Frjálslynda heimsvaldastefnan og Trump bjargvættur

Bandaríkin stjórnuðu Írak eftir innrásina 2003 og fall Hussein. Í dag er bandaríska sendiráðið í höfuðborg Íraks í umsátri öskrandi múslíma. Hvaða skelfilegu mistök leiddu til niðurlægingarinnar?

Yfirborðsskýringin er að Bandaríkin gerðu árás á sveitir hliðhollar Íran með bækistöðvar í Írak. Tilefni árásar Bandaríkjanna er að þeir innfæddu drápu bandarískan verktaka. Jerusalem Post útskýrir samhengi hefndaraðgerðanna.

Í stærra samhenginu er staða Bandaríkjanna í Írak og miðausturlöndum almennt mistök frjálslyndra á síðasta áratug. Innrásina 2003 má skrifa á reikning Bush forseta og herskárra kaldastríðshauka. Brotthvarf bandaríska hersins undir lok áratugarins var viðurkenning á óförunum. Í byrjun síðasta áratugar var borðið dekkað fyrir skynsama og raunsæja utanríkisstefnu er í grunninn leyfði múslíum í miðausturlöndum að finna lausn á eigin málum. 

Það gekk ekki eftir. Frjálslyndir, Obama, Clinton og kó, tileinkuðu sér herskáa stefnu um að breyta miðausturlöndum í vestræn fjölmenningarsamfélög. Arabíska vorið í byrjun áratugarins var tylliástæða. Gadaffi í Líbýu var steypt af stóli og efnt var til borgarastyrjaldar í Sýrlandi.

Trummp var kjörinn forseti 2016 til að stöðva illa ígrunduð hernaðarævintýri. Herskáir frjálslyndir gengu af göflunum, heimtuðu meira blóð og höfuð Trump á fati; hann væri hvort eð er ekki annað en smurður agent Pútín Kremlarbónda.

Kaldastríðsfrjálslyndið í Bandaríkjunum er útskýrt í málgangi íhaldssamra hægrimanna, American Conservative. Í gruninn trúir herskáa útgáfan af frjálslyndi að vestrænt samfélag sé sniðmát fyrir heimsbyggðina alla. Í stað þess að viðurkenna hreint út heimsvaldastefnuna klæða frjálslyndir hana í hugmyndafræði mannréttinda og yfirvofandi heimsendis vegna manngerðs veðurfars.

Mannréttindi koma ekki af himnum ofan. Þau verða til í samfélagi manna. Vestræn mannréttindi vaxa úr kristni, eins og Tom Holland sýnir fram á í nýrri bók, og byltingunum í Bandaríkjunum og Frakklandi á seinni hluta 18. aldar. Þessi mannréttindi eru framandi múslímum enda viðurkenna þeir þau ekki.

Trump er bjargvætturinn gegn heimsvaldastefnu frjálslyndra. Hann blés, koltvísýringi auðvitað, á glópahlýnun og boðaði endalok frjálslyndrar heimsvaldastefnu í miðausturlöndum.

Bandaríkin áttuðu sig á að stríðið í Víetnam var tapað 1968 þegar sendiráðið í Saigon varð fyrir árás. Sjö árum síðar lauk 25 ára sneypuför herveldisins til smáríkis í Suðaustur-Asíu. Barátta gegn heimskommúnisma var yfirvarpið sem kostaði milljónir mannslífa. Umsátrið um bandaríska sendiráðið í Bagdad í árslok 2019 fær kannski einhverja fleiri en Trump til að kveikja á perunni í Washington um að frjálslynda heimsvaldastefnan er ferð án fyrirheits.  

Kennir Íran um árásina

Athugasemdir

[Ómar Geirsson, 3.1.2020 kl. 17:56]

Blessaður Páll.

Ég hef sjaldan lesið eins yfirgripsmikla umfjöllun, sem kemur eins mörgum staðreyndu að, og í þessum pistli þínum.

Kannski vantar nálgun á þá staðreynd að vegna viðskipta Trump við Sáda, að þá spilaði hann sig fávita þegar kom að morðinu á blaðamanninum sem trúði að Tyrkir væru hluti af Evrópu, mætti því sjálfsöruggur í ræðismannsskrifstofu Sáda, og síðan ekki söguna meir.

Þá kom í ljós visst sjálfstæði Tyrkja ganvart miðaldafólki Arabíuskagans, sem og að utanríkisstefna USA var mótuð eftir síðasta ársreikning Trump samsteypunnar, sem og kostunaraðila hans.

Eins og að það skipti þig máli Páll að halda þig við staðreyndir, kostunaraðilar Trumps eru ekki beint að fylgjast með skrifum þínum.

En þau eru upplýsandi þegar þú kýst að segja satt,.

Kveðja að austan,.