Tilboð Rússa: Nató-ríki fái hluta Úkraínu

Rússar gerðu Nató óformlegt tilboð í víkunni um skiptingu Úkraínu. Nató-ríkin Pólland, Rúmenina og Ungverjaland fái stór landssvæði í vestri og suðri, Rússland alla Austur-Úkraínu og allt land við Svartahaf, Odessu-borg meðtalin. Garðaríki hið forna yrði endurreist með Kænugarð sem höfuðborg nærsveita; héti Úkraína en væri í raun smáríki á borð við Lúxemborg.

Medvedev fyrrum Rússlandsforseti og einn af æðstu Kremlarherrum á eftir Pútín forseta kynnti óformlega tilboðið og birti landakort af nýrri skipan mála.

Tilboðið fær litla sem enga umfjöllun á vesturlöndum. Vestrænir fjölmiðlar gera enn ráð fyrir að Selenskí forseti marséri til Moskvu og leggi Pútín að velli. Þeir sem fylgjast með vígvellinum vita aftur að klukkan glymur Kænugarði en ekki Kreml.

Rússar hafa í austurhéruðum Úkraínu brotist í gegnum aðalvarnir Úkraínuhers. Á næstunni má búast við að æ stærri landsvæði falli Rússum í skaut. Fyrir skemmstu bjuggust flestir við að Rússar létu af sókn sinni er þeir kæmu að Dnípró-ánni sem sker Úkraínu í tvennt. Kort Medvedev gefur aftur til kynna að matarlyst Rússa hafi aukist. Velgengni á vígvelli býr til kröfur um meira herfang.

Pólverjar, Rúmenar og Ungverjar eiga landakröfur á Úkraínu, byggðar á aðstæðum fyrir fyrra stríð. Sígilt er að breyta landamærum með friðarsamningum. Danir, svo dæmi sé tekið, töpuðu syðsta hluta Jótlands til Þjóðverja eftir Slésvíkurstríðið 1864. Í friðarsamningum íhuguðu þeir að bjóða Þjóðverjum Ísland og halda meira af landi byggðu Dönum. Ekkert varð úr þeim makaskiptum, góðu heilli. Danir fengu tilbaka stóran hluta af töpuðu landi í Versalasamningunum eftir fyrra stríð.

Í Nató ráða ekki ferðinni nágrannar Úkraínu. Þrjú ríki taka helstu ákvarðanir. Bandaríkin annars vegar og hins vegar Frakkland og Þýskaland. Macron Frakklandsforseti viðraði tillögur um að senda Nató-hermenn á vígvöllinn en fékk afsvar frá Þjóðverjum. Bandaríkin ljá ekki máls á beinni aðild. Sérhæfðir Nató-hermenn starfa í Úkraínu en þeir eru flokkaðir sem málaliðar. Opinber stefna Nató er að slavnesku blóði skuli úthellt í austri.

Staða Úkraínu er enn ekki það slæm að vilji sé til að semja við Rússa. Litlar líkur eru á að Úkraínuher stöðvi framrás Rússa. Spurningin er hve lengi er hægt að tefja. Bandaríkin taka líklega enga stóra ákvörðun um Úkraínu fyrr en að afloknum forsetakosningum í nóvember. Nái Trump kjöri gæti Nató verið úr sögunni, segir í Telegraph. Án Bandaríkjanna og Nató er stjórnin í Kænugarði dauðadæmd. 

Rússneska kortið sem sýnir skiptingu Úkraínu að stríði loknu er diplómatískt herbragð. Í einn stað auglýsir það sigurvissu Rússa. Í annan stað er þrem Nató-ríkjum boðið land í Úkraínu. Kalt stríð er milli Póllands og Úkraínu, þótt ekki fari það hátt. Pólverjar vilja ekki landbúnaðarafurðir að austan sem keppa við heimaframleiðslu. Allir vöruflutningar yfir landamærin eru torsóttir. Pólverjar vilja gjarnan ,,heim" austurhéruðin gömlu sem Stalín tók af þeim og lagði undir Úkraínu eftir seinna stríð.

Ráðandi öfl í Nató, þ.e. Bandaríkin, Þýskalad og Frakkland (með Bretland í aukahlutverki) taka ekki stórar ákvarðanir að sinni, heldur bíða og sjá hverju fram vindur, á vígvellinum annars vegar og hins vegar alþjóðastjórnmálum. Sum ríki, t.d. Tyrkland og Kína, hvetja til friðarsamninga. Ekki er lengur rætt um að einangra Rússland í alþjóðasamfélaginu. Sú tilraun mistókst.

Mulningsstríðið heldur áfram og býr til harðar staðreyndir þar sem landi er skipt fyrir blóð. Þegar friður kemst á vonum seinna blasir við mesta tilfærsla á landamærum evrópskra þjóðríkja frá lokum seinna stríðs. Reginmunur verður þó á. Enginn spurði eftir þýska uppgjöf vorið 1945 til hvers stríðið var háð. Seinna stríð var nánast barátta góðs og ills. Úkraínustríðið er það ekki, þótt sumir láti þannig. Auðveldlega hefði mátt koma í veg fyrir ófriðinn. Úkraína sem hlutlaust ríki utan hernaðarbandalaga væri í dag kannski ekki gróðurvin friðsældar og lýðræðis en svo sannarlega ekki vígvöllur milljón manna herja.

