Ísrael, Íran og heimsfriðurinn

Tvö þúsund kílómetrar eru á milli Ísrael og Íran. Á milli landanna eru Jórdanía og Írak. Af því leiðir er hernaður á milli Ísrael og Íran lofthernaður, háður með flugvélum og eldflaugum en að litlu leyti drónum. Enginn landhernaður verður á milli landanna. 

Í upphafi átakanna var talið að Íran ætti um tvö þúsund eldflaugar með drægni til Ísrael. Þeir eiga eftir um 1700 en líða fyrir skort á sérhæfum vélbúnaði sem nauðsynlegur er til að skjóta á loft eldflaugunum. Loftvarnir í Ísrael telja sig ná 95 prósent árangri. Fimm prósent af 300 flaugum eru fimmtán. Mannfall er í Ísrael af völdum eldflauganna sem komast framhjá loftvörnum. Svartsýnir spáðu margfalt meiri skaða á mannslífum og mannvirkjum en hingað til hefur raungerst. 

Í fyrsta áfanga stríðsins tókst Ísraelum að eyðileggja lofvarnarkerfi Íran. Ísrael ræður lofthelgi Íran og getur sent bylgju eftir bylgju flugvéla á valin skotmörk. Munurinn er sá að Ísraelar leita uppi hernaðarleg skotmörk á meðan klerkarnir í Íran láta sig engu skipta hvar flaugar þeirra lenda, eins lengi og þær springa á ísraelsku landi.

Yfirlýst markmið Ísraela er að koma í veg fyrir að Íran eignist kjarnorkuvopn. Hliðarmarkmið er að búa í haginn að klerkastjórninni verði steypt af stóli - af almenningi. Yfirlýst markmið Íran er að gjöreyða Ísrael. Klerkastjórnin í Tehran segir Ísrael ,,litla Satan" og Bandaríkin ,,stóra Satan." Trúarlegt alræði íslam yfir heimsbyggðinni er lokamarkmiðið. 

Eins og sakir standa er ólíklegt að árás Ísraela á Íran leiði til stigmögnunar. Íranar eru persar, ekki arabar, og aðhyllast shíta-útgáfu íslam á meðan arabar eru flestir súnní-múslímar. Kalt stríð er á milli Sádi-Arabíu og Íran, tveggja forysturíkja í heimshlutanum. Arabaheimurinn hefur ekki risið upp á afturlappirnar til stuðnings Íran. Rússar og Kínverjar fordæma árás Ísraels en láta það nægja. Eftirspurn eftir trúarlegri og veraldlegri leiðsögn Íran er takmörkuð.

Riði klerkastjórnin í Tehran til falls eftir árásir Ísraela er aldrei að vita hvaða stefnu miðausturlönd taka. Íran er herskáasti óvinur Ísraels og meginríki í heimshlutanum, telur 90 milljónir íbúa. Upplausn og óreiða í jafn stóru ríki er vís með að hafa áhrif út fyrir landamærin. Enn sem komið er ræður Íran ekki yfir kjarnorkuvopnum. Það eru góðu fréttirnar.

 

 

 

 

Netanjahú: Munu gjalda dýru verði

Athugasemdir

[Ragnhildur Kolka, 16.6.2025 kl. 09:03]

Enn eitt proxy-stríð Bandaríkjanna. Þau enda öll í kaos og hver segir að Íranir séu að koma sér upp kjarnavopnum? Jú BNA, sem kyrjuðu sönginn um MOD fyrir innrásina í Íraq. Við höfum heyrt sönginn í minnst 15 ár að Íran sé alveg á næsta leiti að koma sér upp kjarnavopnum. Ef svo hefði verið væru þeir löngu búnir að því.

Þú verður að fyrirgefa þótt ég sé skeptísk á þessar yfirlýsingar Ísraela. Heimsyfirráðastefnan liggur ekki síður hjá Kananum sem nýtir sér alltaf aðra til að koma vilja sínum fram. Rétt eins og ESB.

það er auðvelt að stjórna löndum þar sem einhugur ríkir ekki. Sjáðu bara hvað er að gerast hér á landi.

[Ragnhildur Kolka, 16.6.2025 kl. 13:53]

Nu brást mér bogalistin - auðvitað átti þetta að vera WMD (weapons of mass destruction) en ekki MOD.