Ólafur Ragnar er maður ársins

Rökstuðningurinn fyrir Ólafi Ragnari sem manni ársins er úr bloggi skrifuðu skömmu eftir að hann tilkynnti að Icesave-samningur Jóhönnu og Steingríms J. færi í þjóðaratkvæðagreiðslu. Þar skoraði forsetinn stórt.

 

Fimmtudagur, 7. janúar 2010

Forsetagígabæt í þágu þjóðar

Ólafur Ragnar Grímsson ber höfuð og herðar yfir íslenska stjórnmálamenn og sannaði það rækilega á tveim fundum með blaðamönnum, öðrum í BBC og hinum á heimaslóðum. Í BBC hélt hann vel sínu og kom málstað landsins á framfæri gagnvart höggþungum spyrli sem jafnan lætur viðmælendur sína ekki komast upp með moðreyk.

Á blaðamannafundi með íslenskum blaðamönnum var forsetinn fullorðinn meðal barna. Spurningu frá blaðamanni um hvort forsetinn hlypi á eftir skoðanakönnunum en léti almannahag um lönd og leið svaraði Ólafur Ragnar þannig að ef valið stæði á milli lýðræðisvilja þjóðarinnar og markaðarins myndi hann ávallt velja það fyrrnefnda. Blaðamaðurinn sem hafði skreytt mál sitt með enskum orðum, ,,public interest," og ,,public opinion" kom út eins og hálfviti en forsetinn snillingur.

Ólafur Ragnar hefur marga fjöruna sopið á ferli sínum. Ef innrætið væri í takt við snilli hans myndi þjóðin gera 14. maí að degi er stæði á milli 17. júní og 1. desember að hátíðleika.

 

Athugasemdir

[GB (IP-tala skráð) 27.12.2010 kl. 08:45]

Mikið rétt og ég kaus hann í Vísi kosningunni.

[Hilmar Þór Hafsteinsson (IP-tala skráð) 27.12.2010 kl. 10:24]

Eins og venjulega ert þú úti á túni í ályktunum og niðri á Hlemmi í rökunum, Palli minn. Snilldin liggur ekki hjá forseta Íslands, hvað sem hann nú heitir sá góði maður. Snilldin liggur hjá þjóðinni sem setti forsetann upp að vegg í IceSave-málinu. Liðlega 60.000 (sextíuþúsund) kosningabærir landsmenn skrifuðu undir áskorun til forsetans - sem hann gat ekki neitað að verða við.

Hvar varst þú Palli minn þegar við fórum í blysför á Bessastaði í byrjun ársins? Ég sá þig ekki á staðnum, en ef þú hefðir verið staddur þarna þá hefði þú séð meðlimi inDefence-hópsins afhenda forsetanum undirskriftalistann. Þeir heiðursmenn eru menn ársins.

Orsök og afleiðing, Palli minn - orsök og afleiðing.

[Elle_, 28.12.2010 kl. 01:38]

Nei, InDefence-menn geta ekki verið heiðursmenn ársins, Hilmar, vegna þess að þeir hafa alltaf verið viljugir að semja um ICESAVE.  Um kúgun verður ekki samið hinsvegar.