Þöggun með umræðu

Vandamálið með tjáningu í heimi félagsmiðla er að þeir sem vita og kunna þegja en hinir sem hafa ekkert gagnlegt fram að færa eru óðamála.

Offramboð er af skoðunum en þekking er af skornum skammti. Tilfinningar trompa röksemdir. Upphlaup fá athygli en vandaður málflutningur er sniðgenginn. 

Félagsmiðlar, fjölmiðlar meðtaldir, ýkja þann vanda sem fylgir mannlegum tjáskiptum. Óhemju magn upplýsinga og álita eru í umferð. Þegar frétt eða skoðun rekur á fjörur manns þarf að spyrja. Er mælt af heilum hug? Eru duldir hagsmunir að baki? Er heimildin, ef um hana er að ræða, trúverðug? Er röklegt samhengi? Það tekur tíma og þjálfun að greina hismið frá kjarnanum. Fæstir hafa nennu til þess og venja sig á að taka eitthvað gott og gilt en hafna öðru.

Ekki bætir úr skák að á seinni tímum ber á þeim menningarsjúkdómi að til sé eitthvað sem heitir ,,minn sannleikur." Ef sannleikur er á annað borð til getur hann ekki verið ,,minn" eða ,,þinn", - aðeins sannleikur.

Svo nýlegt dæmi sé tekið þá stendur RÚV fyrir umræðu þessa dagana þar sem hrært er saman meintri þöggunarmenningu og áhrifum hagsmunahópa. Allir eldri en tvævetra vita tilefnið. Helgi Seljan fréttamaður RÚV var dæmdur brotlegur við siðareglur. Þegar lélegasta málsvörn lýðveldissögunnar var afhjúpuð fór RÚV í yfirgír að kenna samfélaginu um ófarir hagsmunahópsins á Efstaleiti.

RÚV mælir ekki af heilum hug, er með dulda hagsmuni, styðst við ótrúverðugar heimildir og röklegt samhengi er allt undir yfirborði umræðunnar. Það er ekki til neinn Efstaleitissannleikur þótt raðfréttir séu sagðar af honum.

RÚV stundar það sem málóðir fundarmenn komust upp með fyrr á tíð. Að drepa málum á dreif með hávaða og upphrópunum. Þöggun með umræðu.

Umboðsmaður hættir athugun á tjáningarfrelsi

Athugasemdir

[Ragnhildur Kolka, 29.4.2021 kl. 08:53]

Já, var Lukas ekki annars drepinn? 

[Jón Steinar Ragnarsson, 29.4.2021 kl. 13:07]

Þessi umræða ruv og seðlabankans um áhrif hagsmunahópa er bara endurvinnsla á krossferðinni gegn Samherja. Seðlabankinn á harma að hefna og því falla sjónarmið Ruv og bankans saman eins og flís við rass. Þetta er æpandi augljóst og ef maður tekur samherja út úr þessari mynd þá er þessi umræða andvana fædd, ógrundað raup og spekúlasjónir, sem engu skila. 

Gylfi Magnússon var leiddur í settið í gær og spurður spurninga sem svöruðu sér sjálfar fyrir hann. Hann taldi að ekkert alvarlegra steðjaði að þessari þjóð en þetta óskilgreinda, dæmalausa og almennt orðaða hagsmunapot.

í orðum núverandi og fyrrverandi seðlabankastjóra er ekki svo óljóst látið í ljósi liggja að Samherji sé jafnvel með dómskerfið í vasanum af því að dómar hafa fallið í óþökk þessara háu herra.

Þeir eru búnir að spinna þetta mál upp í þráhyggju, sem er nánast að verða kómísk. Ekkert í heimi hér skákar þessu. Áfram skal haldið. Helstu álitsgjafar um þetta eru sitjandi seðlabankastjóri og Bubbi Mortens. Halelúja!

Ef tala á um óeðlileg áhrif hagsmunaaðila á samfélagið, þá væri réttast að byrja á RUV og seðlabankanum og krossferðum þeirra gegn einkaframtakinu og einstaklingum. Ef eitthvað er áhyggjuefni, þá er það það.

Vald er fyrir þeim eins og piparkökurnar hans Mikka refs. Hann vildi ekkert minna en allar. 

[Guðmundur Ásgeirsson, 29.4.2021 kl. 17:23]

Álit er ekki dómur.

[Heimir Lárusson Fjeldsted, 29.4.2021 kl. 19:12]

Sann leikur. Eftirlætisíþrótt RÚVara.