Gæti-fréttir og guðlegir fjölmiðlar

Fréttir um framtíðina eru spásagnir um óorðna hluti. Enginn veit með nokkurri vissu hvað framtíðin ber í skauti sér. Eftirspurnin er þó fyrir hendi og gæti-fréttir reyna að anna henni.

Fjölmiðlar vilja vera hluti af daglegu lífi fólks. Til skamms tíma þótti nóg að þeir flyttu nýlegar fréttir, svo fóru þeir að flytja rauntímafréttir í beinni útsendingu. En núna er það ekki nóg. Gæti-fréttir segja okkur hvað gerist í framtíðinni.

Við gætum dregist inn í tollastríð Kína og Bandaríkjanna; Grænlandsjökull gæti bráðnað; plast gæti ógnað lífríki sjávar; Norður-Kórea gæti hrundið af stað kjarnorkustyrjöld og svo framvegis. Flestar gæti-fréttir boða hörmungar í einni eða annarri mynd.

Löngu fyrir daga fjölmiðla sáu prestar um fréttir af framtíðinni. Trúarmiðstöðvar eins og Delfí í Forn-Grikklandi voru uppspretta gætu-frétta. Opin spurning er hvort það sé framför að heimildarmenn gætu-frétta samtímans séu af holdi og blóði.

 

Ísland gæti dregist inn í tollastríð

Athugasemdir

[Jón Steinar Ragnarsson, 4.4.2018 kl. 09:43]

Svona fréttum er svo gefið gervivægi með að vitna í nafnlausa "sérfræðinga". Sérfræðingar segja...Sérfræðingar álíta. Kafnvel eru "vísindamenn" dregnir til. Að áliti vísindamanna....Vísindamenn telja.. ( "telja" eða "álíta" verandi jafn þokukennt og annað, en í dag eru ályktanir og getgátur jafnvæg sönnunum.

[Ragnhildur Kolka, 4.4.2018 kl. 15:49]

Þegar eitthvað hefur verið orðað má alltaf fletta því upp og benda á að varað hafi verið við því. Og þar sem gæti-fréttir eru alltaf af hamförum þá finna vinstrimenn alltaf réttlætingu á tilvist sinni í þeim.