Menntun er hvorki skyndibiti né hagtala

Menntaskólaárin eru viðskilnaður unglingsins við barndóminn og fyrstu skrefin í fullorðinsárin. Skyldunám er að baki og unglingurinn stendur frammi fyrir vali sem oftar en ekki markar stefnu sem líf hans tekur.

Illu heilli sitjum við uppi með menntamálaráðherra sem lítur fyrst og fremst á menntun sem hagtölu. Ráðherrann fékk þá hagtölu frá Samtökum atvinnulífsins, sem eru jú háborg menntavísinda, eins og allir vita, að íslensk ungmenni væru of lengi í skóla. Ráðherra ákvað á grunni hagtölu að leggja til atlögu við framhaldsskólann og breyta honum til samræmis við menntastefnu SA.

Þaulreyndir skólamenn reyna að koma vitinu fyrir ráðherra. Atli Harðarson prófessor við HÍ og skólastjóri fjölbrautaskóla til margra ára skrifaði grein í Morgunblaðið í gær um að menntun væri ekki skyndibiti. Lárus H. Bjarnason rektor við MH er á sömu slóðum í skrifum á visir.is

Þjösnagangur ráðherra gagnvart framhaldsskólum og hlutverki þeirra í samfélaginu kippir stoðunum undan fyrirkomulagi sem í áratugi hefur tryggt ungu fólki aðgang að menntun.

Mikilvægt að njóta menntaskólaára

Athugasemdir

[Jóhannes Laxdal Baldvinsson, 29.5.2015 kl. 15:41]

Skemmdarverkin sem Illugi er að vinna á skólakerfinu eru óskiljanleg. Hvenær fékk ráðherrann þetta vald og hver veitti honum það?  Ég man ekki eftir slíkri uppákomu hjá nokkrum öðrum menntamálaráðherra. Alltaf hafa allar breytingar farið í gegnum eðlilega umræðu í þjóðfélaginu eða allavega í þinginu. Núna ákveður einn maður að stytta stúdentsnám um eitt ár og sameina margar menntastofnanir í nafni hagræðingar!! Þessi maður er þjóðhættulegur og þarf að fjarlægja hann með hraði. Enda er hann löngu rúinn allra trausti nema formanns sjálfstæðisflokksins, sem af einhverjum óskiljanlegum ástæðum heldur hlífiskyldi yfir honum.

[Alfreð K, 29.5.2015 kl. 22:07]

Sammála, það er alveg glórulaust að ætla sér að stytta nám til stúdentsprófs með því að fækka árum í framhaldsskóla.  Hver ráðleggur þessum menntamálaráðherra eiginlega?  Af hverju hefur umræða um styttingu náms í grunnskóla á hinn bóginn, sem væri augljósasta og skynsamasta leiðin til að ná þessu markmiði, lítið sem ekkert verið rædd?

Man þessi menntamálaráðherra t.d. ekki eftir sínum eigin árum í M.R., hafði hann ekki nóg að gera þar öll fjögur árin, eða hvað?  Við hin höfðum það alla vega, og áttum okkur því klárlega á því að ef eitthvað er hefðu grunnskólaárin tíu e.t.v. mátt nýtast betur EN EKKI MENNTASKÓLAÁRIN, vonandi vaknar ráðherrann upp af þessari vanhugsuðu og miður vænlegu ráðagerð áður en verulegt tjón hlýst af ...