Reknetaveiðar þrátt fyrir ESB-bann

Milljónum ofan á milljónir evra var veitt til ítalskra sjómanna eftir að Evrópusambandið setti bann á reknetaveiðar í Miðjarðarhafi. Samkvæmt Financial Times hefur það komið fyrir lítið og veiða ítalskir sjómenn sverðfisk sem fyrr í reknet, en meðaflinn er oft tegundir í útrýmingarhættu s.s. skjaldbökur, hákarlar og hnísur.

Samkvæmt reglum Evrópusambandsins fellur allt lífríki sjávar í aðildarríkjum sambandsins undir sameiginlega fiskveiðistjórnun, Common Fisheries Policy - skammstafað CFP.

Margar brotalamir eru í fiskveiðistjórnunarkerfinu, t.d. að Evrópusambandið setur reglurnar en þjóðríkin eiga að sjá um framkvæmdina. Eins og fram kemur í fréttinni eru litlar líkur á að þeir ítölsku sjómenn sem staðnir eru að verki við ólöglegar veiðar verði sakfelldir - og allar líkur eru á að þeir haldi ESB-styrkjunum.

Umsókina strax tilbaka

Ólýðræðislega aðlögunarferlið sem Samfylkingin ber ábyrgð á að hafa komið okkur í verður af vinda ofan af. Við gerum það með því að alþingi samþykki fyrirliggjandi tillögu um að Ísland dragi tilbaka umsóknina um að aðild að Evrópusambandinu. Dragist á langinn að hætta við ferlið mun Evrópusambandið flækja okkur í netið og torvelda undankomuleiðir.

Eins og Hannan bendir á fáum við 4 til 5 þingmenn af 780 á Evrópuþinginu, eða um það bil hálft prósent. Í reynd þýðir það engin áhrif.

Framkvæmdastjórnin, sem er ígildi ríkisstjórnar Evrópusambandsins, er skipuð embættismönnum án pólitískrar ábyrgðar. 

Fámenn þjóð á jaðri Evrópu verður algjört aukaatriði í hagsmunarekstri Evrópusambandsins. 

Verum þjóð meðal þjóða og afþökkum aðild að Evrópusambandinu.

Öfundar Ísland af EES-samningnum

Lýðræði og aðlögun að útlendu forræði

Þegar ljóst var að Vinstrihreyfingin grænt framboð ætlaði að svíkja kjósendur sína og ganga að kröfum Samfylkingar um að sækja um aðild að Evrópusambandinu var lögð fram tillaga á alþingi að efnt yrði til þjóðaratkvæðagreiðslu um það hvort Ísland ætti að sækja um. Ríkisstjórnarflokkarnir höfnuðu tillögunni.

Fyrir sléttu ári samþykkti ríkisstjórnarmeirihlutinn að sækja um aðild að Evrópusambandinu. Lýðræðislegar forsendur fyrir samþykktinni voru hæpnar, svo ekki sé meira sagt. Annar stjórnarflokkurinn, Vg, hafði á stefnuskrá sinni að halda Íslandi utan Evrópusambandsins en sveik þá stefnu til að geta myndað ríkisstjórn með Samfylkingu.

Innganga í Evrópusambandið felur í sér að forræði íslenskra mála flyst í stórauknum mæli til Brussel. Reglur Evrópusambandsins um inngöngu nýrra ríkja fela í sér að umsóknarríki aðlagi sig að stjórnsýslu Evrópusambandsins jafnt og þétt í ferlinu sem leiðir til inngöngu. Þjóðaratkvæðagreiðsla í lok þessa ferlis er skrumskæling á lýðræði, einfaldlega vegna þess að þjóðin stæði frammi fyrir orðnum hlut.

Öllum má ljóst vera að ótvíræður meirihluti þings og þjóðar þarf að vera fyrir umsókn Íslands að Evrópusambandinu. Engu slíku er til að dreifa og því á alþingi að samþykkja fyrirliggjandi þingsályktunartillögu um að Ísland dragi umsóknina um aðild tilbaka.