Píratar, stjórnmál og samfélag

Píratar voru stofnaðir sem nördaflokkur með áherslu á fjarskipti og tölvur. Án þess að vinna til þess urðu Píratar stærsti flokkur landsins i skoðanakönnunum.

Óverðskulduð velgengni krafði Pírata um að vera annað og meira en samtök um þægilega innivinnu fyrir Birgittu Jónsdóttur og félaga.

Nördaflokkur verður ekki að stjórnmálahreyfingu nema að tala fyrir pólitík sem höfðar til almennings. Píratar bjuggu ekki að neinni hefð fyrir pólitíska stefnumótun og voru alls ekki undirbúnir undir það fylgi sem sópaðist að þeim.

Ef Píratar eru mátaðir við fyrirferðamikil deilumál í samfélaginu, s.s. ESB-umræðuna, verðtryggingu, byggðastefnu, fiskveiðistjórnun, heilbrigðismál og fleiri slík er lítið um píratískar áherslur sem skapa flokknum sérstöðu.

Tilefni deilna Birgittu Jónsdóttur og Ernu Ýrar Öldudóttur er hvort Birgitta sé leiðtogi Pírata eða ekki. Ráða má af deilunum að píratasamfélag sé orðið til, sem leggur upp úr réttum skilningi á formi og hugmyndafræði flokksins. Deilur af þessu tagi eru fylgifiskur tilrauna til pólitískrar nýsköpunar.

Píratar eiga eftir að gera upp við sig hvort þeir séu nördasamfélag eða stjórnmálaafl sem ætlar sér að breyta Íslandi. Nokkur munur er á þessu tvennu.

Píratar deila hart á Facebook

Athugasemdir

[Bjarni Jónsson, 24.2.2016 kl. 11:08]

Helgi, pírati, hefur lýst því yfir, að ástandið í flokkinum minni hann á ofbeldisfulla sambúð.  Það má því geta nærri, hvernig andrúmsloftið er á flokksheimilinu.  Það er vel þekkt, að á einu heimili þrífst og leyfist bara ein drottning.

[Jón Valur Jensson, 24.2.2016 kl. 13:11]

Sbr. þessa grein á Eyjunni í morgun: Helgi Hrafn líkir ástandinu innan Pírata við ofbeldissamband – Birgitta biðst afsökunar

sem hefst þannig: "Helgi Hrafn Gunnarsson, kapteinn Pírata, er fullur reiði yfir framgöngu Birgittu Jónsdóttur, þingmanns flokksins, í garð óbreytts flokksmanns. Hann líkir stöðunni sem uppi er við að vera í ofbeldissambandi og segist hafa fundið ótta við að tala um það sem honum liggur á hjarta hvað málið varðar ..."

[Gísli Friðrik, 26.2.2016 kl. 13:48]

"Píratar voru stofnaðir sem nördaflokkur með áherslu á fjarskipti og tölvur. Án þess að vinna til þess urðu Píratar stærsti flokkur landsins i skoðanakönnunum.

Óverðskulduð velgengni krafði Pírata um að vera annað og meira en samtök um þægilega innivinnu fyrir Birgittu Jónsdóttur og félaga".

Með slíkum sleggjudómum og kjánalegum lýsingum út frá fordómum þínum, er hægt að taka mark á restinni af bloggfærslunni þinni?

Auðvitað sleppirðu því svo að minnast á opnar umræður á pírataspjallinu um þessa krísu, umræður sem færðu hlutina í betra horf. Á sama hátt hefurðu eflaust lesið stefnuskrá pírata en munt aldrei nokkurntíman vísa til hennar heldur blammera út frá þínum hugarheimi.

[Jón Valur Jensson, 26.2.2016 kl. 21:24]

... sagði þessi tapsári pírati.