Drápið á Kirk og höfuð Þorgerðar Katrínar á stjaka

Eftir launmorðið á Charlie Kirk urðu engar óeirðir í bandarískum eða evrópskum stórborgum. Keppnislið í íþróttum krjúpa ekki á kné til að votta Kirk virðingu sína. Fyrir fimm árum var George Floyd drepinn i handtöku lögreglunnar í Minneapolis. Bylgja óeirða og ofbeldis reis í kjölfarið. Um víðan heim varð drápið á Floyd tilefni til óláta og andstyggðar.

Morðið á Kirk var pólitískt. Drápið á Floyd hafði ekkert með stjórnmál að gera. En það var gert pólitískt af vinstriöflum. 

Ólæti og andstyggð er sérgrein vinstrimanna. Á Austurvelli voru fyrir viku mótmæli til stuðnings Hamas-hryðjuverkasamtökunum er stjórna Gasa og frömdu fjöldamorð í Ísrael 7. október fyrir tveim árum. Í mótmælunum var á stjaka myndgert blóðugt höfuð Þorgerðar Katrínar utanríkisráðherra. Myndlíkingin er beint upp úr handbók Hamas sem eiga góða fólkið á Íslandi að bestu vinum.

Þorsteinn Pálsson fyrrverandi forsætisráðherra og flokksbróðir Þorgerðar Katrínar spyr i pistli hvers vegna þögn ríki um myrka myndverkið af höfði Þorgerðar Katrínar á stjaka. ,,Og Ríkisútvarpið spyr ekki," segir klumsa Þorsteinn.

RÚV er í þögulli afneitun vegna þess að Efstaleiti er í liði góða fólksins, rétt eins og Þorsteinn sjálfur og flokkurinn hans og Þorgerðar Katrínar, Viðreisn.

Góða fólkið, yfirleitt allt vinstrimenn, trúir að það hafi heilagan rétt til vandlætingar. Það hefur trúarlega sannfærinu um siðferðilega yfirburði. Þótt vandlætingin nái stigi viðbjóðs, morðið á Kirk og myndgert höfuð Þorgerðar Katrínar á stjaka, æmtir hvorki né skræmtir góða vinstrifólkið. Sumir, jafnvel, ganga svo langt að bera blak af óhæfunni, þótt flestir fela sig í þögninni.

Innan raða góða fólksins eru tveir hópar. Minnihlutinn, tilfallandi vill trúa lítill minnihluti, er ofstækisfólk sem á bágt andlega og sumt alvarlega veikt á geði. Stór meirihluti góða fólksins er safn af hugleysingjum með þörf fyrir vandlætingarfróun. Meirihlutinn lætur geðtæpa ofstækið, bæði innlent og aðkomið, ráða ferðinni.

Lítið dæmi um hugleysi góða fólksins er Egill Helgason. Eins og nærri má geta varð Snorra Mássyni þingmanni Miðflokksins hverft við morðinu á Charlie Kirk. Nýverið varð Snorri fyrir aðsúgi góða fólksins þegar hann sagði kynin aðeins tvö og ekki væri hægt að fæðast í röngum líkama. Snorri skrifaði færslu, sagði morðið á Kirk ,,svartan dag fyrir málfrelsi á vesturlöndum." Egill Helgason, RÚV-ari í áratugi, getur ekki á sér setið og fyllist vandlætingu gagnvart Snorra:

Játa að ég skil ekki þessa færslu hjá íslenskum alþingismanni. Við búum á Íslandi þar sem stjórnmál eru allt öðruvísi en í Bandaríkjunum. Við leyfum heldur ekki almenningi að ganga um með byssur. MAGA er okkur framandi hugmyndafræði. Hverju eigum við þá að verjast?

Egill transar sig yfir í valkvæða heimsku þegar hann þykist ekkert skilja samhengið. Öll transhugmyndafræðin á Íslandi er innflutt, mest frá Bandaríkjunum. Tilburðir hinsegin góða fólksins, með aðstoð íslensku lögreglunnar, að hefta málfrelsið hér á landi á sér fyrirmynd í Bretlandi. Stundum þykist Egill heimsborgari, vill Ísland í ESB, en á öðrum tíma sýgur hann þumalinn í hugmyndafræðilegri fósturstellingu og veit bara alls ekkert hvað gerist utan móðurkviðar.

Egill, líkt og RÚV, þegir um blóðugt höfuð Þorgerðar Katrínar á stjaka. Egill styggir ekki geðtæpa ofstækisliðið. Huglausi velmegunarvinstrimaðurinn velur sér viðfangsefni og vanskilning í samræmi við hjarðeðlið. Ofstækisliðið myrðir og setur konuhöfuð á stjaka. Egill vandlætari strýkur þeim geðtæpu meðhárs og er sakleysið uppmálað. 

Maðurinn sem vildi samræður drepinn

Athugasemdir

[Júlíus Valsson, 13.9.2025 kl. 09:49]

Hinn vestræni heimur býr nú við einhvers konar fjöldasturlun, sem mjög erfitt verður að vinda ofan af. Sjálfstæð hugsun er á hröðu undanhaldi á Islandi því okkur skortir fyrirmyndir. Eitt sinn var Sjálfstæðisflokkurinn máttarstólpinn og fyrirmynd í íslensku samfélagi, flokkur sem menn gátu treyst til að viðhalda of efla sjálfstæða og skynsama hugsun og til að standa vörð sjálfstæði Íslands og vestræna menningu og samvinnu. Með tilkomu BB, ÞKRG o.fl. evrópusinna, sem laumuðu sér inn í flokksforystuna hvarf þessi áður trausta fyrirmynd með öllu. Hægri menn á Íslandi eru nú illa haldnir af áðurnefndri fjöldasturlun því enginn þorir lengur að tjá sig af ótta við óttann. Ísland þarf því nýtt og óhrætt stjórnmálaafl. Áfram frjálst Ísland!

[Grímur Kjartansson, 13.9.2025 kl. 11:23]

Margir reyna afvegaleiða umræðuna og fara tala um byssueignir fólks í USA

Það eru margar byssur til á Íslandi og hlutfalslega miðað við fólksfjölda þa´eru við mjög ofarlega í byssumorðum