Mótsögn Samfylkingar lamar flokkinn

Samfylkingin mælist með 12 prósent fylgi en fékk tæp 30 prósent í síðustu kosningum. Meginástæða fyrir hruni Samfylkingar er innri mótsögn í málflutningi flokksins. Ólína Þorvarðardóttir þingmaður flokksins og Gylfi Arnbjörnsson forseti ASÍ og stuðningsmaður flokksins eru fulltrúar fyrir þessa mótsögn.

Ólína skrifar grein í Morgunblaðið í dag þar sem hún segir ríkisstjórn Samfylkingar hafa varið stöðu lægst launuðu hópa samfélagsins fyrir afleiðingum hrunsins. Og það er laukrétt hjá Ólínu. Það tókst að verja atvinnu fólks, sem er frumforsenda fyrir því að fólk geti bjargað sér.

Gylfi skrifar hlemm á Pressuna sem er samfelld árás á íslensku krónuna. En án krónunnar hefði ekki verið hægt að halda uppi atvinnu eftir hrun. Írar, sem lentu í hruni á sama tíma og við, eru með 15 prósent stöðugt atvinnuleysi.

Mótsögn Samfylkingar er þessi: í ríkisstjórn tókst flokknum að verja stöðu launafólks með stjórntækjum fullvalda ríkis; bankarnir fóru í gjaldþrot og gengi krónunnar lækkaði sem tryggði atvinnuna. Stefna flokksins er aftur á móti sú að farga fullveldinu og krónunni og láta Brussel sjá um velferðina á Íslandi.

Kjósendur sjá hversu illa evran leikur hagkerfi Íra, Grikkja, Portúgala, Spánverja og Kýpverja og spyrja hvers vegna í ósköpunum við ættum að láta Evrópusambandið og evruna rústa framtíð lands og þjóðar.