Karlar sem fæða börn, hatursorðræða og lögregluríki

Er hatursorðræða að segja konur einar geti átt börn en ekki karlar? Já, segja Samtökin 78 sem kærðu Eld Smára Kristinsson til lögreglu fyrir eftirfarandi:

Alþingi heldur að karlmenn geti fætt börn. Þessi lög eru í bága við bæði barnasáttmála SÞ og í bága við úrskurð Mannréttindadómstóls Evrópu er varðar rétt barns til þess að þekkja líffræðilegan uppruna sinn. Manneskjur sem fæða börn kallast konur. Konur sem fæða börn eru alltaf líffræðilegar mæður barna sinna. Alveg óháð hvað vanstillt Alþingi segir.

Eldur skrifaði athugasemdina fyrir rúmu ári. Sumir þingmenn eru áhugasamir um þann líffræðilega ómöguleika að karlar fæði börn. Ef þessir þingmenn fengju að ráða yrði skrifað í lög að karlar hefðu leg og ættu rétt á legskoðun á kvensjúkdómadeildum sjúkrahúsa. Læknar sem ekki finna móðurlíf í karli, sem ímyndar sér að hafa það, missi lækningaleyfið.

Eldur Smári hefur verið kallaður í lögregluyfirheyrslu vegna kærunnar og á yfir höfði sér opinbera ákæru.

Karlar sem þykjast konur, með forskeytinu trans, færa sig upp á skaftið. Þeir ógna konum í íþróttum með líkamsburðum sínum, yfirtaka kvennasalerni og búningsklefa kvenna með þeim rökum að í huganum séu þeir konur og svo vilja þeir líka vera mæður. Almenningur skal játast sérviskunni, annað sé mismunun gagnvart jaðarsettum minnihlutahópi sem á voða bágt.

Víst eru bágindi fyrir hendi, en þau eru öll í huga karla sem trúa að þeir geti verið mæður. Þingmenn geta sett lög og lögregla ákært en lífsins staðreyndir standa óhaggaðar. Kynin eru tvö, karlar eru ekki konur og aðeins konur fæða börn.

Snorri Másson þingmaður Miðflokksins gerði haturskæru Samtakanna 78 á hendur Eldi Smára að umtalsefni í Morgunblaðsgrein og sagði m.a.

Þar skiptir máli að sá sem leggur fram kæruna eru Samtökin 78, sem njóta verulegs fjárstuðnings ríkisvaldsins [...] En samtök sem njóta eins ríks fjárstuðnings frá ríkisvaldinu verða að gæta sérstaklega að ábyrgð sinni og blanda ekki saman lögmætum viðhorfum og meintri hatursorðræðu. Þar eru stjórnvöld komin ískyggilega nálægt beinum tilraunum til að refsa borgurum fyrir tjáningu. Ef því er leyft að viðgangast getur almenningur ekki dregið aðrar ályktanir en að hin margumtalaða hatursorðræða sé ekkert annað en bara orðræða sem stjórnvöld hata.

Snorri bendir á hið augljósa. Á meðan Samtökin 78 fá fúlgur fjár úr ríkissjóði eru aðgerðir samtakanna til að kæfa skoðanafrelsið á Íslandi niðurgreiddar af ríkinu. Þingmenn Samfylkingar og Viðreisnar eru fremstir í flokki þeirra sem styðja Samtökin 78 að siga lögreglunni á þá sem gagnrýna lífsskoðunarfélagið. Samfylking og Viðreisn sitja í ríkisstjórn, fara með ráðherravald. Hittir Snorri naglann á höfuðið þegar hann segir gagnrýni á Samtökin 78 ,,orðræðu sem stjórnvöld hata"? Djúpríkið er meira og minna í höndum vinstrimanna.

Niðurlag greinar Snorra ætti að vekja umhugsun um stöðu tjáningarfrelsis hér á landi og hversu stutt er í vinstriróttækt lögregluríki:

Tjáningarfrelsi er meginþáttur í frjálsu samfélagi en nútíminn hefur útvegað nýjar og ísmeygilegar leiðir til að grafa undan því. Í því ljósi þarf greinilega að árétta að sannleikurinn verður ekki til hjá ríkisvaldinu og það er ekki hlutverk þess að framfylgja honum. Það er síðan annar misskilningur að stuðlað verði að félagslegum framförum með því að neyða fólk með lögregluvaldi til að samþykkja hugmyndir sem misbjóða skynsemi þess og lífssýn. Slíkt kerfi hefur aldrei gefið góða raun.

 

Athugasemdir

[Helga Dögg Sverrisdóttir, 7.7.2025 kl. 09:53]

Svissneska kvennalandsliðið spilaði æfingaleik við U-15 drengjalandsliðið. Stelpurnar töpuðu 7-1. Við töpuðum svo fyrir Sviss sem er annað mál. 

Mér finnst það koma mjög glöggt fram í þessum æfingaleik hve mikill munur er á karl- og kvenkyni sem margir afneita, vegna trans-hugmyndafræðinnar.

Vegna ólíkra líkamsbygginga kynjanna ná stúlkur aldrei því sem drengir geta, t.d. hraða, styrk og þol.

Það er enn alvarlegra að þessum boðskap sé komið inn í leik- og grunnskóla. Ég spyr, eru kennarar skaðavaldurinn þar?

Svissneska kvennaliðið í fótbolta, góðar eða lélegar! - formannslif.blog.is