Stóra-Skagafjarðarmálið og rústir reykvíska lýðveldisins

Stóra-Skagafjarðarmálið grípur á stöðu íslenskra stjórnmála. Dæmigerður fulltrúi reykvískra stjórnmála, Birgitta Jónsdóttir pírati, líkir Skagafirði við Sikiley, með þeim undirmálum að Íslandi stjórni skagfirsk mafía.

Skagafjörður er í þessu samhengi fulltrúi landsbyggðarinnar andspænis Reykjavík. Orð Birgittu lýsa örvæntingu reykvískrar stjórnmálamenningar sem geldur hvert afhroðið á fætur öðru.

Eftir búsáhaldabyltinguna réðu reykvískar stjórnmálaáherslur ferðinni. Öll stærri mál vinstristjórnar Jóhönnu Sig. eru reykvísk: ESB-umsóknin, kvótaumræðan og ný stjórnarskrá eru hugðarefni Reykvíkinga fremur en íbúa landsbyggðarinnar. Og öll fóru þessi mál á versta veg fyrir höfuðborgarliðið.

Eftir að Jón Gnarr brást sem foringi reykvískrar stjórnmálamenningar myndaðist tómarúm sem ekki hefur verið fyllt. Gísli Marteinn Baldursson, fyrrverandi borgarfulltrúi, ætlaði sér í þetta tómarúm en fékk ekki til þess fylgi. Greining Gísla Marteins er að íslensk stjórnmál séu ónýt, en hann á vitanlega við að reykvísk stjórnmálamenning er í upplausn.

Aðrir spámenn án föðurlands að þessu leyti eru Benedikt Jóhannesson, sem vill stofna Viðreisn, og Gunnar Smári Egilsson er ætlaði sér að stofna Noregsflokk, til að Ísland yrði fylki Noregs. Gunnar Smári sér Ísland reykvískum gleraugum.

Birgitta Jónsdóttir er helsti samnefnari reykvískrar stjórnmálamenningar nú um stundir. Samlíking hennar á Skagafirði og Sikiley er í ætt við stórkarlalegar yfirlýsingar skoðanasystkina hennar um að Ísland ætti að ganga í ESB til að stjórna þar málum, selja útlendingum kvótann og stofna reykvískt lýðveldi með nýrri stjórnarskrá.

Draumurinn um reykvíska lýðveldið leið undir lok með borgarstjóraferli Jóns Gnarr. Birgitta er bara svolítið sein að kveikja á fattaranum.

Vilja að Birgitta biðjist afsökunar

Athugasemdir

[Sigurður Haraldsson, 30.5.2015 kl. 12:24]

Villtur.

[Jón Valur Jensson, 30.5.2015 kl. 13:41]

Hér á ég að gefnu tilefni BIRGITTUBRAG og fleiri innlegg (smellið):  

http://www.visir.is/sveitarfelag-skagafjardar-krefst-opinberrar-afsokunarbeidni-fra-birgittu/article/2015150528845

[Snorri Hansson, 30.5.2015 kl. 16:42]

Það er alveg greinilegt að þegar einsmáls flokkarnir eru búnir að tapa málinu sínu.

 Bæði í sjálfu  ESB og heima.  Er það reiðin, hefndar  og  niðurrifs viljinn sem stendur eftir.

[Jóhannes Laxdal Baldvinsson, 30.5.2015 kl. 17:51]

Það er ljótur leikur að etja Reykvíkingum gegn landsbyggðunum. Það er jafn slæmt og að líkja Skagfirðingum við mafíósa. Birgitta mátti alveg nefna Þórólf Gíslason á nafn. Þá hefði enginn móðgast. Því það er klárt mál að þegar menn eru farnir að blanda eigin fjárfestingum við fjármál félaga sem þeim er falið að stýra eins og Þórólfur gerir þá á að víkja honum úr starfi. Það ættu eigendur KS sem eru jú fólkið í Skagafirði alvarlega að íhuga í stað þess að fara fram á afsökunarbeiðni. Þegar búið er að reka Þórólf Gíslason úr starfi Kaupfélagsstjóra þá mun Birgitta örugglega biðja alla hlutaðeigendur afsökunar að fyrra bragði.

[Garðar Valur Hallfreðsson, 30.5.2015 kl. 19:04]

Er Birgitta ekki Skagfirðingur sjálf?

[Wilhelm Emilsson, 31.5.2015 kl. 01:22]

Voðalega er þetta undarleg árátta að reyna að tefla landsbyggðinni gegn Reykvíkingum. Þetta er líka svo óþjóðlegt. 

[Jónas Ómar Snorrason, 31.5.2015 kl. 06:15]

Er þetta ekki elsta trixið í bókini um það, hvernig eigi að viðhalda misvægi atkvæða milli RVK. og landsbyggðar, að etja þeim saman.