Eimskip, óskabarnið og sagan

Landnámsmenn Íslands sigldu á eigin skipum vestur um haf á níundu og tíundu öld. Samkvæmt bestu heimildum, frásögnum og fornleifum, bjuggu Íslendingar vel á fyrstu öldum byggðar í landinu. Húsakostur var meiri og betri en síðar og samgöngur við útlönd, með tilheyrandi verslun, voru tíðari og tryggari.

Frá Íslandi varð til byggð norrænna manna á Grænlandi og allar líkur eru á að íslenskir farmenn hafi fyrstir Evrópumanna stigið fæti á meginland Ameríku.

Á tólftu og þrettándu öld breyttist afkoma Íslendinga til hins verra. Margt lagðist á eitt, s.s. veðurfar, innanlandsófriður og ásælni erlends konungsvalds. Íslendingar glötuðu skipakosti sínum og urðu háðir útlendingum um verslun, eins og sést af Gamla sáttmála.

Eimskipafélag Íslands var stofnað fyrir 100 árum í miðri sjálfstæðisbaráttunni. Enn voru við ekki orðin fullvalda en þó komin með heimastjórn. Eimskipafélagið var óskabarn þjóðarinnar vegna þess að með eigin skipastól vorum við ekki lengur upp á aðra komin með samgöngur við útlönd. Í huga aldamótakynslóðarinnar var íslenskt skipafélag handfastur veruleiki er vitnaði um sjálfstæði þjóðarinnar.

Eimskipafélagið er óskabarn þjóðarinnar vegna sögunnar. Eignarhald á félaginu í dag og rekstur þess breytir ekki sögulegum staðreyndum.

 

Óskabarn þjóðarinnar 100 ára

Athugasemdir

[Axel Jóhann Hallgrímsson, 5.1.2014 kl. 15:16]

Þú ættir Páll að kanna hvað kennitölur svonefnds Eimskipafélags Íslands eru orðnar margar áður en þú dælir út því sem þú kallar "sögulegar staðreyndir".

[Páll Vilhjálmsson, 5.1.2014 kl. 15:46]

Kennitölur voru ekki til þegar Eimskipafélagið var stofnað, Axel Jóhann. Það er söguleg staðreynd.

[Jóhann Páll Símonarson, 5.1.2014 kl. 16:18]

Vel mælt Páll Vilhjálmsson.

[Axel Jóhann Hallgrímsson, 5.1.2014 kl. 16:51]

Hvað kemur það málinu við Páll? 

Áður en kennitölur voru teknar upp hafði enginn, eins og gefur að skilja, kennitölu Páll, hvorki fyrirtæki eða einstaklingar, þá var notast við nafnnúmerakerfið fyrir bæði einstaklinga sem fyrirtæki. Það er söguleg staðreynd.

Við upptöku kennitölukerfisins var öllum úthlutað kennitölu, bæði einstaklingum og fyrirtækjum eftir sömu reglu. Sem var fæðingardagur einstaklinga og stofndagur fyrirtækja. Kennitölum var þannig úthlutað aftur í tímann. Allir halda sömu kennitölunni óbreyttri út lífið, bæði einstaklingar og fyrirtæki. Það er líka söguleg staðreynd. 

Þó kennitölur hafi ekki verið til þegar Eimskipafélagið (það elsta) var stofnað 1914 Páll,  þá breytir það ekki þeirri sögulegu staðreynd að skipt hefur verið a.m.k. tvisvar um kennitölu svonefnds Eimskipafélags Íslands á síðustu árum.

Breytt kennitala á einhverjum rekstri (kennitöluflakk) táknar aðeins eitt, að nýtt félag, nýr lögaðili, hefur tekið við rekstrinum. Nýja félagið (nýja kennitalan) telst ekki undir neinum kringumstæðum það sama og hið gamla, hvorki í lagalegum eða sögulegum skilningi, þó eigendur séu þeir sömu.

Því er það fölsun í öllum skilningi, ekki hvað síst sögulegum, að fullyrða að núverandi Eimskipafélag Íslands sé sama félagið og stofnað var í ársbyrjun 1914. 

