Hálaunastéttir að rifna úr frekju

Samviskulausar hálaunastéttir ganga fram með yfirgangi við aðstæður þar sem þorri launafólks má þola launaskerðingu ýmist í formi yfirvinnutaps eða beinna launalækkana. Framferði flugumferðastjóra er ótækt og þeir ættu að sjá sóma sinn í hverfa í hvelli frá skæruhernaði gagnvart þjóðinni og temja sér ábyrga afstöðu.

Flugumferðastjórar eiga eins og aðrar starfsstéttir með lausa samninga að semja til skamms tíma til að sjá hverju fram vindur í efnahagsmálum.

Flugumferðastjórar telja sig geta sótt kauphækkun hjá ríkisvaldi á hnjánum. Hálaunaliðinu á ekki að líðast þessi framkoma. Ef annað bregst á að setja lög á verkfallið.

 

 

Vill lög á flugumferðarstjóra

Ísland 0,08% af hagkerfi ESB

Innganga Íslands í Evrópusambandið myndi auka þjóðarframleiðslu sambandsins um 0.08 prósent og mannfjölda um 0,06 prósent. Þessar tölur eru úr skýrslu framkvæmdastjórnarinnar þar sem mælt er með því að Íslandi fái stöðu umsóknarríkis en það er forsenda fyrir innlimum Íslands í sambandið.

Þessar stærðir skipta máli vegna þess að sú fyrri mælir áhrif þjóða í Seðlabanka Evrópu og sú seinni atkvæði í ráðherraráði og þingmannafjölda á Evrópuþinginu.

Ísland hefði núll komma eitthvað áhrif í Evrópusambandinu. Evrópusambandinu munar ekkert um að innlima landið og miðin og hefur allt að vinna. Ísland hefur öllu að tapa.

 

Vilja aðildarviðræður þrátt fyrir Icesave

ESB klofnar vegna evrunnar

Evran mun kljúfa Evrópusambandið. Þau 16 ríki af 27 sem hafa evru sem gjaldmiðil verða að framselja fjárhagslegt fullveldi sitt í auknum mæli til Brussel og Seðlabanka Evrópu í Frankfurt. Ríkin 11 sem standa utan evrunnar, s.s. Bretar, Danir, Svíar og fleiri, sjá sér ekki hag í því að leggja opinbera fjármuni í að leiðrétta hagstjórnarmistök í Grikklandi, Ítalíu, Spáni og Portúgal.

Þjóðverjar sitja uppi með stærstan hluta reikningsins og á móti munu þeir krefjast ríkari íhlutunarréttar í málefni einstakra ríkja. Þýsk íhlutun yrði klædd í evrópska hanska.

Gangi þetta fram verður til tveggja þrepa Evrópa. Annars vegar kjarnaríkin sem mynda evrusvæðið og hins vegar jaðarríkin sem fyrr heldur en seinna komast í stöðu Noregs og Íslands sem þátttakendur í Evrópska efnahagssvæðinu, EES, en leiða hjá sér samrunaferlið.

Kostir evruríkjanna eru óðum að skýrast. Annað tveggja, aukinn samruni samanber hér að ofan, eða að gjaldmiðlasamstarfið líði undir loka.

Hvort heldur sem er mun evran kljúfa Evrópusambandið. Spurningin er aðeins í hve marga hluta.