Læk-umræðan og lýðræðið

Bloggið og samfélagsmiðlar eins og feisbúkk ættu að öðru jöfnu auka umræðu og þátttöku almennings í lýðræðissamfélaginu. Enginn þröskuldur er fyrir þátttöku og því ætti þúsund blóm að blómstra, eins og formaðurinn sagði á tímum menningarbyltingarinnar.

En það er ekki allt sem sýnist frjálsræði netheima. Síðuhaldari tók nýverið þátt í umræðu um eitthvert málefni á spjallþræði á feisbúkk. Eftir nokkur skoðanaskipti kom eftirfarandi athugasemd (skrifuð eftir minni): Páll fær fæst lækin af þeim sem taka þátt í umræðunni.

Þessi aðferð, að ,,læka" einstakar athugasemdir á spjallþráðum, er einhvers konar atkvæðagreiðsla í rauntíma. Lesendur umbuna athugasemdum sem þeim fellur í geð með ,,læki." Atkvæðagreiðsla á meðan umræðunni stendur er  ekki annað en yfirlýsing um stuðning við málsaðila en ekki málefni þar sem umræðunni er ekki lokið.

Við þessar kringumstæður verður umræðan morfís-keppni.

Athugasemdir

[Gunnar Heiðarsson, 30.9.2014 kl. 19:59]

Facebook er að tröllríða öllu og margir sem líta þennan miðil sem hinn eina sanna.

Sjálfur fer ég sárasjaldan inn á facebook, þessi miðill heillar mig einfaldlega ekki.

En eins og áður segir, þá virðist sem allt snúist um facebook. Sífellt fleiri netmiðlar tengja sitt athugasemdakerfi við þennan miðil og útiloka þáttöku nema viðkomandi sé samtímis tengdur facebook.

Fram til þessa hefur þó athugasemdakerfi eyjunnar-pressunnar verið opið öllum til lestrar, þó ekki hafi verið hægt að gera þar athugasemdir nema tengjast fyrst facebook. Nú er svo komið að til að geta lesið "hinn djúpa sannleik" sem fram kemur í athugasemdakerfi eyjunnar-pressunnar, þarf að tengjast facebook. Það er engu líkara en að netmiðlar séu í einhverskonar samstarfi við facebook og þröngvi fólki til að tengjast þeim miðli, til þess eins að geta haft gaman af umræðum.

Þá liggur fyrir að stjórnendur facebook hafa verið drjúgir að safna gögnum um allt sem fram fer inn á þeim miðli. Sá sem gerir athugasemd gegnum þennan miðil má því búast við að lenda í einhverskonar gagnagrunn og ef stjórnendur hanns sjá sér einhvern hag af því að selja þær upplýsingar, hikar hann ekki við það.

Það er annars merkilegt hversu miklum vinsældum þessi miðill hefur náð, um allann heim, eins opinn og óvarinn hann er og hvernig stjórnendur hanns haga sér.

[Heimir Lárusson Fjeldsted, 30.9.2014 kl. 21:49]

Ég hefi í gegnum árin sett stuttar athugasemdir við skrif á Eynni og víðar þegar ég er ekki sammála fullyrðingum valinna skriffinna sem flestir eru öfgasinnaðir vinstrimrnn. Þeim hefur mér vitanlega ekki verið skemmt.

Nú hafa þeir lokað á mig.

Það er ekki lokað á lækarana.

[Predikarinn - Cacoethes scribendi , 30.9.2014 kl. 23:54]

Sæll kæri Páll.

DV gerir gott betur en þetta. Þeir pönkast á þeim sem kommenta af Facebook þannig að þeir sem kommenta og eru þeim ekki þóknanlegir í skoðunum útiloka þeir og fela fyrir umheiminum.

Ótal einstaklingar hafa orðið fyrir barðinu á þessu á bæði dv,is og visir.is en þeir kommentera að vild en enginn nema þeir sjálfir sjá innleggin þeirra. Þeir eyða tíma sínum til einskis.

Vefstjórar þessara miðla stýra umræðunni á la KGB, STASI og MAÓ að hentugleik sínum.

Sama gerir Ísland-Paestína við innlegg á facebook síðu sinni. Eyða öllu út sem ekki fellur þeim í geð !

Sér er nú hvert skoðana- og umræðufrelsið á þessum frelsistalandi manneskjum sem stjórna þessum miðlum !

[Gunnar Rögnvaldsson, 1.10.2014 kl. 01:44]

Facebook er intranet (hið innra einkanet) fyrirtækisins Facebook Inc (ticker: NASDAQ:FB). Það hefur lítið með Internetið (Veraldarvefinn) að gera.

Facebook gæti alveg eins verið hið innra-net Landsbankans, eða Las Vegas Sands Corp. (ticker: NYSE:LVS)

Verði ykkur að góðu

Internetið er hins vegar Veraldarvefurinn (www) og er öllum opið og þar er hægt að leita og finna.

Kveðjur