Evran er atvinnuleysi og eymd; krónan er atvinna og hamingja

Í tísku er að níða skóinn af krónunni. Jónas heggur í hana og Brynjar N. tekur í sama streng. Ef það væri svo að valkostur við krónuna færði auðlegð, ríkidæmi og stöðugleika mætti taka mark á orðræðunni.

Evran er talinn valkostur við krónuna. Umræðan út í heimi er á þá lund að evran rífi í sundur samfélög vegna þess að hún viðheldur atvinnuleysi, einkum meðal ungs fólks. Telegraph ræðir ömurleika evrunnar ítarlega. Welt leggur dæmið upp á svipaðan hátt.

Þeir sem óska sér evru í stað krónu biðja um atvinnuleysi og eymd, einkum og sér í lagi hjá ungu fólki.

Krónan er besti vinur unga fólksins; stuðlar að atvinnu. Krónan er slagorðið ,,stétt með stétt" holdi klædd sökum þess að hún jafnar byrðunum þegar illa árar, með því að lækka í gengi, en eykur kaupmátt allra í góðæri með því að styrkjast.

Krónan er blessun sem þjóðin getur ekki verið án.

Athugasemdir

[Kolbrún Hilmars, 27.10.2015 kl. 11:40]

Krónan er ágæt, hún er líka ágæt í Noregi, Danmörku og Svíþjóð.
Auk þess virðast bretar sáttir við sín pund.
Evran virkar vel í Þýskalandi; sjálfsagt væru aðrar evruþjóðir jafnsettar ef evran héti einfaldlega þýskt mark.

[Tómas Ibsen Halldórsson, 27.10.2015 kl. 12:39]

Finnar tóku upp evru og voru kátir mjög, allt lék í lindi, Nokia upp á sitt besta og Finnar hamingjusamastir á norðurlöndum.  Síðan missti Nokia fótanna, gróðinn hrundi og allt fór að snúast á verri veg.  Nú er svo komið í Finnlandi að þeir dauðsjá eftir því að hafa tekið upp evru, nú hefur hamingjan snúist upp í böl.  Öll loforð um bættan hag og betri tíð hefur umhverfst í lélegri kjör og hroll sem fer um finnsku þjóðina.

[Eggert Sigurbergsson, 27.10.2015 kl. 13:26]

Þetta er spurning um að fá laun greidd í krónum eða atvinnuleysisbætur í evrum.

[Helga Kristjánsdóttir, 27.10.2015 kl. 17:23]

 Eggert kannski í stíl við eina af landsfundatillögu Sjálfstæðisflokks, fá launin greidd í framhlaðinni mynt