Hringurinn þrengist um Samfylkinguna

Almennt er talið að Vg og Sjálfstæðisflokkurinn geti ekki unnið saman. Vg sem arftaki róttækra stjórnmála er yst til vinstri í hefðbundnu pólitíska litrófinu. Sjálfstæðisflokkurinn er dæmigerður norrænn hægriflokkur og stæði alla jafn nær samstarfi við Framsóknarflokk og Samfylkingu en Vg. Aftur eru þau umskipti að verða að Samfylkingin er orðin hornkerlingin á alþingi.

Samfylkingin stendur einangruð í stærsta pólitíska álitamáli seinni ára, afstöðunni til aðildar að Evrópusambandinu. Enn eru taugar á milli atvinnustefnu Samfylkingar og auðrónadeildar Sjálfstæðisflokksins, svo sem í Magma-málinu og herþotufyrirtækinu. Bólvirki auðrónadeildarinnar er í Reykjanesbæ sem Árni bæjó Sigfússon er að keyra í þrot.

Auðrónadeild Sjálfstæðisflokksins er á leiðinni oní ræsið og þar með losnar enn um málefnalega samstöðu Samfylkingar og Sjálfstæðisflokks.

Allar líkur eru á að Vg styrki stöðu sína á næstunni. Sjálfstæðisflokkurinn verður að gera hosur sínar grænar ef hann ætlar að eiga kost á setu í ríkisstjórn næstu árin.

Athugasemdir

[Jón Ingi Cæsarsson, 5.9.2010 kl. 20:21]

Páll.. allir nema þú sjá að VG og Sjálfstæðisflokkur gætu aldrei átt samleið í auðlinda og atvinnumálum.. og þarf nú ekki sérlega glöggt fólk til að sjá það.

[Guðmundur 2. Gunnarsson (IP-tala skráð) 5.9.2010 kl. 21:31]

Jón Ingi.  Sáu einhverjir "sérlega glöggir" fyrir utan þig, að Samfylkingin og VG ættu nokkra samleið hvað Icesave og ESB varðaði?

[Hrafn Arnarson (IP-tala skráð) 5.9.2010 kl. 23:41]

Flóknar hugsanir Páls finna sér enn flóknara form. Á íslensku segir maður að gera hosur sínar grænar fyrir einhverjum. Dæmi; hann gerði hosur sínar grænar fyrir laglegu stúlkunni. Þetta virðist ofar skilningi Páls. Sjálfstæðisflokkurinn á að gera hosur sínar grænar.(punktur)Ef við gerum ráð fyrir því að hosur Sjálfsttæðisflokksins séu bláar þáa verða þær grænar ef hann leggur meiri áherslu á umhverfismál og nálgast þannig Vinstri græn. Hver veit?

[Elle_, 6.9.2010 kl. 00:48]

Mér fannst ´bæjó´og ´grænu hosurnar´í pistlinum akkúrat passa við.  Verður maður endilega að skrifa í grafalvarlegum stíl með allar kommur og punkta nákvæmlega eftir orðabókum?  

[Hrafn Arnarson (IP-tala skráð) 6.9.2010 kl. 13:58]

Þetta er ekki sambærilegt. Bæjó er stytting og oft notað sem gæluyrði um bæjarstjóra. Að gera hosur sínar grænar(punktur) er málvilla. Ég skal endutaka það sem ég sagði. Athugasemdir Páls einkennast af hugsanavillum og málvillum. hvorutveggja er slæmt.