Sjálfstæðisflokkur tekur ekki eitrað peð Kristrúnar

Kristrún forsætis og stjórnarmeirihlutinn lögðu gildru fyrir Sjálfstæðisflokkinn með því að setja bók 35 á dagskrá þingsins en taka öll önnur mál af dagskrá. Á meðan Sjálfstæðisflokkurinn var í stjórn vildi a.m.k. hluti þingflokksins samþykkja bókun 35. Við núverandi kringumstæður yrði það pólitískt sjálfsmorð fyrir Sjálfstæðisflokkinn. Ástæðan er tvöfeldni EES-samstarfsins í íslenskum stjórnmálum.

Bókun 35 snýst um að ESB-lög, sem koma inn í EES-samninginn, skáki út íslenskum lögum. Lagalega álitamálið er hvort bókun 35 samrýmist stjórnarskránni eða ekki. Sterk rök, sjá grein Hjartar J. Guðmundssonar, eru fyrir þeirri túlkun að án stjórnarskrárbreytinga sé ekki hægt að samþykkja bókun 35. Heimssýn tekur einnig málið fyrir í pistli.

Pólitíska hliðin snýr að EES-samningunum í heild. Á sínum tíma var EES-samningurinn seldur þjóðinni á þeim forsendum að við þyrftum ekki að ganga í Evrópusambandið, EES væri nóg fyrir okkar hagsmuni. Andstæðingar ESB-aðildar, sumir hverjir, styðja EES-samninginn á þessum forsendum. Aðrir, tilfallandi þar á meðal, vilja EES-samstarfið feigt og gera í staðinn tvíhliða samning við Evrópusambandið.

Eins og nærri má geta tala ESB-sinnar um EES-samninginn á öðrum nótum en andstæðingar aðildar. Í máli ESB-sinna kemur oft fram að EES sé aukaaðild að ESB - við ættum að stíga skrefið til fulls og gerast fullgildir aðilar að Evrópusambandinu.

Tvöfeldni EES-samningsins í íslenskum stjórnmálum felur í sér að þegar starfandi er ríkisstjórnarmeirihluti sem stefnir ekki á ESB-aðild er umræðan um EES-samstarfið hófstillt. En þegar stjórnarmeirihlutinn, Kristrún og félagar, stefnir á ESB-aðild verður umræðan sjálfkrafa hatrammari, enda meira í húfi. Samþykkt bókunar 35 undir slíkum kringumstæðum er að búa í haginn fyrir ESB-aðild. Þetta þýðir að þingmenn Sjálfstæðisflokksins geta leyft sér umburðalyndi gagnvart EES-samstarfinu þegar þeir eru í stjórn en alls ekki í stjórnarandstöðu.

Vilhjálmur Árnason þingflokksformaður Sjálfstæðisflokksins veit hvað klukkan slær þegar Kristrún býður upp á eitraða peðið sem er bókun 35. Taki móðurflokkur íslenskra stjórnmála peðsfórninni er skákin töpuð Valhallarmönnum.

Peðsfórnin er augljós brella sem auðvelt er að sniðganga án áhættu. Útlendingastjórninni verður ekki kápan úr klæðinu að saka sjálfstæðismenn um tvískinnung, hafa eina stefnu í stjórn og aðra í stjórnarandstöðu. Áróður ESB-sinna um að án EES-samstarfsins einangrist Ísland er bitlaust vopn. Viðhorf landsmanna er óðum að snúast í þá átt að við séum of mikið tengd umheiminum en ekki of lítið. Nú falla öll vötn til Dýrafjarðar. Brussel-farvegurinn, sem aldrei var meira en lækjarspræna, er uppþornaður.

Tilboði ESB-sinna, um að skipta um þjóð í landinu, með opnum landamærum og útlenskum lögum, hefur verið hafnað. Það er mergurinn málsins.

Ekkert nýtt, óvænt eða sérstakt

Athugasemdir

[Arnar Þór Jónsson, 8.6.2025 kl. 10:42]

Sæll Páll. Þingmenn XD hafa mjálmað eitthvað í fjölmiðlum en enga andspyrnu veitt á þinginu. Það er staðreynd sem blasir við á vef Alþingis. Það er leitt frá því að segja þingmenn og ráðherrar XD hafa flutt verstu öfugmælaræður um þetta mál sem fluttar hafa verið í sögu þingflokksins frá 1929. Sem hörmulegt dæmi er hér ræða formanns XD sem flutt var í fyrradag:

https://www.althingi.is/altext/raeda/156/rad20250606T215859.html Sama má segja um framlag Hildar Sverrisdóttur þingflokksformanns í gær. Til samanburðar er hér greining Jóns Steinars Gunnlaugssonar sem hann birti á FB-vegg sínum fyrr í morgun:   "Nú er deilt á Alþingi um lögleiðingu á bókun 35, sem felur í sér breytingu á lögum nr. 2/1993 um Evrópska efnahagssvæðið. Texti frumvarpsins um lögleiðinguna hljóðar svo:

"Ef skýrt og óskilyrt lagaákvæði sem réttilega innleiðir skuldbindingu samkvæmt EES-samningnum er ósamrýmanlegt öðru almennu lagaákvæði skal hið fyrrnefnda ganga framar, nema Alþingi hafi mælt fyrir um annað. Sama á við um skuldbindingar sem eru innleiddar með stjórnvaldsfyrirmælum ef þau eru ósamrýmanleg öðrum stjórnvaldsfyrirmælum."

Í þessu felast fyrirmæli um að eldri reglur skv. EES-samningnum skuli ganga fyrir yngri lögum sem Alþingi setur ef ekki er efnislegt samræmi á milli. Þetta felur það í sér að löggjafarvald Alþingis er takmarkað, því að ný sett lög á Alþingi víkja auðvitað ævinlega til hliðar eða fella niður eldri lagareglur ef efnislegt ósamræmi er til staðar. Í reynd er því lagasetningarvald Alþingis takmarkað að þessu leyti án þess að stjórnarskráin heimili slíkt.

Ekki verður annað séð en að sú skipan sem felst í þessu frumvarpi standist ekki nema stjórnarskránni sé fyrst breytt og í hana sett ákvæði sem heimilar þetta. Alþingismönnum er skylt að haga störfum sínum að lagasetningu samkvæmt þeim heimildum sem stjórnarskráin veitir. Þess vegna hefur Alþingi ekki stjórnskipulega heimild til að lögfesta þetta frumvarp."