Forræðisstofa ríkisins

Blaðamaður Economist sagði síðuhaldara einu sinni frá því að hratt hafi fjarað undan Margréti Thatcher og frjálshyggju hennar þegar hugtakið markaðsbrestur komst í umferð. Markaðurinn átti samkvæmt frjálshyggjunni að ráða við flestan vanda í efnahagskerfinu. Hugtakið markaðsbrestur fékk áheyrnþegar í ljós kom að markaðsvæðing skilaði ekki alltaf þeim árangri sem að var stefnt.

Forsendubrestur er íslenskt eftirhrunshugtak sem m. a. er notað í þágu skuldara sem ekki vildu standa skil á gengislánum. Hæstiréttur gerði frekari umræðu um forsendubrest óþarfa.

Orðin móta skilning okkar á heiminum. Næsta hugtak eftirhrunsamfélagsins gæti verið forræðisbrestur og lýst ástandi þar sem fólki er ekki treyst fyrir forræði eigin mála vegna þess að þegar það hefur klúðrað fjármálum sínum hressilega leggst það upp á samfélagið sem sér ekki önnur úrræði en svipta það sjálfsforræðinu. 

Forræðisstofa ríkisins mun meta hverjir uppfylla skilyrði til sjálfsforræðis.

Athugasemdir

[dýri (IP-tala skráð) 7.7.2010 kl. 15:07]

Sæll Páll,

Er forsendubrestur ekki orðskrípi því það sem gerðist var að auðvaldinu var gefinn algerlega laus taumurinn án nokkurs eftirlits né aðhalds af nokkru tagi.  Stjórnmálamenn úr flestum flokkum brugðust algerlega eða voru á mála mismunandi fjármálagengja.  Afleiðingin var sú að öllu var rænt af þessum gengjum og því síðan mótmælt harðlega að nokkuð væri að af stjórnmálamönnum allt þar til skipið sökk í hafið.  Land þar sem traust á stjórnvöld er á pari við það sem minnst gerist í heiminum er einfaldlega í djúpum skít.  Það virðist engu skipta hvaða flokkur á í hlut og það virðist engin hafa "lært" neitt af hruninu, farsinn heldur áfram.  Hvar eru foringjar þessa lands? Hvernig í ósköpunum endar þetta? Nú verður eitthvað að gerast því annars fer hér allt í bál og brand.

[Steinunn (IP-tala skráð) 7.7.2010 kl. 15:41]

VG mun beita sér fyrir stofnun forræðisstofu.

Fellur vel að hinni kommúnísku hugmyndafræði og tryggir flokkssnötum vinnu hjá almáttugu ríkisvaldinu.

[Baldur (IP-tala skráð) 7.7.2010 kl. 16:06]

Í stuttmyndinni Í draumi sérhvers manns, vinnur söguhetjan hjá Gildismati ríkisins. Bara spurning um tíma hvenær það verður sett á fót.