Össur gefst upp á Árna Páli, kýs Jón Gnarr

Fyrsti formaður Samfylkingar, Össur Skarphéðinsson, telur ekki að sitjandi formaður, Árni Páll Árnason, eigi möguleika að fylkja flokknum í stjórnarráðið og alls ekki í forsætisráðuneytið.

Össur telur Jón Gnarr eigi burði til að ná forsætisráðuneytinu úr höndum Framsóknarflokksins og leiða vinstristjórn til valda, samkvæmt frétt DV byggðri á fasbókarfærslu Össurar.

Össur er þekktur spriklari á vinstri vængnum og kom m.a. á koppinn Bjartri framtíð. Eftir því sem fyrsti formaður Samfylkingar spriklar meira verður vinstri vængur stjórnmálanna brotakenndari.

Athugasemdir

[Gunnar Heiðarsson, 30.3.2015 kl. 16:51]

Pólitískt nef Össurar er kannski ekki það næmasta í heimi, reyndar fáir sem hafa jafn stíflaðar pólitískar nasir og hann.

Í haust og fram á vetur ritaði hann margar og stundum langar greinar, bæði á fésbók sinni sem og í blað Jón  Ásgeirs, um að ekki væri spurning um hvort Sjálfstæðisflokkurinn myndi klofna, einungis hvenær. Taldi Össur þar einungis vera um dagaspursmál að ræða. 

Ekki hefur bólað á neinum klofning innan Sjálfstæðisflokks, þrátt fyrir spádóma Össurar. Hins vegar má Samfylkingin þakka það smæð sinni að hafa ekki klofnað á sögufrægum landsfundi flokksins, fyrir skömmu. Það er nefnilega erfitt að kljúfa flís.

Það er yfir höfuð lítið vit í spádómum Össurar, eins og hans pólitíska saga segir. Dæmið hér fyrir ofan er einungis eitt af mörgum. Mætti þar einnig telja ESB umsóknina, icesave lögin, svo fátt eitt sé nefnt. Alltaf hefur spámaðurinn Össur haft rangt fyrir sér.

Hitt gæti satt verið að hann sé búinn að fá nóg af sínum foringja og sé því farinn að leita fyrir sér um eitthvað annað, annað hvort nýjan foringja fyrir Samfylkinguna eða hann sjálfur færi sig um flokk. Ekki er þó víst að aðrir flokkar kæri sig um slíkan falsspámann í sínar raðir.