Faglegur ruslahaugur Háskóla Íslands

Ríkisstjórnin eyðir hálfum milljarði króna í nefndir, samkvæmt fréttum. Alkunna er að nefndir ríkisins þjóna ýmsum tilgangi, til dæmis að svæfa mál eða veita launauppbót fyrir létt verk og löðurmannleg. Nefnd um faglegan grundvöll stjórnsýslu er trúlega svæfingaruppbótarnefnd fyrir fólk með lítið sjálfsálit en þörf fyrir uppgraderingu á ferilsskránni.

Formaður nefndarinnar er prófessor við Háskóla Íslands, Gunnar Helgi Kristinsson.  Sá prófessor er ruslútgáfa af fræðimanni og getur ekki leiðbeint einum eða neinum um fagleg úrlausnarefni.

Gunnar Helgi lét sér sæma að gefa könnunum Fréttablaðsins um afstöðu almennings til fjölmiðlafrumvarps ríkisstjórnar Davíðs Oddssonar vetur og vor 2004 faglegt lögmæti með því að vera sérstakur álitsgjafi um niðurstöðurnar, samanber þessa frétt frá 2004.

Fréttablaðið var og er í eigu Baugsfjölskyldunnar sem barðist hatrammlega gegn fjölmiðlalögunum. Skoðanakönnun á vegum Fréttablaðsins 2004 er álíka trúverðug og ef Besti flokkurinn kynnti skoðanakönnum sem segði að 100% Reykvíkinga myndi kjósa flokkinn.

Hvað ætli Gunnar Helgi tæki fyrir að gefa álit á slíkri könnun?

Faglegur grundvöllur stjórnsýslu veikur

Þorsteinn kvabbar á krónunni

Fjármálaráðherra sagði í vikunni að guði sé lof að við höfum krónuna til að takast á við vanda hagkerfisins í kjölfar hrunsins. Þorsteini Pálssyni fyrrum ráðherra  svelgdist á við orð Steingríms J. og skrifaði andmæli á leiðaraopnu Fréttablaðsins í dag. Kjarninn í málflutningi Þorsteins er þessi

Veikleikinn í kenningu fjármálaráðherrans er hins vegar sá að í opnu alþjóðlegu hagkerfi eru það erlend markaðsöfl sem ráða gengi krónunnar. Reynslan hefur sýnt að stjórntæki Seðlabankans og ríkisstjórnarinnar duga ekki til þess. Pólitískt fullveldi yfir krónunni fæst aðeins með því að loka hagkerfinu eins og gert er um þessar mundir með gjaldeyrishöftum.

Allir gjaldmiðlar í opnu alþjóðlegu hagkerfi eru háðir markaðsöflum. Evran tók dýfu í vikunni og þrýstingar var á dollarann í vetur. Þorsteinn stillir málinu upp þannig að fyrst við getum ekki alfarið stjórnað gengi krónunnar verðum við að varpa henni fyrir róða. 

Við stöndum margfalt betur með eigin gjaldmiðil sem dregur dám af stöðu íslenska efnahagskerfisins fremur en að taka upp mynt sem lýtur hagsveiflum stórþjóða eins og Þýskalands.

Þorsteinn er aðildarsinni og kvabb hans er að skoða í því ljósi. Hann segir krónuna valda óstöðuleika sem vitanlega er rugl enda þarf ekki annað en að gjóa augunum til Evrópu til að sannfærast um að gjaldmiðlar sem slíkir valda hvorki né stöðva óstöðugleika. 

Ef við skiptum út krónu fyrir annan gjaldmiðil, norska krónu, jen, svissneskan franka, dollara eða evru gefum við frá okkur forræði á peningamálum ríkisins. Rök Þorsteins eru að Íslendingum sé ekki treystandi til að fara með eigin mál. Um fimmtungur þjóðarinnar er þessarar skoðunar. Við höfum séð það svartara.

Réttlæti, pólitík og hugmyndafræði

Handtaka forstjóra Kaupþings er umræðuvaki um mörk dómskerfis og stjórnmála. Hannes Hólmsteinn sýnir föllnum auðmönnum samúð enda eytt starfsævinni í að mæra græðgi og finnst erfitt þegar reffilegir fulltrúar viðskiptalífsins eru sýndir sem glæpamenn. Tilefni meðaumkunar Hannesar er að fjármálaráðherra hafði látið það út úr sér að hann vonaðist til að óánægja almennings fengi sefjun við handtökuna.

Dómskerfið á að framleiða réttlæti. Almenningur er orðinn langeygur eftir réttlæti handa útrásarauðmönnum. Þegar hillir undir málagjöld er ástæða til að lofa og prísa ákæruvaldið.

Hvorki Hannes né Steingrímur J. starfa á vettvangi dómskerfisins. Hannes líður önn fyrir eymdarástand hugmyndafræðinnar sem var forsenda útrásarinnar. Steingrímur J. glímir við umsátursástand í fyrstu vinstristjórn lýðveldisins.

Orð Steingríms J. og viðbrögð Hannesar fara fyrir ofan garð og neðan réttvísinnar.