948 ár frá Hastings

Á þessum degi árið 1066 sigraði afkomandi norrænna manna í Normandí, Vilhjálmur bastarður, her Englandskonungs, Haralds Guðinasonar, við Hastings. Englendingar segja innreið norrænu Frakkanna upphaf lénsskipulags þar í landi. Og einmitt vegna léna Normandímanna í Frakklandi gerðu enskir konungar á síðmiðöldum tilkall til konungdóms í Frakklandi. Hlaust af hundrað ára stríðið þar sem þjóðardýrlingurinn Jóhanna af Örk lét að sér kveða.

Haraldur Guðinason mætti vígmóður til leiks í Hastings, Helsingjaport upp á norrænu. Aðeins tæpum þrem vikum áður barðist hann við nafna sinn harðráða Noregskonung. Í sögu Haralds harðráða segir Snorri Sturluson að eftir orustuna við Staffurðabryggju hafi konungur Engla og Saxa haldið suður.

En Haraldur snerist þá með her sinn suður á England því að hann hafði þá spurt að Vilhjálmur bastarður fór sunnan á England og lagði landið undir sig. Þar voru þá með Haraldi konungi bræður hans: Sveinn, Gyrður, Valþjófur. Fundur þeirra Haralds konungs og Vilhjálms jarls varð suður á Englandi við Helsingjaport. Varð þar orusta mikil. Þar féll Haraldur konungur og Gyrður jarl bróðir hans og mikill hluti liðs þeirra. Það var nítján nóttum eftir fall Haralds konungs Sigurðarsonar.

Orustan við Helsingjaport er áminning um hlut norrænna manna í enskri sögu og evrópska meginlandsins.

(Takk til RT).

 

Athugasemdir

[Ragnhildur Kolka, 14.10.2014 kl. 22:58]

það er mikil saga sem gerst hefur í Normandy og blóðug að mestum partí. Samkvæmt Bayeux reflinum þá.voru það svik Haraldar Guðvinsonar sem gerðu bardagann við Hastings nauðsynlegan. Refillinn gerir þó bardaga Haraldanna við Stamford Bridge engin skil, en sagnritarinn Orderic Vital sem fór þar um 70 árum síðar talar um að þar sé jörð enn þakin beinum þeirra sem þar féllu.

[Wilhelm Emilsson, 15.10.2014 kl. 05:50]

Takk fyrir pistilinn.

Eins og margir vita eru öll bæjarnöfn í Bretlandi sem enda a „by" og „thorpe", t.d. Grimsby og Scunthorpe, merki um áhrif norrænna manna.

Til gamans má geta þess að í nýju sértímariti Time, sem kallast Great Empires: Exploring the Powerful Civilzations That Changed the World, er veldi víkinga sett í flokk sem höfundarnir kalla Empires of Fear (Heimsveldi óttans). Þar eru víkingum skipað á bekk með Aztekum, Stalín, Maó og Kim Jong Un.

Greinin um víkingana kallast „Raiders from the Sea: The Vikings Spread Terror--and Trade--Across Europe," sem er nokkuð sanngjörn lýsing. Þó að sumir séu kannski svolítið súrir yfir því að forfeður okkar séu settir í fremur skuggalega flokk, þá er það tekið fram í greininni að Alþingi Íslendinga hafi verið fyrsta alþingi Evrópu.

Þegar ég er spurðum af enskumælandi fólki um forfeður mína segi ég stundum að víkingarnir hafi mætt á svæðið og sagt: "You can either trade with us. Or we can just take your stuff. What's it gonna be, folks?"

[Wilhelm Emilsson, 15.10.2014 kl. 05:58]

Leiðréttingar: „skuggalegan flokk" og „er spurður" :0)