Kreppan gjaldfellir alþjóðavæðinguna

Alþjóðavæðing var lykilhugtak fyrsta áratug 21stu aldar. Frjáls viðskipti og afnám landamæra fyrir flæði vöru, þjónustu og vinnuafls voru viðtekin sannindi austan hafs og vestan. Ekki lengur. Endurskoðun á áður samþykktum forsendum auk vaxandi þjóðlegrar íhaldssemi veldur því að alþjóðavæðingin á undir högg að sækja.

Maður er nefndur Paul Krugman, nóbelsverðlaunahafi í hagfræði, og brjóstvörn bandarísks frjálslyndis. Krugman er eins nálægt amerískri alþjóðavæðingu og hægt er að komast. Nema hvað að núna hvetur hann af öllum mönnum til að leggja á refsitolla á kínverskar vörur sem njóta góðs af handstýrðu gengi yuansins.

Dálkahöfundur Telegraph  Jeremy Warner, sem alla jafna er orðvar ólíkt Brósa sem starfar á sömu útgáfu, segir nýja sannfæringu Krugmans fyrir þjóðlegri íhaldssemi ógna heimsfriðnum. Hvorki meira né minna.

Kaninn og ESB; skítapakkið og hrunverjar

Málflutningur aðildarsinna reynir undanfarið að slá tvær flugur í einu höggi með því annars vegar að höfða til einangrunar landsins og meints vinaleysis og hins vegar að selja hugmyndina um að við græðum á aðild að ESB. Eftirfarandi er tilvitnun úr einu bloggi aðildarsinna

Kaninn fór árið 2006 og kemur aldrei aftur. Staða Íslands út frá þeirri staðreynd er í í lausu lofti. Ísland er hinsvegar Evrópuþjóð og hefur gríðarlega mikil efnahagsleg, menningarleg og pólitísk samskipti við aðrar Evrópuþjóðir. Ísland sleppur ekkert undan Evrópu. Til þess þyrftum við einfaldlega að færa landið á landakortinu og það er bara ekki mögulegt.

Í orðunum liggur að hefði Ameríkaninn ekki pakkað saman föggum sínum á Miðnesheiði værum við hvorki í lausu lofti né Evrópuþjóð. Samhliða undirlægjuhætti er í textanum undarleg nauðhyggja -  ,,Ísland sleppur ekkert undan Evrópu" - við eigum sum sé að ganga í ESB hvort sem okkur líkar betur eða verr.

Aðildarsinnar eru samsuða einstaklinga. Tveir meginstofnar blasa þó við. Í fyrsta lagi hnjákratarnir sem Vilmundur Gylfason kallaði skítapakkið og í öðru lagi aurasálir í Sjálfstæðisflokknum sem kunna ekki að gera greinarmun á eigin vasa og almannahagsmunum; þeir eru dags daglega kallaðir hrunverjadeildin í XD.

 

Evrópuvæðing, Grikkland og Ísland

Bankahrunið varð verra og illskeyttara á Íslandi vegna þess að samevrópskur bankamarkaður var illa þróaður og bjó að lélegu regluverki. Icesave-hluti hrunsins var eingöngu vegna evrópsks regluverks sem í einn stað bannaði ríkisábyrgð en í annan heimilaði óhefta útrás bankakerfis í einu landi til að herja á saklausra sparifjáreigendur í öðrum löndum.

Framkvæmdastjóri Alþjóða gjaldeyrissjóðsins tekur Ísland sem dæmi um öfgaafleiðingar af illa ígrunduðum tilraunum til að skapa sameiginlegan markað.

Strauss-Kahn og sjóðurinn hans eru í viðbragðsstöðu til að koma Grikklandi til bjargar sem er vegna frjálslyndra ríkisútgjalda og evru komið af fótum fram. Verði Alþjóða gjaldeyrissjóðurinn kallaður til að bjarga Grikkjum er evrusamstarfið í hættu og samrunaþróun álfunnar orðið fyrir áfalli.

Evrópuvæðingin eins og hún birtist annars vegar í Evrópska efnahagssvæðinu og hins vegar í Evrópusambandinu trosnar upp á jaðrinum.  Ísland átti ekkert erindi inn í samevrópskt bankakerfi og Grikklandi er illa þjónað með þátttöku í evrusamstarfinu.

 

Hið sorglega dæmi frá Íslandi