Össur baktalar þjóðina

Samfylkingin stendur ein að umsókn Ísland um aðild að Evrópusambandinu. Össur Skarphéðinsson utanríkisráðherra telur sæmandi að flytja innlendan hræðsluáróður um einangrun Íslands utan Evrópusambandsins á útflutningsmarkað og stórspilla orðspori lands og þjóðar.

Ummæli Össurar um að Ísland verði að gerast aðili að Evrópusambandinu til að standa jafnfætis nágrannaþjóðum eru örgustu öfugmæli. Lífskjör á Íslandi eru á hefðbundnum samanburðarmælingum betri en víðast hvar. Við höfum náð þessum lífsgæðum utan Evrópusambandsins. 

Utanríkisráðherra Íslands er aftur sérstakt eintak í alþjóðastjórnmálum. Eða hvaða annar ráðherra á byggðu bóli myndi baktala þjóðina sem hann þykist fulltrúi fyrir?

Össur: ESB hefði komið í veg fyrir efnahagshrun

Sumarsmellur Eiríks Bergmanns

Héraðsháskólinn á Bifröst elur Eirík Bergmann Einarsson meintan Evrópufræðing. Fyrir hönd Evrópusambandsins hótar Eiríkur Bergmann Íslendingum brottrekstri úr Evrópska efnahagssvæðinu, EES, fari svo að Ísland dragi tilbaka umsókn um aðild að Evrópusambandinu.

Einu sinni var Eiríkur Bergmann fyndinn þegar hann mærði Evrópusambandið. Til dæmis þegar hann sagði að auðveldara yrði að versla á netinu ef við yrðum aðilar. 

Hótanir um brottrekstur úr EES eru til marks um hjárænuhátt aðildarsinna og ESB-RÚV málpípunnar.

Hlutabréf Þorgerðar Katrínar í Sjálfstæðisflokknum

Almannagæði eru samkvæmt orðanna hljóðan verðmæti í eigu almennings. Stjórnmálaflokkar eru almannagæði með því að þeir eru opnir almenningi til þátttöku og á framfærslu almannavaldsins sem veitir til þeirra fé úr opinberum sjóðum. Sumir telja sig eiga meira í almannagæðum en aðrir.

Landsfundur Sjálfstæðisflokksins samþykkti nýverið með afgerandi hætti að Ísland ætti að draga tilbaka umsókn um aðild að Evrópusambandinu. Um níuhundruð landsfundarfulltrúar sátu fundinn.

Fyrrum varaformaður Sjálfstæðisflokksins, Þorgerður Katrín Gunnarsdóttir, telur að með samþykktinni sé verið að hrekja hana úr flokknum.  Þorgerður Katrín gat sem þingmaður ekki gert upp við sig 16. júlí í fyrra hvort hún ætti að segja nei eða já við þingsályktun um að Ísland sækti um aðild að Evrópusambandinu og skilaði auðu einn 63 alþingismanna. 

Þorgerður Katrín tók sér stutt frí frá þingmennsku á meðan stóð yfir umræða um afskriftir lána hennar og eiginmannsins hjá Kaupþingi. Líklega þarf hún að framlengja þinghléið á meðan botn fæst í hlutafjáreign hennar í Sjálfstæðisflokknum. Kannski finnst hlutabréf sem kveður á um að Þorgerður Katrín eigi tilkall til áhrifa í Sjálfstæðisflokknum umfram aðra. 

Arion er bakhjarl Jóns Ásgeirs

Jóni Ásgeirs Baugsstjóra munar ekki um að hótel í Skuggahverfinu hverfi til veðhafa. Hann er nýbúinn að borga af lúxusíbúðinni sem hann er skráður fyrir í New York. Á meðan skilanefnd Glitnis reynir að ná tilbaka fjármunum sem Jón Ásgeir sölsaði undir sig er Arion banki í öðrum leik.

Arion banki er helsti bakhjarl Jóns Ásgeirs hér á landi. Bankinn leyfir Baugsfjölskyldunni að mjólka rekstur Haga sem drottna á fákeppnismarkaði matvöruverslunarinnar með Bónus og Hagkaup.

Með Arion að bakhjarli tekst Jóni Ásgeiri jafnframt að halda Fréttablaðinu og 365 miðlum í sinni eigu með því að veita auglýsingafé Haga í fjölmiðlareksturinn. 

 Arion banki sér um sína.

Fasteignin 101 Hótel kyrrsett