Leyft og bannað

Bann við að ungt fólk noti ljósabekki og bann við nektarsýningum eru tekin sem dæmi um forræðishyggju stjórnvalda. Bönn af þessu toga hljóta ávallt að vega og meta einstaklingsfrelsi annars vegar og almannahag hins vegar.

Rökin fyrir banni á ljósabekkjanotkun barna og unglinga er að þau viti ekki hvað sé þeim sjálfum fyrir bestu og foreldrunum sé ekki treystandi að hafa taumhald á afkvæmum sínum.

Nektarsýningar eru saklausi endinn á klámiðnaði. Velsæmi og forvörn gegn kynjamisrétti eru sjónarmið  sem réttlæta bannið.

Lög sem banna og hitt og þetta verða á dagskrá opinberrar umræðu næstu missera. Ástæðan er sú að efnahagsfrelsið sem samfélagið veitti þegnum sínum var svo herfilega misnotað að einstaklingsfrelsið er komið í vörn.

101 gegn landsbyggðinni

Fyrningarleið ríkisstjórnarinnar í sjávarútvegi er óðum að snúast upp í baráttu landsbyggðarinnar gegn Reykjavíkurkvos sem kennd er við póstnúmerið 101. Sjávarútvegur er landsbyggðinni hlutfallslega mikilvægari þótt æ stærri hlutur kvótans hafi verið fluttir í útgerðir fyrir sunnan á liðnum árum.

Fyrningin rennur í ríkiskassann og þangað greiða menn afgjaldið fyrir kvótann, gangi hugmyndir ríkisstjórnarinnar fram. Reynsla landsbyggðarinnar er að harðdrægt sé að fá fjármuni þaðan.

Ef það væri pólitík í stjórnarflokkunum hefðu þeir lagt fyrningarumræðuna upp þannig að afgjaldið rynni til sveitarfélaga og/eða stjórnsýslustigs sem kæmi á milli sveitarstjórna og landsstjórnarinnar.

En það er engin pólitík í stjórnarflokkunum og þeir eru búnir að tapa þessum slag.

Kyrrstaða til yfirvegunar og atvinnuleysi SA

Samtök atvinnulífsins kaupa auglýsingar í fjölmiðlum til að andmæla kyrrstöðu í atvinnulífinu og sérstaklega bera samtökin fyrir brjósti atvinnulausa. Nýlunda er að samtök atvinnurekenda geri málstað atvinnulausra að sínum. SA mun líklega krefjast hærri atvinnuleysisbóta til þeirra sem misstu vinnuna vegna hrunsins.

Félagsmenn SA bera mesta ábyrgð á hruninu. Á vettvangi SA og Viðskiptaráðs réðu ferðinni útrásarauðmenn. Eftir hrun hefur lítið farið fyrir umræðu hjá þessum aðilum um hvers vegna hlutirnir fór jafn illilega úrskeiðis og raun ber vitni.

Samtökum atvinnurekenda veitir ekki af kyrrstöðu til yfirvegunar.