Stjórnarandstaða Samfylkingar

Á kjörtímabilinu sem er að líða hefur Samfylkingin rekið stjórnarandstöðupólitík þrátt fyrir að vera ríkisstjórnarflokkur. Stjórnarandstaðan birtist í því að flokkurinn telur helsta hagstjórnartæki ríkisvaldsins, gjaldmiðilinn, ónýtt verkfæri. Þá var stjórnarandstöðufnykur af herför Samfylkingar gegn stjórnskipuninni, sem átti að kollvarpa með nýrri stjórnarskrá.

Samfylkingin herjaði á fiskveiðistjórnunarkerfið og fann undirstöðuatvinnuvegi þjóðarinnar allt til foráttu. Baráttan fyrir aðild Íslands að Evrópusambandinu var háð á stjórnarandstöðuforsendum með því að öll áherslan var á hversu Ísland væri lélegt og lágkúrulegt í samanburði við Evrópusambandið.

Samfylkingin bar ábyrgð á landsstjórninni á sama tíma og flokkurinn gekk skipulega til verks að grafa undan tiltrú almennings á ríkisvaldinu. Kjósendur skynja þessa mótsögn og yfirgefa flokkinn í þúsundavís.

 

Athugasemdir

[Helga Kristjánsdóttir, 22.4.2013 kl. 12:08]

Nákvæmlega þannig upplifði ég þennan flokk á fyrstu metrunum í ríkisstjórn. Síðan heilög vandlæting þeirra á þeim ,,trúlausu,, og meðferðinni á þeim,minnir á fariseana sem berja sér á brjóst,nema hverjum þakka þeir sitt galna geð,?