Heimir Már talar hátt en segir fátt

Heimir Már Pétursson fréttamaður skrifar undarlega grein í Fréttablaðið í dag. Greinin er sneisafull af stórum yfirlýsingum um hve illa er komið fram við RÚV. Önnur efnisgreinin er svohljóðandi:

Það er sorglegt og raunar ekkert annað en ógnvænlegt hvernig hluti valda- og á stundum forréttindastéttarinnar í landinu ræðst ítrekað með ruddalegum dólgshætti að fréttastofu Ríkisútvarpsins og oft nafngreindum fréttamönnum þar. Þetta er slíkur ruddaskapur að sæmir ekki siðuðu samfélagi sem, í orði alla vega, kennir sig við lýðræði.

Heimir Már tilfærir ekki eitt einasta dæmi um ,,ruddalegan dólgshátt" gagnvart RÚV. En vegna þess að Heimir Már býr að reynslu af fjölmiðlastörfum í meira en tuttugu ár hlýtur hann að hafa skoðun á eftirfarandi:

- Er það eðlilegt að fréttamaður RÚV hóti málssókn þegar bloggari út í bæ hefur skoðun á fréttaflutningi RÚV og segir þá skoðun undir fullu nafni?

- Á RÚV ekki að biðjast afsökunar á því þegar fréttamaður leggur viðmælenda orð í munn?

- Er ekki eðlileg krafa að fréttamenn RÚV fari rétt með grunnstaðreyndir pólitískra álitamála.

- Á RÚV að komast upp með það að svara ekki rökstuddri gagnrýni á raðfréttir RÚV sem bersýnilega hafa pólitískt markmið?

Heimir Már hlýtur að hafa skoðun á þessum álitamálum, sem vel að merkja eru ekki uppfinning ,,valda- og forréttindastéttar landsins."

Athugasemdir

[Vilhjálmur Eyþórsson, 21.8.2013 kl. 15:06]

Það segir sína sögu hverjir það eru, sem nú rjúka upp til hana og fóta til varnar RÚV. Það eru allt saman vinstri menn. Hvers vegna? Gagnrýni á Ríkisútvarpið er nefnilega ekki í neinum skilningi „atlaga að fjölmiðlamönnum“ eða enn síður málfrelsi. Þetta er ekki einkamiðill, heldur hafa tilteknir aðilar hertkið opinbera stofnun og nota hana sjónarmiðum sínum til framdráttar. Þetta snýst um menn sem nánast daglega misnota það traust sem þeim hefur verið sýnt til að troða einkaskoðunum sínum upp á þjóðina á kostnað almennings, sem er beinlínis neyddur til að sitja undir þessu. Allt þetta tal um „árásir á tjáningarfrelsið“ er gjörsamlega út í hött

[Gunnlaugur I., 21.8.2013 kl. 20:52]

Algerlega sammála síðuskrifara og Vilhjálmi Eyþórssyni hér að ofan.