Stefán kaupir þögn Helga Seljan

Helgi Seljan er atvinnulaus síðan hann hætti á Heimildinni fyrir fimm mánuðum. Fyrir skemmstu mætti hann í settið hjá vini sínum Gísla Marteini og sagðist í sjálfboðavinnu hjálpa fíklum að sprauta sig með hreinum nálum. Sjálfboðavinna af þessum toga er gjarnan stunduð af þeim sem hafa brunnið út og eru í endurhæfingu.

Endurhæfing Helga gengur það vel að nú er hann kominn í afleysingastarf á RÚV. Frá RÚV var Helgi látinn fara áramótin 2021/2022. Lögreglurannsókn var hafin í byrlunar- og símamálinu. Stefán Eiríksson útvarpsstjóri varð að losa sig við þá sem voru í sambandi við andlega veika konu sem byrlaði Páli skipstjóra Steingrímssyni, stal síma hans og afhenti Þóru Arnórsdóttur ritstjóra Kveiks og yfirmanns Helga Seljan.

Sími skipstjórans var afritaður á Efstaleiti á Samsung síma RÚV með númerið 680 2140. Útvarpsstjóri staðfestir að símanúmerið er á RÚV en neitar að upplýsa hvar síminn sé niðurkominn. Ekkert hefur spurst til símans síðan sumarið 2021.

Afritað eintak af síma Páls skipstjóra var til á RÚV frá og með 4. maí 2021. En RÚV birti enga frétt með vísun í gögn úr fórum skipstjórans. Þóra og Helgi á ritstjórn Kveiks ákváðu að ekki væri óhætt að RÚV birti fréttina sem þau höfðu undir höndum. Hvers vegna? Jú, það er ólöglegt að afrita síma í heimildarleysi. Þau vissu að síminn var skipstjórans, eiginkona hans afhenti þeim símann. Þegar eiginkonan mætti eftir hádegi 4. maí 2021 á Efstaleiti var til reiðu samskonar sími og skipstjórans, af Samsung gerð, til að afritun mætti fara fram. Hvernig vissu Þóra og Helgi að sími skipstjórans væri af gerðinni Samsung?

Fréttin sem var unnin á RÚV birtist í tveim útgáfum á Stundinni og Kjarnanum, samtímis að morgni dags þann 21. maí 2021, samkvæmt skipulagi sem ákveðið var á Efstaleiti. Skráður höfundur fréttarinnar á Stundinni er Aðalsteinn Kjartansson, sem hafði verið samstarfsmaður Þóru og Helga á Kveik þangað til þrem dögum fyrir byrlun skipstjórans. Fréttin í Kjarnanum er höfundarmerkt Þórði Snæ Júlíussyni og Arnari Þór Ingólfssyni, sem báðir eru nýorðnir starfsmenn þingflokks Samfylkingar. Verður fróðlegt að sjá hvernig þingmenn Samfylkingar í stjórnskipunar- og eftirlitsnefnd alþingis taka á erindi Páls skipstjóra.

Helgi Seljan var í sambandi við eiginkonu skipstjórans. Fyrsta yfirheyrslan í lögreglurannsókninni fór fram 5. október 2021. Tíu dögum síðar var Helgi mættur í settið hjá vini sínum Gísla Marteini. Þeir eru jú félagar og þegar mikið liggur við gefur Gísli Marteinn vinum sínum vettvang til að vinna sér inn prik.

Helgi bar sig aumlega, kvaðst ,,ekki sterkur á geði" í sófanum hjá Gísla Marteini. Verðlaunablaðamaðurinn sagðist ofsóttur af norðlenskri útgerð án þess að útskýra í hverju þær fælust. Sumir norðan heiða myndu segja að þar sneri Helgi sannleikanum á haus. Allt frá árinu 2012, með Seðlabankamálinu, til Namibíumálsins 2019 og skæruliðamálsins 2021 er það Helgi sem eltir og ofsækir með RÚV sem bakhjarl. Heimildirnar sem verðlaunablaðamaðurinn teflir fram eru fölsuð gögn, ógæfumaður og vanheil kona. Ríkisfjölmiðillinn er ekki vandur að virðingu sinni þegar kemur að klappa Samherjasteininn.

