Falsfólkið og laumuspilið um ESB

Lygar og fals varða íslenska Evrópusókn. Samtök iðnaðarins keyptu í áravís saklausa spurningu hjá Gallup um það hvort almenningur vildi taka upp viðræður við Evrópusambandið um aðild. Á grunni spurningarinnar var reist séríslenska kenningin um að við ættum að ,,kíkja í pakkann" eins og eitthvað annað en Evrópusambandið væri í pakkanum.

Þegar forysta Samfylkingarinnar bjó til innanflokksferli til að samþykkja aðild sem stefnumál var búin til spurning handa flokksmönnum sem var óskýr og ógreinileg þar sem pakkað var inn þrem þáttum, s.s. hvort við ættum að skilgreina samningsmarkmið okkar, sækja um aðild og bera niðurstöðuna undir þjóðaratkvæði. 

Í hóp aðildarsinna sækir fólk sem tamt er að bera kápuna á báðum öxlum. Svanfríður Jónasdóttir, fyrrum þingmaður Samfylkingarinnar, skipulagði innanflokksferlið í flokknum upp úr aldamótum og kvaðst ekki búinn að gera upp hug sinn - en gætti þess að andstæðingar aðildar innan flokks kæmust ekki að í umræðum. Ari Skúlason, fyrrverandi framkvæmdastjóri ASÍ, kvaðst óráðinn í afstöðu sinni en vann að því öllum árum að ASÍ myndi taka undir í aðildarsöngnum.

Þorgerður Katrín Gunnarsdóttir þingmaður Sjálfstæðisflokksins gaf sig lengi upp sem óráðna, talaði gjarnan um ,,kalt hagsmunamat", og sat hjá í atkvæðagreiðslunni 16. júlí 2009 þegar alþingi samþykkti tillögu um að sækja um aðild. Árni Þór Sigurðsson þingmaður Vg er annálaður kafbátur sem þykist í orði kveðnu hlynntur yfirlýstri afstöðu Vg um að Íslandi sé betur borgið utan ESB en innan en reynir hvað hann getur að koma okkur inn.

Egill Helgason reynir að gera falsfólkið að fórnarlömbum. Maður hefur séð trúverðugri þjóðfélagsgreiningu hjá Agli.  

 

Lögin og takmörk alþjóðahyggju

Íslendingar sóttu sér lög til átthaganna í Noregi þegar á þjóðveldisöld og fengu Járnsíðu og Jónsbók frá norskum konungum á 13. öld sem entust miðaldir og lengi eftir. Lögin frá Noregi voru sniðin að íslenskum aðstæðum rétt eins og danskur lagatexti er löngum notaður hér staðfærður.

Lög er í þágu samfélags og færð í letur til að úrskurða um deilumál. Þegar samfélagið er með eina hagsmuni sem heild gagnvart utanaðkomandi standa líkur til þess að lagatúlkun verði viðkomandi samfélagi hliðholl.

Tortryggni útlendinga gagnvart íslenskum dómum er skiljanleg og minnir á takmarkanir alþjóðhyggjunnar.