Draugar eiga Arion

Enn liggur ekki fyrir hverjir eiga Arion banka. Aðeins er látið uppskátt að kröfuhafar eigi bankann en það segir aðeins hálfa söguna. Kröfur í þrotabúið sem á Arion ganga kaupum og sölum. Upphaflegir kröfuhafar eru líklega löngu búnir að losa sig við verðpappíra tengdum Kaupþingi/Arion.

Þegar ekki liggur fyrir hverjir eiga Arion banka er hjákátlegt að láta í veðri vaka að stífar kröfur séu gerðar til stjórnarinnar um hæfi og getu til að stýra banka.

Draugarnir sem eiga bankann taka ákvarðanir og stjórnin er aðeins málpípa þeirra.

Ný stjórn Arion banka

Skæruhernaður í stjórnarráðinu

Ríkisstjórnarsamstarfið er að taka sá sig nýtt skipulagsform þar sem stjórnarflokkarnir skipta sér upp í tvo eða fleiri hluta og ýmist stríða innbyrðis eða herja samstarfsflokkinn. Einar K. Guðfinnsson sér þess merki að fjórflokkur sé að myndast á vinstri kanti stjórnmála.

Stjórnlistin að baki skæruhernaðinum er gera víglínur óglöggar og laumast aftan að andstæðingnum þegar síst varir. Samfylkingin gerir út skæruliðana Magnús Orra Schram og Sigmund Erni, sem báðir eru nýliðar og annar edrú, til að setja skilyrði fyrir áframhaldandi stuðningi við stjórnina.

Skæruhernaður samfylkingarmanna er svar forystunnar við órólegu deild Vinstri grænna. Munurinn er sá að andófsdeildin í Vinstri grænum hefur málefnastöðu á meðan skæruhernaður Samfylkingar er hrá valdapólitík.

Grikkir hóta ESB

Grikkir hóta Evrópusambandinu að fái þeir ekki nauðsynleg lán muni þeir leita til Alþjóða gjaldeyrissjóðsins. Fyrir ESB og evruríkin yrði það niðurlægjandi að ríki í kröggum yrði að leita hjálpar utan evrusvæðisins. Haft er eftir Jean-Claude Juncker stjóra Eurogroup að ef Kalifornía lenti í fjárhagsvandræðum myndi alríkisstjórnin í Washington ekki leita til Alþjóða gjaldeyrissjóðsins.

Á hinn bóginn hefur gríska fjárhagskreppan leitt í ljós að evruríkin eru vanmáttug til að takast á við misgengi aðildarríkjanna. Þjóðverjar hafa lítinn áhuga á að borga fyrir óhóflega neyslu Grikkja undanfarin ár. Grikkir töldu sig vera komna í öruggt skjól með fjármál sín þegar þeir tóku upp evru og finnst skorta á evrópska samheldni gagnvart sér.

Gríska kreppan mun breyta Evrópusambandinu varanlega. 

Hér er samantekt Brósa í Telegraph í dag um grísku stöðuna.