Um rasisma og menningu

Rasismi er kynþáttahyggja þar sem einn kynþáttur er sagður öðrum æðri. Rasismi verður fullveðja á 19. öld þegar hvítir Evrópumenn réttlættu kúgun og þrælahald á þeldökkum Afríkubúum.

Á 20. öld þróast rasismi áfram, t.d. í Þriðja ríkinu, með alkunnum afleiðingum.

Enginn heilbrigður maður aðhyllist rasisma sem hér að ofan er lýst. Í pólitískri umræðu, ekki síst hér á landi, er hugtakið rasisti notað sem brigslyrði um þá sem gjalda varhug við óheftum innflutningi fólks frá framandi menningarsvæðum.

Reynsla Vestur-Evrópu af innflutningi fólks er því verri sem fólkið kemur lengra að. Þannig eiga Þjóðverjar ekki í vandræðum með að innbyrða milljónir Austur-Evrópubúa og þýskvæða. Aftur er það nokkrum vandkvæðum bundið, svo vægt sé til orða tekið, að aðlaga innflytjendur frá múslímaríkjum að þýskum siðum og háttum. Um þetta þarf ekki að deila. Reynslan er þar ólygnust.

Þjóðverjar og aðrar Vestur-Evrópuþjóðir eru óðum að herða kröfur til innflytjenda um að þeir tileinki sér menningu viðtökulandsins. Jafnframt er vaxandi fylgi við að stemma stigu við fjölda innflytjenda. Þessi umræða er ekki rasísk í neinum skilningi þess orðs.

Málið snýst um menningu. Þjóðir Vestur-Evrópu óttast að innflytjendastraumurinn grafi undan grónum gildum samfélagsins. Til skamms tíma var vinsælt að nota hugtakið ,,fjölmenning" í stað þjóðmenningar. Hugtakið er komið í ónáð. Ástæðan er sú að fjölmenning er með innbyggða mótsögn.

Fjölmenning gerir ráð fyrir að ólíkir menningarheimar þrífist hlið við hlið undir sama yfirvaldinu. En menningin skilgreinir afstöðu okkar til laga og réttar, stjórnskipunar og ekki síst mannréttinda. Þar af leiðir getur menning sem mismunar kynjunum, svo dæmi sé tekið, ekki blómstrað við hlið menningar sem lætur sér annt um jafnrétti karla og kvenna. Annað tveggja verður að víkja.

Vaxandi ótti er í Vestur-Evrópu að viðurkennd vestræn gildi, s.s. mannréttindi, eigi undir högg að sækja vegna aðstreymis fólks sem er með allt aðrar hugmyndir um mannréttindi.

Umræðan um stöðu vestrænnar menningar er ekki rasísk þótt fjölmenningarsinnar sumir hverjir haldi því fram.

Athugasemdir

[Réttsýni, 15.10.2017 kl. 16:57]

Umræðan um stöðu vestrænnar menningar er ekki rasísk í sjálfu sér en verður það oft þegar rasistarnir blanda sér í hana.

[Valur Arnarson, 15.10.2017 kl. 18:17]

Málið er, Páll, að menningarhópar eru alls ekki einsleitir. Innan vestrænu menningarhópanna þrífast allskyns viðhorf, sem dæmi íhaldssöm og frjálslynd. Ef við gerum ráð fyrir því t.d. að múslimar aðhyllist allir íhaldssöm gildi íslams, eins og þau eru skilgreind af þeim þjóðríkjum sem eru í hvað mestri mótsögn við jafnréttissjónarmið, eins og t.d. jafnrétti kynjana - þá verður umræðan auðvitað rasísk og einkennist þá af menningar rasisma.

Viðhorf múslima eru, óhjákvæmilega fjölbreytt, viðhorf araba eru óhjákvæmilega mun fjölbreyttari. Trúarsannfæring er svo eitthvað sem er mun afstæðari en við gerum okkur grein fyrir.

Íhaldssömum múslima gæti þótt fjölkvæni í vestrænu samfélagi eðlilegt, þar sem karl á fleiri ein eina konu, meðan frjálslyndur múslimi gæti haft þá skoðun að slíkt væri ekki réttlætanlegt - ekki með vísun í neitt - trúarrit, né lög vestrænna samfélaga.

Grunnurinn er að einstaklingarnir eru fjölbreyttir, að gefa sér þær forsendu að svo sé ekki, krefst einhverskonar rökstuðnings. Ef þann rökstuðning skortir, einkennist málflutningurinn af alhæfingum, sem virka oft rasískar þó svo að meiningin sé kannski ekki sú.

[Kolbrún Hilmars, 15.10.2017 kl. 18:21]

Vestrænni menningu stendur engin hætta af húðlit innflytjenda, en henni kann að standa hætta af menningu þeirri sem þeir flytja með sér.  Varla getur það kallast rasismi að blanda sér í þá umræðu. Eða hvað?

[Páll Vilhjálmsson, 15.10.2017 kl. 18:26]

Rétt, Valur, menningarhópar eru ekki einsleitir í merkingunni að allir hafi sömu skoðun.

Á hinn bóginn. Ef maður ber saman vestræna menningu og múslímska finnur maður ákveðinn mun. Til dæmis þann að í vestrænni menningu er trúarafstaða mál einstaklingsins en í múslímskri menningu er trú samfélagsmál. Þess vegna er ríkjandi viðhorf múslíma að dauðasynd sé að ganga af trúnni en sú afstaða er algerlega framandi vestrænni menningu.

[Merry, 15.10.2017 kl. 19:37]

Kolbrún sló á naglann á höfuðið, nákvæmlega.

[Merry, 15.10.2017 kl. 19:41]

Páll - Þau sem trúa á Islam og vill Sharia Lög er gjörsamlega á móti vestraæn hugsandi. Svona fólk er ekki velkominn.