Lögfræði Sigurðar G.

Samkvæmt lögfræði Sigurðar G. Guðjónssonar er allt í lagi að stela ef einhver annar en sá sem stolið er frá ber tjónið.

Í lögfræði Sigurðar G. er hægt að myrða með þeim rökum að sá dauði dræpist hvort eð er.

Í lögfræði Sigurðar G. má meiða saklausa með þeim rökum að um síðir grær um heilt.

Lögfræði Sigurðar G. er uppskrift að samfélagi sem heitir á latínu homi homini lupus, - maður er manni úlfur. 

Athugasemdir

[Hrafn Arnarson, 13.12.2013 kl. 23:44]

Homo homini lupus est.

[Ásthildur Cesil Þórðardóttir, 14.12.2013 kl. 03:01]

Góður, málið er að í þessum dómi og umfjöllun um hann endurspeglast alveg ótrúlegt siðleysi margra, samanber Brynjar Níelsson, sem ætlar ekki að vinna fyrir banka, af því að dómarar eru svo vondir við bankafólk, og nú Sigurður, Það er eitthvað verulegt að siðferði sumra íslendinga og þeir eru svo sannfærðir í eigin siðleysi að þeir opna sig algjörlega fyrir okkur hinum, sem horfum agndofa á.

[Gunnar Heiðarsson, 14.12.2013 kl. 07:36]

Sigurður harmar að sjeikinn skyldi þurfa að borga hluta þess láns sem á hann var skrifað, jafnvel þó hlutabréfin hafi orðið verðlaus við hrun bankans.

Flestir þeirra sem höfðu tekið lán til hlutabréfakaupa í fyrirtækjum sem hrundu við fall bankanna sitja uppi með þá skuld að fullu. Að vísu hafa verið felldar niður skuldir hjá sumum sem keyptu hlutbréf með þeim hætti í bönkunum, sérstaklega hjá þeim sem unnu við þá sömu banka, en heilt yfir lendir slíkt tjón að fullu á þeim sem tóku lán fyrir hlutabréfakaupum. Því er sjeikinum lítil vorkun.

Hitt er svo annað mál að sjeikinn gæti auðvitað sótt þá til saka sem svindluðu á honum, þó reyndir menn á hlutabréfamarkaði eigi að vita að kaup á hlutabréfum eru í sjálfu sér áhættufjárfesting og til slíkrar fjárfestingar nota menn ekki lánsfé.

Um siðleysi Sigurðar þarf enginn að efast. Það hefði verið heiftarlegt stílbrot hjá honum að sleppa því að tjá sig um þetta mál og málflutningurinn er eins og við mátti búast.