kl. 16:17]

Sigurður Viktor, er að þitt álit að Hannes ákveði úrslitakosti? Rassasleikjur þínar dyljast ekki lengur. Samningar sem gerðir eru með sviksamlegum hætti hafa ekkert gildi. Ekki jarm um það meir...

[Ingibjörg Friðriksdóttir, 2.11.2007 kl. 22:01]

Ótrúlega spennandi (not)