Trump niðurlægir Evrópu með Gasa-friði

Bandaríkjaforseti tekur persónulega ábyrgð á framtíð Gasa og frelsar strandlengjuna undan stjórn hryðjuverkasamtakanna Hamas. Fjöldamorð Hamas í Ísrael fyrir tveim árum leiddu til innrásar Ísraela. 

Trump verður í forsæti friðarstjórnar og hefur sem erindreka Tony Blair fyrrum forsætisráðherra gamla nýlenduveldisins, Bretlands. Í friðaráætluninni er gert ráð fyrir alþjóðlegu friðargæsluliði með aðkomu Bandaríkjanna er taki við stjórn svæða undir stjórn Ísraelshers.

ESB-Evrópa er hvergi nefnd í friðaráætluninni. Síðustu vikur hafa sum Evrópuríki verðlaunað Hamas með viðurkenningu á palestínsku ríki. Utanríkisráherra Íslands, Þorgerður Katrín, fer offari í stuðningi við hryðjuverkasamtökin. Herská Evrópa kom í veg fyrir frið í Gasa líkt og hún gerir í Úkraínu. Evrópu hnignar á helstu mælikvarða siðmenningar; pólitískt, efnahagslega og siðferðilega.

Friðaráætlunin gerir ráð fyrir afvopnun Hamas og sakaruppgjöf til Hamas-félaga er játa friði. Gert er ráð fyrir alþjóðlegri uppbyggingu í Gasa er miði að velferð íbúanna og varanlegum friði við Ísrael.

Friðaráætlunin er í 20 liðum. Í framkvæmd verður Gasa nýlenda á forræði Bandaríkjanna til að byrja með. Í fyllingu tímans gæti heimastjórnin á vesturbakkanum fengið hlutverk á Gasa og yrði það vísir að sjálfsstjórnarríki araba er kenna sig við Palestínu. Fyrsti liður friðaráætlunarinnar tekur af öll tvímæli um forsendurnar. Þar segir að hvorki skuli þrífast á Gasa róttækni né hryðjuverkamenning er ógni grannríkjum. Innviðir til hryðjuverka s.s. neðanjarðargöng verða aflagðir. Hryggð verður í Evrópu yfir frjálsri Palestínu sem ekki er í færum að fremja þjóðarmorð á gyðingum.

Margur friðurinn hefur verið saminn á milli arabaríkjanna og gyðingaríkisins en iðulega farið í súginn. Kannski fer eins fyrir Trump-friði. Næstu dagar, að ekki sé sagt næstu klukkustundir, leiða í ljós hvort Hamas fallist á frið með því að afhenda gísla, látna sem lifandi, sem þeir tóku í barbaríið eftir fjöldamorðin 7. október 2023.

Trump fylgdi friðaráætluninni úr hlaði eins og 19du aldar nýlenduherra, með gulrót í einni hendi en barefli í hinni. Ef Hamas leggur ekki niður vopn veitir hann samþykki sitt til að Ísraelsher gangi milli bols og höfuðs villimönnunum. Hvort herkerlingar í norðri munu enn snökta fallna fjöldamorðingja og kalla þá saklaus börn leiðir tíminn í ljós.

Á bakvið tjöldin var unnið að undirbúningi friðaráætlunarinnar, einkum með fundum með helstu ríkjum araba. Viðvarandi stríðsástand frá stofnun Ísraelsríkis fyrir 77 árum stafar ekki síst af kergju arabaríkja sem neita að viðurkenna tilvist Ísraels. Fyrir fjöldamorð Hamas 7. október 2023 hafði nokkuð áunnist að fá lykilríki araba að viðurkenna tilvistarrétt Ísraels. Sáttmáli kenndur við Abraham, meintan sameiginlegan ættföður gyðinga og araba, hafði verið undirritaður milli Ísraels og nokkurra landa spámannsins. Íran þverneitaði sáttum og er helsti bakhjarl Hamas. Fjöldamorðin fyrir tveim árum voru til að koma í veg fyrir frekari frið í anda Abrahams. Ísraelskar og bandarískar herþotur gerðu Íran heimsókn og sprengdu farveg fyrir vitglóru í stjórnkerfi klerkanna - í það minnsta tímabundið.

Takist Trump hið ómögulega, að koma á varanlegum friði milli arabalanda og Ísrael fær hann ekki aðeins Nóbelsverðlaunin. Hans verður sæmdarheitið mesti friðarforseti Bandaríkjanna í meira en 100 ár, eða frá Woodrow Wilson, er kom á friði í Evrópustríðinu þar sem austurríski liðþjálfinn lærði til verka. Ekki klént af fasteignasala frá Nýju Jórvík.

Íslenskur vinkill á Gasa-þróun næstu daga, ómerkilegur á alþjóðavísu, vitanlega, en forvitnilegur fyrir innfædda er væntanleg friðarráðstefna hafnfirsku grátkonunnar. Þorgerður Katrín býður utanríkisráðherra heimastjórnar Palestínuaraba til landsins á friðarráðstefnu eftir tíu daga, segir RÚV. 

Friður í miðausturlöndum verður ekki gerður í Reykjavík. En það má bóka að Þorgerður Katrín leysi arabíska starfssystur sína út með milljónatugum ef ekki hundruðum milljóna króna. Þorgerður Katrín hefur fyrir sið að taka frá íslenskum góðgerðarsamtökum, t.d. Ljósinu, og færa útlendingum - 150 m.kr. til alþjóðahinsegin um daginn og í næstu viku fer summa til Palestínuaraba sem greiða morðingjum fyrir hvern dauðan gyðing. Viðreisn og Þorgerður Katrín láta skattfé Íslendinga í hendur útlendinga, kallast alþjóðahyggja og þykir fínt í erlendum kokteilboðum. 

 

Netanjahú samþykkir friðaráætlun Trumps