Sviðsmyndir stjórnmálanna - tilbúinn veruleiki

Sviðsmyndir er hugtak sem sett var saman á Nýsköpunarmiðstöð Íslands og varð tamt stjórnmálamönnum eftir hrun. Sviðsmyndir lýsa mögulegri þróun eða breytingum sem gætu orðið við ákvarðanir fyrirtækja eða stjórnvalda um mikilsverð mál.

Eftir hrun var eftirspurn eftir ólíkum sviðsmyndum að gefnum stórum ákvörðunum sem stjórnvöld stóðu frammi fyrir. Nú er hrunið að baki og afnámi hafta lokið. Þegar talað er um mögulegar afleiðingar af stefnu stjórnvalda er óþarfi að nota hrunhugtök.

Orðið sviðsmynd er lúmskt orð sem stjórnmálamenn ættu að forðast. Sviðsmynd er leikhúsorð um tilbúinn veruleika,til að blekkja áhorfendur. Maður kaupir sér miða í leikhús til að njóta blekkingar, sem afhjúpa einhver sannindi þegar vel tekst til. 

En stjórnmál eiga ekki að blekkja heldur upplýsa og gera grein fyrir valkostum. Vitanlega er blekking snar þáttur stjórnmálaumræðunnar og hefur alltaf verið. En óþarfi er að gera henni hátt undir höfði og tala um ,,sviðsmyndir" þegar ræddar eru mögulegar afleiðingar ákvarðana stjórnvalda. 

 

 

 

Er fánadagur?

Athugasemdir

[Anna Sigríður Guðmundsdóttir, 13.3.2017 kl. 20:32]

Í dag sögðu fréttamiðlar frá að fólk "keypti" innistæðulausan allskonar-klósettpappír (gjaldeyrir) fyrir innistæðulausan isl.krónu-klósettpappír.

Heimsbankarnir eru drifnir áfram frá degi til dags með innistæðulausum og glæpabanka-prentuðum svartamarkaðsbrasks mattador peningum (verðlausum klósettpappír með myndskreytingu).

Á meðan ekki er til blek í prentara fjármála og efnahagsráðuneytisins, þá er greinilega ekki skortur á prentsvertu svarolíusmurðra myrkrahöfðingja heimsveldis-tölvubankafalsaranna.

Það er víst ástæðan fyrir þessari miklu hamingju Benedikts Jóhannessonar?Hann er vissulega talnaglöggur maður, hann Benedikt Jóhannesson. En það er ekki nóg að vera talnaglöggur, þegar um svona mikla ábyrgð á almannahagsmunum og grunnstoðum samfélagsins er að ræða.

Kæri Óttar Proppe!

Nú þarft þú að stíga fram af ábyrgð og með stuðning flest allra á þingi og utan þings, og segja þig frá þessu óábyrga og óupplýsta ráðabruggi baktjalda-heimsbanka glæpasviðsins. Ég styð þig alla vega heilshugar í að gera allt sem í þínu valdi er mögulegt, til fresta þessu óskoðaða máli, þar til löggjafaþingið hefur ákveðið á upplýstan hátt hvernig það ætlar að framkvæma afnám haftanna.

Þetta verður að ræða á löglegan upplýstan hátt, á löggjafaþingi Íslands. Eða leggja löggjafaþingið annars niður áður en skaðinn af lögleysi löggjafavaldsins verður enn meiri en orðið er.

M.b.kv.

[Anna Sigríður Guðmundsdóttir, 13.3.2017 kl. 20:34]

...svartolíusmurðra myrkrahöfðingja...

[Ómar Ragnarsson, 14.3.2017 kl. 00:01]

Þú lýsir innihaldi orðsins sviðsmynd sem "mögulegri þróun". En möguleg þróun er ekki veruleikinn fyrr en ef eða þegar veruleikinn hefur orðið hinn sami og sviðsmyndin sýndi. 

Ef í ljós kemur að viðkomandi mál þróaðist á annan veg en tilgátan, "möguleg þróun" sýndi, liggur fyrir að sviðsmyndin varð aldrei veruleikinn. Og hvað með það?