Prigó­sjín, valdaránið og Pútín

Ef flugvél Prigó­sjín forsprakka Wagner málaliða var skotin niður rétt utan Moskvu eru allar líkur að valdaránstilraunin 24. júní hafi ekki verið sviðsett heldur föðurlandssvik. Drápið sé málagjöldin. 

Gagnrýni Prigó­sjín á yfirstjórn hersins gekk út á að rússneski herinn stígi alltof varlega til jarðar í Úkraínu. Ef frá eru taldar fyrstu vikur innrásarinnar, þegar beitt var leifturstríði, mallar rússneska hernaðarvélin hægt en stöðugt. Vestrinu og Úkraínu skal þrjóta fyrr örendið en Rússum er herfræðin. Engin meginbreyting er á herfræði Kremlarbænda eftir að stöðustríðið tók við af leiftursókninni í fyrravor.

Prigó­sjín er áhættusækinn og krafðist aukinnar hörku. Þar sem foringi Wagner-hópsins er ekki hermaður heldur herskár auðmaður er engin leið að sjónarmið hans fengju hljómgrunn nema með stuðningi valdamikilla einstaklinga í yfirstjórn hersins, - sem hefðu þá verið bandamenn hans í valdaránstilrauninni.

Færu Rússar halloka á vígvellinum gætu áhrifamenn í herstjórninni gripið til örþrifaráða. Stöðustríðið þróast Rússum í vil. Lítil efni eru til örvæntingar í þeirra herbúðum. Það eru ekki unglingar á gelgjuskeiði sem stýra hernum.

Surovíkin heitir hershöfðinginn sem fór fyrir hernaðaraðgerðum Rússa. Þangað til í síðustu viku að það spurðist út að Surovíkin væri fluttur til í starfi. Var hann bandamaður Prigósjín? Sé það tilfellið mun hann ekki kemba hærurnar. Landráð á stríðstíma er meira en brottrekstrarsök.

Eftir valdaránstilraunina fluttu Wagner-liðar til Hvíta-Rússlands, sem nánast er hjálenda Rússlands. Í herbúðum þeirra stendur yfir undirbúningur að endurnýjaðri aðild að stríðsátökum. Sjálfur valhoppaði Prigó­sjín milli landa, var oft í Rússlandi en fór líka til Afríku. Auðvelt skotmark í tvo mánuði eftir meinta tilraun til valdaráns. Hafi völd Pútín staðið tæpt 24. júní er 60 daga friðhelgi landráðamanns auglýsing um veikleika valdstjórnarinnar. Valdhafar opinbera ekki veikleika sína, síst á stríðstíma.

Engu að síður. Með Prigó­sjín í flugvélinni voru sex af æðstu yfirmönnum Wagner-liða. Hafi vélin verið skotin niður að undirlagi Pútín var í einum rykk gert út um helstu fyrirliða málaliðasveitarinnar. Trauðla gert nema Wagner-liðar ógnuðu öryggishagsmunum ríkisins. Vel að merkja, ekki er enn staðfest að Prigó­sjín sé meðal hinna látnu, aðeins að hann hafi verið á farþegaskrá.

En var flugvélin skotin niður? Ræma af hrapi vélarinnar sýnir að hún kemur niður í heilu lagi. Flugskeyti sem hittir flugvél ofar jörðu sprengir hana í lofti.

Tilfallandi telur enn að valdaránstilraunin 24. júní hafi verið sviðsett. Er þó ekki jafnviss í sinni sök og hann var 25. júní.

 

 

 

Athugasemdir

[Ragnhildur Kolka, 24.8.2023 kl. 12:09]

Prigozhin er mörgum Rússum harmdauði og hann hefði átt að halda sig í útlegðinni í Belarus. En sagan endurtekur sig í mörgum myndum. Hvernig fór ekki fyrir okkar hetju Gunnari á Hlíðarenda þegar hann hlítti ekki útlegðar dómnum. 

[Lárus Ingi Guðmundsson, 24.8.2023 kl. 12:43]

Í vísir er talið upp fullt a folki sem að Putin á að hafa látið drepa.

þar er heill listi. 

Staðreyndin er samt sú, að Ukrainu menn hafa nuna viðurkennt opinberlega,að hafa með skpulogðum hætti verið með sérsveit að störfum, sem að réðist gegnn háttsettum og efnamiklu fólki af Russneskju bergi brottnu. 

Stjornandi þeirra sveitar kom fram á dögunum og viðurkenni að hann sjalfur ásamt fleirum hefðu aðhafst með þessum hætti á skipulagðan máta um tima. 

Putin hefur verið kennt um flest öll drápin og þau gerð tortryggilega í þá áttina. 

Rétt eins og skripal i Uk á sinum tíma. 

þar sem að Teresa May var komin með 7 utgáfur af málinu og orðin margsaga um það hvernig það átti að hafa borið að garði. 

það skiptir engu fyrr Nato hvað er rangt eða rétt, það er bara að halda áróðrinum gangandi, og einfeldingar sem sitja fyrir framan sjónvarpið, eru flesti ekki með neinar Varnir í gangi, heldur kokgleypa við öllu þvi sem að að þeim er rétt og segja ,, þEIRA SEGJA AÐ ÞETTA SÉ SVONA ,, láta það bara duga. 

Ukraine's top spy admits killing Russian public figures (azerbaycan24.com)