Wagner-liðar sýna Póllandi áhuga

Eftir meinta valdaránstilraun í Rússlandi söðlaði málaliðaherinn kenndur við þýska tónskáldið Wagner um og hélt til Hvíta-Rússlands, - með blessun rússneskra yfirvalda. Nú segir forseti Hvíta-Rússlands, Lúkasjenkó, að hann eigi erfitt með að halda aftur af áhuga Wagner-liða á Póllandi.

Pólland er Nató-ríki. Þriðja heimsstyrjöld brytist út ef rússneskur málaliðaher herjaði á Pólland. Lúkasjenkó talar í hálfkæringi um innrás í Pólland. Gamanið er grátt enda liður í sálfræðihernaði stjórnvalda í Varsjá annars vegar og hins vegar Pútín forseta í Kreml. 

Löngu er vitað um áhuga Pólverja á vesturhluta Úkraínu, sem fyrrum var pólskt land. Í lok seinna stríðs, eftir sigur á Þjóðverjum, færði Stalín leiðtogi Sovétríkjanna pólsku landamærin í vestur, á kostnað Þýskalands, og hirti í staðinn Austur-Pólland undir Sovétríkin/Úkraínu.

Pútin minnti um daginn Pólverja á tilfærslur Stalíns. Þeim pólsku var ekki skemmt.

Vestur-Úkraína er til umræðu þar sem Austur-Úkraína fellur Rússum í skaut innan tíðar. Gagnsókn úkraínska hersins í Saparosjía gerir sig ekki, landvinningar eru litlir en mannfall mikið. Í Donbass er það rússneski herinn sem sækir fram. Þeir sem gerst þekkja til segja rússneskan sigur í kortunum, jafnvel þeir sem hlynntastir eru málstað Úkraínu.

Jake Sullivan er sá maður í bandaríska stjórnkerfinu sem hvað mest lætur til sín taka í Úkraínustríðinu. Hann viðurkennir að sókn úkraínska hersins gangi fremur hægt en minnir á að meginher stjórnarinnar í Kænugarði sé enn ekki kominn að víglínunni. Sókn Úkraínu hófst 4. júní. Ef meginherinn er enn í hvíldarstöðu tæpum tveim mánuðum síðar, þegar hvorki gengur né rekur á vígvellinum, er herfræðin sérstök, svo ekki sé meira sagt. Sókn á sannfæringar skilar litlu. 

Aukin spenna milli Póllands annars vegar og hins vegar Hvíta-Rússlands og Rússlands gefur sterklega til kynna að Austur-Úkraína sé vestrinu búið spil. Afgangurinn af landinu, Vestur-Úkraína, sé komin á matseðilinn. Umræða um áhuga Wagner á Póllandi er í raun spursmál um hvað verði um afganginn af Úkraínu eftir rússneskan sigur í austri.

Pólland dansar línudans, vill vesturhéruð Úkraínu en án þess að hleypa af stað þriðju heimsstyrjöldinni. Lúkasjenkó og Pútín taka þátt í leiknum og vekja athygli á að Varsjá sé aðeins í 100 kílómetra fjarlægð frá landamærunum. Stalín var þaulæfður að draga landamæri með herfræði í huga. 

 

 

Athugasemdir

[Birgir Loftsson, 24.7.2023 kl. 14:46]

Góðan daginn Páll. Svo að þetta sé nákvæmt, þá lögðu Sovétríkin Austur Prússland undir sig og gerðu að Kalíngrad. Pólverjar fengur stóra sneið af Austur-Þýskalandi (og þar með Vestur-Prússland) en misstu svæði til Hvíta-Rússlands og Úkraníu. Mestu þjóðflutningar sögunnar hófust þar með sem er ljót saga. 

Það er enginn búinn að gleyma neinu, allra síst Þjóðverjar.  Mér finnst því kenning þín um að Pólverjar séu eitthvað að pæla í að hirða til sín landsvæði nokkuð hæpið en kannski dagdreymir þá um slíkt, veit það ekki. 

Pólverjar eru í ESB og NATÓ og munu ekki hreyfa litla fingur án leyfis Þjóðverja eða Bandaríkjamanna. Wagnerliðarnir eru notaðir sem grýla á Pólverja og Eystrasaltsríkin og stoppari á NATÓ. En annars athyglisverðar pælingar hjá þér og gott hjá þér að minnast á þennan vinkil. Þetta fékk mig til að dusta ryki af gömlum landabréfakortum. Einu af örfáum landamærum sem hafa ekki breyst í Evrópum eru á Íslandi og Færeyjum. Hitt eru púsluspils landamæri og grundvöllur undir stríð framtíðar.

[Guðmundur Böðvarsson, 24.7.2023 kl. 20:40]

Og Krúsjoff gaf samlöndum sínum í Úkraínu Krímskagann á stórfylleríi 1954. Það þorði enginn að mótmæla stríðshetjunni frá Stalíngrad og arftaka Stalín.

[Sleggjan og Hvellurinn, 24.7.2023 kl. 21:18]

Wagner mun ekki triggera þriðju heimstyrjöld. Verður að vera meira afgerandi en það.

[Sigurður I B Guðmundsson, 24.7.2023 kl. 21:23]

Hvar er franska útlendingaherdeildin????