Eitruð karlmennska: karlar í kvennafótbolta

Sé til eitruð karlmennska - hugtakið er á reiki - er eitraðasta útgáfa hennar karl sem segist kona og vill keppa við konur í íþróttum. Líkamlegir yfirburðir karla gagnvart konum koma hvað skýrast fram í íþróttum.

Í viðtengdri frétt eru þau tíðindi að karlar sem segjast konur geti ekki lengur keppt í kvennadeildum enska fótboltans. Bannið kemur í kjölfar úrskurðar hæstaréttar Bretlands um að konur eru þær einar sem fæðast með kvenlíkama. Umbreyttir karlar verða aldrei konur.

Eitt er að karl segist kona, toppstykkið er misvel skrúfað á fólk, allt annað og verra er þegar karlinn hyggst neyta líkamlegra yfirburða og skráir sig til leiks í kvennaíþrótt. Það heitir að svindla.

Konur sem etja kappi við karla í íþróttum eru dæmdar til að tapa, nánast undantekningalaust. Jafnvel skákíþróttin, sem reynir lítt á líkamlegt atgervi, skiptir iðkendum í karla- og kvennaflokka. Enda eru fá ef nokkur dæmi um að kona krefjist að komast í karlaflokk íþrótta.

Karl sem keppir við konur er í allt annarri og betri stöðu og má bóka velgengni fyrirfram, hirðir sæti kvenna í liðsíþrótt og kemst á pallinn í einstaklingsíþrótt. Þeim tilvikum fjölgar er karlar níðist á konum með trans að vopni. Eitraðasta karlmennskan er smitandi.

Transhugmyndafræðin styður svindlið. Samtökin 78 hér á landi krefjast þess að karlar fái að keppa í kvennaíþróttum. Eina skilyrðið er að karlinn segist transkona. Trans er hugarástand, ekki hlutlægur eða líkamlegur veruleiki.

Nú á að heita svo að Íslandi sé stjórnað af konum. Valdakonurnar, t.d. ráðherrar valkyrjustjórnarinnar, keppast við að þegja þegar kemur að líkamlegum körlum í kvennaíþróttum. Valdakonurnar þora ekki að standa með kynsystrum sínum. Hugleysi, eins og trans, er hugarástand - og er smitandi líkt og eitraðasta karlmennskan. 

Trans konur mega ekki spila í kvennaflokki

Athugasemdir

[Baldur Gunnarsson, 2.5.2025 kl. 10:32]

Að karl þykist vera kona og vilji sigra konur í íþróttum, er blettur á heiðri karlmennskunnar. 

[Sigurður I B Guðmundsson, 2.5.2025 kl. 11:41]

Biskup Íslands er kona og hvað segir hún um þetta??!

[Geir Ágústsson, 3.5.2025 kl. 12:10]

Siðrof er ekki óþekkt þegar menningarheimar með glæsta sögu eru á fallandi fæti, hænufeti frá því að útrýma sér. Þeir telja sig yfir guði sína hafna og öll þau lögmál siðferðis sem forfeður þeirra héldu á lofti. 

Núna er allt undirorpið tilfinningum fólks, sannleikurinn er bara sannleikur hvers og eins. Kona er manneskja sem skilgreinir sig sem konu, ekki einstaklingur með tiltekna litninga og líffæragerð.

Auðvitað má fólk alveg kalla sig hvað sem er - karlmaður fastur í líkama 6 ára stúlku eða hvað sem er - en slíkur hugarheimur hvers og eins hefur ekkert með raunveruleikann að gera og á ekki að veita aðgang né forréttindi. 

Siðrofið er ekki bara eitthvað sem raskar daglegu lífi okkar. Það er til merkis um brostnar undirstöður heillar menningar.