Kennarar, unglingar og skilningsvana ráðherra

Unglingar, sem ættu að vera í skóla í dag, sitja vitanlega heima og læra upp á eigin spýtur enda vita allir komnir til vits og ára að allt nám er sjálfsnám. Nei, glætan, unglingar, nema í undantekningatilfellum, gera það sem þeim finnst skemmtilegast; hittast og spjalla, fara í tölvuleiki, sofa út og annað unglingalegt.

Svo eru aðrir unglingar sem eru í vinnu með skóla og nota verkfallið til að bæta við sig launavinnu og auka þénustuna.

Öllum íslenskum unglingum stendur til boða að ljúka stúdentsprófi á þremur árum enda bjóða allir áfangaskólar upp á þá leið og sumir bekkjaskólar einnig. Þorri íslenskra unglinga velur á hinn bóginn að nota fleiri ár til að ljúka stúdentsprófi. Þá eru ótaldir þeir sem geta ekki staðið undir námskröfum um fjögurra ára nám til stúdents og nota fimm eða sex ár.

Menntamálaráðherra lítur ekki á unglinga eins og lifandi mannverur heldur tölfræði. Samkvæmt tölum sem Illugi Gunnarsson fékk frá Samtökum atvinnulífsins, þeirri miklu miðstöð þekkingar á skólastarfi, nota íslenskir unglingar 14 ár til að taka stúdentspróf, sem er árinu lengra en hjá nágrannaþjóðum.

Illugi vill takmarka val unglinga til að ráða námshraða sínum og í leiðinni mun hann þrengja að möguleikum unglinga til að kynnast atvinnulífinu í gegnum launavinnu. 

Kennarar bera ekki ábyrgð á lífstíl unglinga (og það gerir ráðherra raunar ekki heldur). Engu að síður ætlar menntamálaráðherra að stytta þann tíma sem unglingar nota til að ná stúdentsprófi í gegnum kjarasamninga við kennara.

Verum viðbúin löngu verkfalli.

„Geri hreint fyrir sínum dyrum“

Athugasemdir

[Úrsúla Jünemann, 18.3.2014 kl. 17:02]

Margir framhaldsskólanema vinna með náminu, sérlega þeir sem geta ekki byggt á bakhjarl fjársterks heimilis. Að troða alla nema í sama þrönga kerfið að þurfa að klára námið á 3 árum er ekki það sem við köllum að menn geta stundað nám við sitt hæfi.