Menntamálaráðherra skilur ekki framhaldsskóla

Framhaldsskólar landsins þjóna tvíþættu hlutverki, að undirbúa nemendur undir háskólanám annars vegar og hins vegar að vera viðverustaður nemenda sem hvorki eru tilbúnir að ljúka námi á eðlilegum hraða né hverfa alfarið úr námi.

Menntamálaráðherra skilur aðeins þann hluta framhaldsskólans sem lýtur að undirbúningi nemenda undir háskólanám. Á fundi með Samtökum atvinnulífsins, jú það eru samtök hrunfólksins, fékk menntamálaráðherra þá tölu að íslenskir nemendur ljúki stúdentsprófi að meðaltali ári seinna en gengur og gerist í nágrannalöndum. Eftir þann fund klifar ráðherra á þessari einfeldningslegu tölfræði eins og hún sé allsherjarlausn.

Til að ná meðaltalsnámstíma niður þarf einfaldlega að úthýsa þeim nemendum sem ekki geta tekist á við nám til stúdentsprófs á þremur til fjórum árum. Það yrði gert með aukinni miðstýringu af hálfu ráðuneytis og stífari náms- og framvindukröfum. Og ef þetta er leið menntamálaráðherra til að þjónusta tölfræði Samtaka atvinnulífsins þá á hann að segja það og kannski láta svo lítið að útskýra hvað verði um þá nemendur sem hrökklast úr skóla.

Varla er menntamálaráðherra svo grænn að halda að Samtök atvinnulífsins taki við þeim nemendum sem framhaldsskólarnir myndu vísa frá sér til að ná niður meðalnámstíma til stúdentsprófs. Til þessa hafa Samtök atvinnulífsins ekki sýnt velferð ungs fólks neinn sérstakan áhuga.

Hugmyndir menntamálaráðherra og Samtaka atvinnulífsins um að stytta námstíma til stúdentsprófs tengjast ekki með nokkrum hætti þeirri staðreynd að kennarar í framhaldsskólum eru með verulega lægri laun, 17 prósent lægri dagvinnulaun og tíu prósent lægri heildarlaun, en sambærilegar stéttir hjá hinu opinbera. Menntamálaráðherra sem ekki skilur þessa staðreynd ætti að leita sér að nýju starfi.

Skapi svigrúm til launahækkana