Tilgangurinn með sviðsetningu RÚV í þætti Gísla Marteins fyrir hálfu fjórða ári var að afla Kveiks-manninum samúðar. Eiginkona skipstjórans vorkenndi Helga eftir snöktið á skjánum og skrifaði Þóru ritstjóra Kveiks tölvupóst, sem er að finna í rannsóknagögnum lögreglu. Tölvupósturinn er svohljóðandi:

Sæl Þóra, mér sýnist Helga ekki veita af aðstoð. Er ekki bara kominn til til að ég afhjúpi mig. Ég hef hvor eð er ekki neitt að missa. Kveðja XXX (nafn fellt út af pv)

Ekki er að finna í gögnum lögreglu svar Þóru. Líkt og mörgum öðrum stafrænum sporum hefur svarinu verið eytt. En það liggur fyrir tilboð um játningu. Blaðamenn vissu vitanlega að játning fæli í sér afhjúpun á þeim sjálfum. Þeir hafa beðið konuna lengstra orða að segja sem minnst.

Nú er Helgi Seljan á ný mættur til starfa á RÚV. Örorkubætur gefa ekki mikið í aðra hönd, starfstilboðum hefur ekki rignt yfir verðlaunablaðamanninn. Ráðningin fór ekki fram án vitundar og vilja Stefáns Eiríkssonar útvarpsstjóra. RÚV skilar tapi þrátt fyrir sex milljarða framlag frá ríkissjóði en það er alltaf til peningur að bera fé á mann og annan.

Útvarpsstjóri veit að arki lykilvitni um göturnar á bótum er alltaf hætta á að einn góðan veðurdag gefi það sig fram við lögreglu og lýsi sig tilbúið í skýrslutöku um atburðina vorið 2021. Stefán útvarpsstjóri á starf sitt undir og orðspor að byrlunar- og símamálið verði aldrei upplýst.

Helgi Seljan á Glæpaleiti hentar útvarpsstjóra prýðilega. Sá á hund sem elur.

Helgi Seljan snýr aftur til RÚV

Athugasemdir

[Ingólfur Sigurðsson, 5.3.2025 kl. 14:03]

Hér áður fyrr var talað um feðraveldið og samtryggingu karla til að halda völdum. Í ljósi þeirra upplýsinga sem hér koma fram um konu skipstjórans, að hún er trú málstað femínista og þessum aðgerðum, manndrápstilraun og pólitískum áróðri öfgavinstris má tala um mæðraveldið og samtryggingu kvenna í nútímanum.

Þær eru ekki skárri en það sem þær gagnrýndu og hafa nú völdin sem var eftir sózt, og er þó áfram verið að kveða við sama tón - baráttan er ekki unnin segja þær.

En hér er allt vel rökstutt og framsett í þessum pistli. Það er ekki aðeins að meirihluti starfsmanna sé meðvirkur á RÚV, og ætti að skipta út því fólki, heldur eru ráðherrar linir að taka á þessu.

Þetta hefur vakið athygli erlendis sem dæmi um spillingu. Öfgavinstriblaðamennirnir sem gerðu árás á Sigmund Davíð 2016 voru studdir af sænskum jafnaðarfasistum, þeim sömu og hafa komið allri Svíþjóð í glæpaöldu og hnignun algjöra.

Nú er þannig öfgapólitík að fá gagnrýni og aðhald, frá "öfgahægrinu", Vance, Trump og fleiri.

Sigurinn er ekki unninn, sannleikanum snúið á hvolf hjá háværum minnihluta sem hefur ítök víða í stjórnkerfi.

Svívirðilegt hvernig konur standa saman í óréttlátum málum, eins og kona skipstjórans. Pólitík ræður meira en hjónaást eða annað gott og jákvætt.

Gjaldfelling femínismans.

[Grímur Kjartansson, 5.3.2025 kl. 14:54]

RUV sér þó um að flytja okkur nýjustu og ferskust "fréttinar" án geymslubragðs né endurnýtingar

https://www.ruv.is/frettir/erlent/2025-03-05-ogurstund-a-leidtogafundi-esb-a-morgun-438160

[Kristinn Bjarnason, 5.3.2025 kl. 17:12]

Það er óþolandi fyrir stóran hluta þjóðarinnar að vera neyddir til að greiða nefskattinn fyrir ömurlegan áróður og lygar svo ég tali ekki um hreinræktaða glæpamennsku.

Bara svo því sé haldið til haga þá er þetta í boði Þorgerðar Katrínar.