Grétuvandræði: sólin, ekki CO2, veldur hlýnun

Tvær nýbirtar vísindagreinar skrifa hækkun hitastigs jarðar á reikning sólarvirkni og samspili við skýjafar og hafna í leiðinni að manngerður koltvísýringur, CO2, sé ástæða hlýnunar.

Danski vísindamaðurinn Henrik Svensmark fær birta grein í Nature, sem telst háborg fræðirita, eftir tveggja ára ritrýningu. Í greininni segir að sólarvirkni og geimgeislar séu veigamiklir þættir i orkubúskap lofthjúps jarðar. Svensmark útskýrir niðurstöðurnar í viðtali. Ágúst H. Bjarnason hefur skrifað um rannsóknir Svensmark.

Orkubúskapur lofthjúpsins ræður hvort hitastig á jörðinni hækkar eða lækkar. Ef meiri orka kemur inn en fer út hækkar hitinn og öfugt ef útgeislun er meiri en innstreymi orku.

Kenning Grétu Thunberg og félaga er að koltvísýringur af mannavöldum hindri útgeislun og því hitni jörðin. Grétufræði gera ekki ráð fyrir að sólarvirknin hafi áhrif og gefa sér að CO2 útskýri allar hitabreytingar. Grétufræðin geta ekki útskýrt hvers vegna loftslag jarðar breyttist, og tók raunar verulegum breytingum, sbr. ísaldir, löngu áður en maðurinn gat nokkur áhrif haft með brennslu jarðefnaeldsneytis. Sólarvirki, á hinn bóginn, getur útskýrt loftslagsbreytingar alla jarðsöguna.

Önnur vísindagrein af áþekkum toga og rannsókn Svensmark er kynnt á heimasíðu loftslagsvísindamannsins Judith Curry. Höfundar eru Fritz Vahrenholt og Rolf Dubal. Þar segir klárt og kvitt að hækkun hita á jörðinni sl. 20 sé hægt að skýra með sólarvirkni og skýjafari.

Hér á Fróni er rætt um að stofna til loftslagsráðuneytis. Nær væri að stofna sólarráðuneyti. Við værum á pari með Forn-Egyptm sem dýrkuðu þá gulu og höfðu til þess stjórnarráð. Þó ekki á Arnarhvoli.

Athugasemdir

[Hörður Þormar, 13.10.2021 kl. 12:01]

Það er misskilningur að Gréta Thunberg sé með einhverjar kenningar í loftslagsmálum. Hún hefur ekkert vit á þeim vísindum, treystir bara fullyrðingum vísindamanna. Þetta heyrði ég hana sjálfa segja.

Að sjálfsögðu eru ekki allir á einu máli og greinar hafa verið birtar, bæði með og móti kenningum um loftslagshlýnun.

Vísindakenningar er ekki hægt að sanna, hins vegar á að vera hægt að hrekja þær, standist þær ekki.

Fyrir nokkrum dögum veitti sænska vísindaakademían Klaus Hasselmann og Syukuro Manabe Nóbelsverðlaun fyrir að gera spálíkön um loftslagið. Fróðlegt verður að sjá hvort einhverjir muni birta lærðar greinar sem afsanni kenningar þessara ágætu nóbelsverðlaunahafa og þar með hnekkt úrskurði þessarar frægu vísindaakademíu.

[Rúnar Már Bragason, 13.10.2021 kl. 20:51]

Spálíkan getur ekki verið kenning svo hvernig á að vera hægt að afsanna það sem kenningu Hörður?

Að setja spá í líkan er bara hugarburður (innsettar forsendur) sem mögulega gæti nýst í raunveruleikanum. Nóbelsverðlauna akademían er að setja sig niður með þessum verðlaunum.