Kristrún braut trúnað

Kristrún forsætisráðherra var í gærkvöld á flótta undan fjölmiðlum vegna afsagnar Ásthildar Lóu barnamálaráðherra. Forsætisráðuneytið lak trúnaðarupplýsingum úr ráðuneytinu til Ásthildar Lóu sem raskaði heimilisfriði konu út í bæ sem bjó yfir upplýsingum er ekki þoldu dagsins ljós.

Leki á trúnaðarupplýsingum úr forsætisráðuneytinu stórskaðar trúverðugleika Kristrúnar sem forsætisráðherra. Enginn vafi er á að lekinn var gerður með vitund og vilja forsætisráðherra. Upplýsingarnar lágu í ráðuneytinu í nokkra daga áður en þeim var lekið af yfirlögðu ráði. Aðstoðarmenn leika ekki einleik í málum sem þessum.

Kristrún er æðsti handhafi framkvæmdavaldsins. Stóralvarlegt er að aðilar sem eiga samskipti við forsætisráðuneytið í trúnaði geti ekki treyst ráðuneytinu.

Tilgangurinn með lekanum var að gefa Ásthildi Lóu tækifæri til að þagga niður málið. Ásthildur Lóa mætti óboðinn á ókunnugt heimili til að freista þess að kæfa óþægilegt mál úr fortíðinni. Þetta segir Ásthildur Lóa í viðtali við RÚV.

Almennir borgarar sem eiga erindi við forsætisráðuneytið til að upplýsa málefni, sem þeir telja brýn, eiga ekki að þurfa þola trúnaðarbrest forsætisráðherra. Kristrún sýnir að henni er ekki treystandi. 

Ásthildur Lóa sagði af sér. Hvað gerir Kristrún?

Hafna því að erindið hafi lekið úr ráðuneytinu

Athugasemdir

[Dominus Sanctus., 21.3.2025 kl. 08:35]

 "Forsætisráðuneytið lak trúnaðarupplýsingum úr ráðuneytinu til Ásthildar Lóu".

Er það ekki bara eðlilegur farvegur að forsætisráðuneytið setji sig í samband við þann sem að málið varðar tengt þessum trúnaðarmálum

svo að hægt sé að ræða málin þ.e. Ásthildi í þessu sambandi?

[Ragnhildur Kolka, 21.3.2025 kl. 09:03]

Það sem einkennir öll málin sem komið hafa til almennrar umræðu hjá þessum lukkuriddurum, sem kalla sig Flokk fólksins, er skortur á prinsippum, þ.e. siðferðisvitund. Að selja ömmu sína vefst ekki fyrir þeim og var líklega ástæðan fyrir því að esb flokkarnir völdu Ff til samstarfs.

[Grímur Kjartansson, 21.3.2025 kl. 09:38]

Vissir blaðamenn fengu afhentar sannanir um að aðstoðarmaður Hönnu Birnu hefði lekið upplýsingum um hælisleitanda

Þeir voru sniðugir, þögðu um heimildina en héldu málinu gangandi lengi og fengu loks verðlaun eftir að Hanna Birna sagði af sér - því hennar ábyrgð á aðstoðarmanninum var mun meira en á öllu öðru starfsfólki ráðuneytisins