Til hvers? verður spurt eftir Úkraínustríðið. Sama spurning brann á vörum margra veturinn 1918 er fyrra stríði lauk. Fyrir hundrað árum kunnu menn engin svör. Óreiðuöfl fengu byr undir báða vængi. Stríðið 1939-1945 varð framhald fyrra stríðs. Ófrið er auðvelt að kveikja, erfiðara að slökkva.     

 

 

Athugasemdir

[Ragnhildur Kolka, 10.3.2024 kl. 12:01]

Mér þykir Medvedev rausnarlegur fyrir hönd Pólverja. Úthlutar þeim mun meira landsvæði en þeir höfðu fyrir heimstyrjöldina. Þetta mun ennfremur ýta á Þjóðverja sem misstu land til Pólverja eftir síðari heimstyrjöldina. Hver veit nema næsta stríð verði háð milli Pólverja og Þjóðverja.

[Guðmundur Böðvarsson, 10.3.2024 kl. 16:41]

Og ekki má gleyma að Krúsjoff gaf samlöndum sínum í Úkraínu Krímskagann blindfullur á 10 ára sigurafmælinu 1954..

[Jósef Smári Ásmundsson, 10.3.2024 kl. 21:43]

Það er löngu kominn tími á að Nató blandi sér í stríðið með afgerandi hætti og sendi herlið til höfuðs þessum brjálæðingi í Kreml. Annars mun Pútín valta yfir Eystrasaltslöndin og Finnland.

[Wilhelm Emilsson, 10.3.2024 kl. 23:29]

Jósef, Eystrasaltslöndin og Finnland eru í NATO. Ef Pútín ræðst á þau er hann kominn í stríð við NATO. 

[Ingólfur Sigurðsson, 10.3.2024 kl. 23:47]

Ég efast um að hvorki Nató né Rússland hafi slíka sjálfseyðingarhvöt að byrja 3. heimsstyrjöldina sem gæti auðveldlega farið útí kjarnorkustyrjöld - heimsendi.

Gunnar Rögnvaldsson, sem hefur verið glöggur skýrandi um árabil heldur þó að klikkunin sé meiri NATÓ megin að byrja á slíkri vitleysu.

Það sem er rétt í því sem Jósef Smári gefur sér, er að Rússland virðist búið að styrkjast á þessum stríðsrekstri. Allt sem ESB og NATÓ hafa gert hefur virkað öfugt, veikt þau meira en Rússland, þó almenningur í Rússlandi líði einnig fyrir og jafnvel elítan í Rússlandi. Hann telur að Pútín valti yfir Eystrasaltslöndin og Finnland ef þau ráðast ekki á hann að fyrra bragði. Ja, víst er að við fáum gereyðingarstyrjöld ef Nató ræðst á Rússland. Það væri kannski ágætt að þurrka mannlífið út af þessari jörð, hvílíkur helvítis sori, með Metoo, og wokerugli. Slíkt er andstætt öllum trúarbrögðum, nema satanískum femínisma.

En ef af ókunnum ástæðum heimsendir yrði ekki þrátt fyrir slíka árás á Rússland, þá eru margir vinir hans sem bíða í röðum, í Kína, Norður Kóreu, jafnvel víðar.

BRICS löndin eru fjölmennari að mannfólki en Vestrið, og þar verður brátt mun meiri velmegun. Vesturlönd eru búin að vera.

"Góða fólkið" sem vildi frið um 1980, sem kom á jafnaðarstefnunni í Svíþjóð, sem nú er martröð og helvíti, það vill núna stríð. 

Í stað þess að læra af eigin mistökum þá er það hrokinn sem á að ráða.

[Jósef Smári Ásmundsson, 11.3.2024 kl. 06:54]

Rétt Wilhelm og þess verður ekki langt að bíða að Úkraína verði það líka. En ég held að það stoppi Pútín ekki. Þessvegna er betra að vera á undan. Meðan Natoríkin halda að sér höndum er þetta ekkert nema fjáraustur til Úkraínu.

[Jónatan Karlsson, 11.3.2024 kl. 07:05]

Þessi tillaga Rússa ætti að gleðja marga nágrana Úkraínu og hefja hið forna Garðaríki til vegs og virðingar sem spennandi ferðamáls, þó hlutur Hvíta-Rúslands mætti vera meiri að mínu mati í þessari nýju tillögu.

[Wilhelm Emilsson, 11.3.2024 kl. 21:08]

Ég skil þín sjónarmið, Jósef. Ég held samt að yfirstjórn NATO sé ekki tilbúin að taka áhættuna að þriðja heimsstyrjöldin brjótist út vegna Úkraínu.