Bjarni Ben. í fangelsi djúpríkisins

,,Hvað í ósköpunum liggur mönnum á að komast undir sameiginlega raforkustofnun Evrópu á okkar einangraða landi með okkar eigið raforkukerfi? Hvers vegna í ósköpunum hafa menn áhuga á því að komast undir boðvald þessara stofnana?"

Bjarni Benediktsson formaður Sjálfstæðisflokksins er höfundur orðanna hér að ofan. Þau eru sögð fyrir einu ári á alþingi, eins og Gunnar Rögnvaldsson vekur athygli á.

Eitthvað undarlegt gerðist á þessu eina ári. Bjarni Ben. er orðinn talsmaður þess að setja Ísland ,,undir sameiginlega raforkustofnun Evrópu" - með innleiðingu 3. orkupakkans.

Djúpríkið vildi Icesave-lögin, djúpríkið vildi ESB-aðild og djúpríkið vill 3. orkupakkann.

Djúpríkið tekur alltaf hagsmuni ESB fram yfir þjóðarhagsmuni. Ástæðan er sú að kjarni djúpríkisins, embættismannaelítan, á meira sameiginlegt með starfsbræðrum sínum í Brussel en almenningi á Íslandi.

Umræðan leiðir í ljós að þjóðin vill ekki 3. orkupakkann, ekki frekar en hún vildi Icesave-lögin eða ESB-aðild. 

Bjarni Ben. ætti að nota páskana til að brjótast úr dýflissu djúpríkisins og taka afstöðu með þjóðarhagsmunum.

3. orkupakkinn er eitrað peð sem við eigum ekki að taka. Næsta leik okkar í skákinni við ESB má kalla biðleik, líkt og við frestuðum ESB-umsókninni, eða við látum tímann líða og bíðum eftir afturköllun ESB á peðsleiknum með þriðja orkupakkanum. 

Aðalatriðið er að þingsályktunin um afléttingu á fyrirvörum gagnvart 3. orkupakkanum verði tekin af dagskrá alþingis.

 

 

Athugasemdir

[Ragnhildur Kolka, 21.4.2019 kl. 13:12]

Þessi sinnaskipti Bjarna eru mörgum mikil vonbrigði. Í það minnsta þeim sem glöddust fyrir ári síðan þegar þessi orð féllu og töldu þau merki um að dómgreindarleysi í Icesavemálinu væru þá að baki.