Selenskí játar veikleika

Í tísti segir forseti Úkraínu að óvissa sé veikleiki og vill fá tryggingu fyrir inngöngu landsins í Nató. Tryggð innganga jafngildir aðild sem nánast sjálfkrafa fæli í sér stríð Nató gegn Rússlandi. Ekki er vilji til þess hjá Nató-ríkjum.

Fyrir nokkrum vikum átti leiðtogafundur Nató í Vilníus að setja Rússum afarkosti. Hugmyndin var að sókn Úkraínu í Saparosía væri um það bil að kljúfa i tvennt hernámssvæði Rússa og ógnaði Krímskaga er Rússar hernumdu 2014. 

Sumarsókn Úkraínuhers hófst 4. júlí en skilar ekki árangri. Síðustu fréttir af vígvellinu í Saparosíja og Donbass sýna rússneskan ávinning en ekki úkraínskan. Annar mælikvarði á framgang Úkraínu er fáar fréttir. Þeir eru margar þegar Úkraína sækir fram.

Tíst Selenskí, sjá hlekk í fyrstu málsgrein hér að ofan, nefnir samningaviðræður við Rússa. Samningar og afarkostir eru ólíkir hlutir.

Tal Selenskí forseta um samninga við núverandi kringumstæður er meiri veikleiki en óvissan um inngöngu Úkraínu í Nató. Ekki fyrir löngu sögðust ráðamenn í Kænugarði fyrst semja við Pútín er úkraínskar hersveitir stæðu við borgarhlið Moskvu. Í dag er talað um samninga á meðan Rússar stjórna þriðjungi Úkraínu.

Úkraínustríðinu lýkur með samningum, vonandi fyrr en seinna. Líkur standa til að þeir samningar verði á rússneskum forsendum fremur en úkraínskum.

 

 

Liðka fyrir aðild Úkraínu að NATO

Athugasemdir

[Helga Kristjánsdóttir, 13.7.2023 kl. 04:30]

Það yrði góður endir og skynsamari,gæti stuðlað að umpólun okkar ráðherra til þess sem kjósendur væntu,Íslandi allt. 

[Guðmundur Böðvarsson, 13.7.2023 kl. 17:36]

Ben Wallace skammaði Zelenskí fyrir frekju og vanþakklæti og benti honum á að UK væri ekki ,,Amazon fyrir vopn". Ben er sennilega kominn með efasemdir sem gæti verið ástæðan fyrir að honum er ekki boðið að taka við af stríðshauknum Stoltenberg.