RÚV: málfrelsi mikilvægt í útlöndum ekki á Íslandi

RÚV hrökk i yfirgír að verja málfrelsið eftir að vinstrifrjálslyndum spjallþætti Jimmy Kimmel var slaufað. Fréttir og Kastljós RÚV segja þá sögu að málfrelsið sé mikilvægt, næsti bær við takmörkun á málfrelsi sé einræði. Á daginn kemur að RÚV ber fyrir brjósti málfrelsi í útlöndum en ekki á Íslandi. Fyrir stuttu flutti RÚV ábúðarmikla frétt í samvinnu við Samtökin 78 að málfrelsið væri hættulegt.

Í samvinnufrétt RÚV og Samtakanna 78 var sagt með velþóknun frá nýjum brotaflokki í skrám lögreglu um ,,hugsanlega" hatursglæpi. Brotaflokkurinn er tekinn upp að áeggjan Samtakanna 78. Lífsskoðunarfélaginu finnst málfrelsið hættulegt og RÚV tók undir. Fyrirsögnin tekur af allan vafa um hver afstaða RÚV er til tjáningarfrelsis hér á landi:

Þörf á löggjöf sem hefur raunverulegan fælingarmátt

RÚV segir okkur að nauðsynlegt sé að setja ströng lög hérlendis sem fæla menn frá því að tjá hug sinn um samfélagsmál. En í erlendum fréttum er það helst að málfrelsi telst hornsteinn lýðræðisins, hvorki meira né minna. 

Á laugardag sagði tilfallandi frá glænýrri niðurstöðu hæstaréttar Íslands í máli Aðalsteins Kjartanssonar blaðamanns gegn tilfallandi. Hæstiréttur hafnar að endurskoða dóm landsréttar þar sem tilfallandi var sýknaður af kröfum Aðalsteins.

Aðalsteinn krafðist ómerkingar ummæla, miskabóta og að tilfallandi greiddi honum málskostnað. Landsréttur dæmdi að tilfallandi hefði nýtt sér stjórnarskrárvarið málfrelsi til að fjalla um samfélagslega mikilvægt málefni, byrlunar og símamálið. Aðalsteinn og fleiri blaðamenn á RÚV, Stundinni og Kjarnanum (RSK-miðlum) áttu beina eða óbeina aðild að byrlun Páls skipstjóra Steingrímssonar og stuldi á síma hans. Landsréttur og hæstiréttur eru sammála um að fullt tilefni hafi verið til að fjalla um aðkomu fjölmiðla og blaðamanna að byrlunar- og símamálinu.

Segir RÚV frá niðurstöðu hæstaréttar? Spyr RÚV Aðalstein, sem er fyrrum fréttamaður á RÚV, hvers vegna hann sem blaðamaður beitir sér gegn málfrelsinu? Fær RÚV álitsgjafa til að segja að einstakt sé á vesturlöndum að blaðamenn gangi fremst í flokki að hefta málfrelsið? Er formaður Blaðamannafélags Íslands kallaður til og spurður hvort allt sé með felldu hjá stéttinni þegar þrír félagsmenn stefna bloggara og krefjast þöggunar á samfélagslega mikilvægu máli? Notar RÚV tækifærið og rifjar upp helstu málsatvik byrlunar- og símamálsins?

Svarið við öllum ofangreindum spurningum er nei. RÚV þegir þegar málfrelsið er í hættu á Íslandi en þenur sig þegar hallar á tjáningarfrelsið í útlöndum. Ríkisfjölmiðillinn er áróðursmiðstöð ekki faglegur fréttamiðill.