[Páll Vilhjálmsson, 5.1.2014 kl. 16:59]

Eimskipafélagið er sama félagið þó að allir stofnendur félagsins, og þeir skiptu þúsundum, séu látnir. Þá er Eimskipafélagið sama félagið þótt eignarhaldið hafi breyst og/eða reksturinn færst á aðra kennitölu.

[Axel Jóhann Hallgrímsson, 5.1.2014 kl. 17:27]

Ertu búinn að greina skattinum og fyrirtækjaskrá frá þessari opinberun Páll? Þeir hafa ekki áttað sig á þessu sjálfir svo þeir væru vísir til að gauka að þér smá sögubita.

[Axel Jóhann Hallgrímsson, 5.1.2014 kl. 17:42]

Þú ættir að kíkja á það Páll hvort fullt samræmi sé í túlkun þinni á þessari  kennitölu brellu og fyrri skrifum þínum um þau mál.

[Páll Vilhjálmsson, 5.1.2014 kl. 17:47]

Axel Jóhann, færslan mín var um upphaf Eimskipafélagsins og hvers vegna það fékk heitið óskabarn þjóðarinnar. Þú ert með aðra nálgun, sem ekki byggir á atburðum fyrir 100 árum heldur seinni tíma eigendum.

[Jóhann Páll Símonarson, 5.1.2014 kl. 18:03]

Páll Vilhjálmsson. Hárrétt hjá þér.

Jóhann Páll Símonarson

[Axel Jóhann Hallgrímsson, 5.1.2014 kl. 19:07]

Jæja, er þetta orðið spurning um nálgun? Það er nákvæmlega sama hvaða nálgun þið félagarnir beitið fyrir ykkur, dómstólar landsins myndu aldrei taka til greina þá kröfu ykkar að núverandi Eimskipafélag teljist sama félagið og stofnað var 1914.

[Ómar Ragnarsson, 5.1.2014 kl. 21:20]

Eitt af ákvæðum Gamla sáttmála sneri að því að Noregskonungur tryggði skipasamgöngur við Ísland. Þær gátu landsmenn greinilega ekki lengur annast sjálfir svo viðunandi væri, annars hefði þetta ákvæði varla verið þarna.

Þess vegna var stofnun Eimskipafélagsins svo mikilvægur liður í sjálfstæðisbaráttunni, liður í því að afmá ástand sem átti þátt í að þjóðin missti sjálfstæði sitt.

[Jóhann Páll Símonarson, 5.1.2014 kl. 23:30]

Það er nefnilega málið og vel mælt hjá þér Ómar Ragnarsson.

Jóhann Páll Símonarson.

[Axel Jóhann Hallgrímsson, 6.1.2014 kl. 00:34]

Jóhann Páll, það sem Ómar segir er allt satt og rétt. En það breytir ekki þeirri staðreynd að núverandi Eimskipafélag er ekki sama félagið og var stofnað 1914.

Fram kemur í gögnum fyrirtækjaskrár að Eimskipafélag Íslands kt. 461202-3220 hafi verið afskráð úr fyrirtækjaskrá og félaginu slitið 09.05.2007 Afskráning/félagsslit).

Núverandi Eimskipafélag hefur kennitöluna 690409-0460 og er því stofnað 29. apríl 2009 eða tveim árum eftir að forvera þess var formlega skitið. Það félag hafði hinsvegar kennitölu frá 06.12.2002. Lengra aftur ná ekki rafrænar upplýsingar rsk.

Þarna eru komnar a.m.k tvær kennitölur í "líflínu" Eimskips auk upphaflegu kennitölu félagsins.  

Ertu enn á því að hér sé um að ræða eitt og sama félagið með samfellda starfsemi frá 1914?

Núverandi Eimskipafélag getur aðeins fagnað 5 ára afmæli á árinu. Ekkert breytir þeirri staðreynd.

[Axel Jóhann Hallgrímsson, 6.1.2014 kl. 00:38]

Jóhann Páll hér er bein slóð inn á upplýsingar um Eimskipafélagið hjá ríkisskattstjóra, þú getur kannað þetta sjálfur.

 http://www.rsk.is/fyrirtaekjaskra/leit?nafn=eimskipaf%C3%A9lag+%C3%ADslands&heimili=&kt=&vsknr