Forystukreppa hjá Vinstri grænum

Steingrímur J. Sigfússon formaður Vg sagði skilið við þorra félagsmanna flokksins á málefnaþingi um utanríkismál um helgina. Afgerandi meirihluti flokksmanna vill draga umsókn Íslands um aðild að Evrópusambandinu tilbaka. Ekki aðeins hefur formaðurinn sagt skilið við flokksmenn heldur veruleikann sjálfan.

Á Eyjunni er gert grín að Steingrími J. sem fyrir fimm árum sagði að engin þjóð sækti um aðild að Evrópusambandinu nema að ætla sér að ganga inn. Í dag segir sami stjórnmálamaður að það sé fyllilega í lagi að sækja um aðild að Evrópusambandinu með þann eindregna ásetning að ætla ekki að ganga inn.

Eftir því var tekið hve fámennt málefnaþing Vg var um helgina. Eftir að það var gefið út að ekki yrði ályktað um ESB-mál nennti fólk ekki að mæta. 100 flokksmenn sendu áskorun um að undið yrði ofan af Brusselleiðangrinum en sátu samt flestir heima því skipulag fundarins leyfði ekki að ályktað yrði um málið. Flokksdeyfð einkennir Vg um þessar mundir, á fund ungliðahreyfingarinnar í Reykjavík fyrir tveim vikum mættu fimmtán manns.

Flokksdeyfð í baráttuflokki eins og Vg er upphaf að dauða flokksins. Trúnaðarmenn flokksins á alþingi og sveitarstjórnum hafa aðeins um tvo kosti að velja. Að skipta út veruleikafirrtum formanni eða horfa upp á hægfara dauða Vg.

Athugasemdir

[Gunnlaugur I., 24.10.2010 kl. 20:19]

Algerlega sammála þér Páll.

Sérstakt Málefnaþing um ESB málin er svo bara "plat"sem fær svo ekkert um málin að segja. Þetta er svona eins og Stalín sjálfur stjórni þessum vonarflokki íslenskrar alþýðu !

Þvílíkt flokks- og foryngjaræði.

Í þessum flokki er fullt af ágætis fólki með hreinar og góðar skoðanir en þarf að sæta þessu, hvenær gerir grasrótin og hinn almenni stuðningsmaður flokksins hreina uppreisn gegn þessu liði !

[Jóhann Elíasson, 24.10.2010 kl. 22:13]

Mér er sagt að vegna þess að Heilög Jóhann sé að hætta og ekkert formannsefni sjáanlegt fyrir Landráðafylkinguna, sé Steingrímur Joð að hugsa sér gott til glóðarinnar og hætti í VG og gangi í Landráðafylkinguna og sjái fyrir sér að verða þar formaður.  Ekki skal gleyma því að hann hætti í Alþýðubandalaginu "gamla" vegna þess að hann fór í fýlu yfir því að hafa tapað formannskosningu fyrir Margréti Frímannsdóttur og stofnaði upp úr því VG.  Sumir myndu segja að hann væri bara að fara "heim".