Fjárhags- og áhrifatengsl RÚV og vinstrimanna

Dagur Bergþóruson E. sótti sér tíu milljónir í borgarsjóð þegar hann hætti sem borgarsjóri. Dagur tók sér löng frí sem borgarstjóri og lét ekki ná í sig þegar óþægilegar spurningar kröfðust svara. Hann var illa liðinn sérhagsmunapotari sem hoppaði á vinsældarvagn Samfylkingar-Kristrúnar í tæka tíð fyrir borgarstjórnarkosningar og fékk þingsæti.

Dagur veit ekkert um rekstur, nema það helst að þegar veltan er mikil má sækja sér launauppbót á fölskum forsendum um ótekið orlof. Dagur telur sjálfum sér trú um að hann kunni sitthvað fyrir sér í pólitískum áróðursstríði. Hann pantar skýrslu sem klæðir í tölfræðibúning Seðlabankamál, Namibíumál, skæruliðamál, að ógleymdri sápuseríunni um Verbúðina - allt raðframleiðsla RÚV og allt skáldskapur. Út á það gengur pólitík vinstrimanna. Þeir sinna ekki embættisstörfum sínum. Hanna Katrín atvinnuráðherra spilar frekar golf en að mæta atburði á vettvangi atvinnulífsins. Ráðherra neitar að svara þegar hún er spurð um forgangsröðunina. Vinstrimenn í áhrifastöðum eru latir til vinnu en duglegir að setja á flot samsæriskenningar.

Eignarhald í sjávarútvegi hefur í bráðum 40 ár verið reglulega til umfjöllunar og fátt nýtt komið fram. Stutta sagan er að með kvótakerfinu gátu menn í hallærisrekstri selt útgerðum sem skiluðu arði. Úr þessu smíða vinstrimenn samsæriskenningar. RÚV er miðlægur aðili að koma samsæriskenningunum á framfæri.

Löngu tímabært er að fá opinbera skýrslu um fjárhags- og áhrifatengsl RÚV og stjórnmálaflokka vinstrimanna. Allt frá hruninu 2008 er óformlegt bandalag á milli ríkisfjölmiðilsins og stjórnmálaafla vinstrimanna. Í grunninn er fyrirkomulagið að RÚV veitir vinstriflokkum brautargengi í fjölmiðlaumræðunni, iðulega með skáldskap í fréttabúningi, en í staðinn tryggja vinstriflokkarnir að RÚV fái árlega yfir sex milljarða króna af fjárlögum ríkisins.

Vinstriflokkarnir standa gegn breytingum á nauðungaráskrift allra landsmanna eldri en 16 ára að RÚV. Gjaldið í ár er rúmar 21 þúsund krónur. Tillögur um að almenningur fái val um til hvaða fjölmiðils nefskatturinn rennur eru slegnar út af borðinu af vinstriflokkunum. Það er hægt að segja sig úr þjóðkirkjunni en ekki RÚV-kirkjunni.

Fjárhags- og áhrifatengsl vinstriflokkanna og RÚV birtast einnig á óskyldum vettvangi. Í gær rakti tilfallandi samkrull þessara aðila við ákæruvaldið í Namibíumálinu. Embætti héraðssaksóknara fékk aukafjárveitingu upp á 200 milljónir króna til að rannsaka ásakanir sem RÚV bar fram í opinberri umræðu um mútugjafir í Namibíu. Þrátt fyrir tæplega sex ára rannsókn finnast engar vísbendingar um mútur.

Skýrsla sem innihaldsgreindi fréttaflutning RÚV yfir lengri tíma, val á viðmælendum og áherslum í fréttaflutningi yrði upplýsandi. Litlar líkur eru á að slík skýrsla líti dagsins ljós. Jafnvel þegar RÚV er staðið að glæpsamlegum vinnubrögðum, í byrlunar- og símamálinu, sér djúpríki vinstrimanna til þess að Efstaleiti verði ekki afhjúpað sem Glæpaleiti.  

Kortleggja eignarhald 20 sjávarútvegsfyrirtækja