Vigdís bjargar ríkisstjórninni

Þeir sem segja Vigdísi Hauksdóttir gera ríkisstjórninni ógagn bera lítið skynbragð á pólitík. Vigdís Hauksdóttir er bjargvættur ríkisstjórnarinnar með því að hún nánast ein síns liðs gengur á hólm við stjórnarandstöðuna, tappar af henni öskrin og auðveldar ríkisstjórninni eftirleikinn.

Á meðan aðrir þingmenn Framsóknarflokksins snökta í þingflokksherbergjum, sem kunna að vera hleruð af Pírötum, stendur Vigdís í stafni og tekur við spjótalögum stjórnarandstöðunnar.

Allir eldri en tvævetur vita að í vinstriflokknum býr ómæld vanmetakennd sem verður að fá reglulega útrás. Vigdís mætir að morgni í RÚV, spilar nokkrar nótur á lyklaborð vinstrimanna, og það er eins og við manninn mælt; eftir hádegi blása þingmenn Samfylkingar og VG eins og físibelgir.

Þingmenn vinstriflokkanna eru að upplagi stemningarfólk án úthalds. Þegar þeir hafa blásið vegna Vigdísar liggja þeir út um víðan völl eins og sprungnar blöðrur. Og ríkisstjórnin fær starfsfrið.

Vigdís Hauksdóttir er margra þingmanna maki og ætti að vera ríkisstjórn Framsóknarflokks og Sjálfstæðisflokks sérstaklega kær liðsmaður.

Athugasemdir

[Ívar Pálsson, 12.12.2013 kl. 15:49]

Vigdís Hauksdóttir segir einmitt það sem segja þarf, sbr. um þróunaraðstoð. Aðrir stjórnarþingmenn ættu að taka undir með henni, en það eru ekki margir sem þora að segja sannleikann eins og hún.

[Elle_, 13.12.2013 kl. 00:38]

Vigdís Hauksdóttir hefur verið einn okkar langhæfasti alþingismaður og stjórnmálamaður síðan hún fór í stjórnmál.  Vigdís er hrein og bein.  Og þorir, eins og Ívar sagði.

[Kristinn Snævar Jónsson, 13.12.2013 kl. 10:15]

Nú bregður svo við, Páll, að þessi pistill er hinn skemmtilegasti aflestrar, grínið og glöggskyggnin allsráðandi. Ekki veitir af í ásókn skammdegisins.

Já, það er ekki ofsögum sagt að Vigdís Hauksdóttir er einn litríkasti þingmaðurinn á Alþingi núna vegna þess að hún þorir að tjá íspekúlerandi hugmyndir og varpa meðal annars viðkvæmum og ögrandi spurningum fram til umræðu og skoðanaskipta. "Orð eru til alls fyrst" segir máltækið.

[Elle_, 13.12.2013 kl. 20:50]

Kristinn, hvar er grínið í pistlinum?  Orð eru til alls fyrst skrifaðirðu, en hvað þýða þessi orð? 

[Helga Kristjánsdóttir, 15.12.2013 kl. 04:31]

Snökkta,? Hvar er karlmannslundin og kjarkur sá er prýðir hraustan mann. Vigdís er í eldlínunni á leikvellinum og lætur verkin tala.

[Kristinn Snævar Jónsson, 15.12.2013 kl. 17:00]

Elle. Svo virðist sem þú hafir misskilið mig. Ég er ekki að tala hér í öfugmælum um Vigdísi, heldur þvert á móti bókstaflega.

Páll lýsir upphlaupasamri orðræðu stjórnarandstæðinga í S og VG gagnvart Vigdísi og fleirum mjög vel, þ.e. að þegar "spilaðar eru nokkrar nótur á lyklaborð vinstrimanna" að morgni sé það eins og við manninn mælt að "eftir hádegi blása þingmenn Samfylkingar og VG eins og físibelgir". Maður sér fyrir sér kippt í spottann á sprellikarli.

[rhansen, 15.12.2013 kl. 17:14]

Flottur pistill Páll .flott svar Kristinn Sævar ...flottust Vigdis Hauksdottir !...og eg trúi ekki öðru en hún se á innleið i Rikisstjórn um áramót ....öðruvisi heldur ekki Stjórnin sjó á gagnvart " fúlum" á móti ::::